استانادا الامان بايگەدەن «التىن تۇلپار» تۋرنيرى وتەدى
بايگەنىڭ باس سەرىكتەس - «سامۇرىق- قازىنا» ۇ ا ق» ا ق، الەۋمەتتىك سەرىكتەس - «Samruk-Kazyna Trust» الەۋمەتتىك جوبالاردى دامىتۋ قورى، «نۇر وتان» پارتياسى، ق ر مادەنيەت جانە سپورت مينيسترلىگى، قر ۇلتتىق سپورت تۇرلەرى قاۋىمداستىعى ۇيىمداستىراتىن الامان بايگەنىڭ جارىس جولى 51 شاقىرىمدى قۇرايدى. بايگە ۇلكەن اۋماقتى شەڭبەردى 4 رەت اينالىپ شابۋ ارقىلى جۇرگىزىلەدى. جارىس جولىنىڭ بويىنا ءاربىر 2 شاقىرىم سايىن بارلىعى - 7 باقىلاۋ بەكەتى ورنالاسادى. بەكەتتەردە تەلەكامەرالار مەن تورەشىلەر، مال دارىگەرلەرى، ءتارتىپ ساقشىلارى تۇرىپ، بايگە بارىسىن باقىلايدى. جارىسقا قاتىساتىن شاباندوزدارعا ءتۇسى ءارتۇرلى، ارقاسىندا ساندىق ءنومىرى بار ارنايى جەيدە كيگىزىلەدى. بەكەتتەگى تورەشىلەر كولدەنەڭنەن ات قوسىلىپ كەتپەۋىن باقىلايتىن بولسا، تەلەكامەرالار بايگە بارىسىن حالىققا تىكەلەي ەفيردە كورسەتەدى. بۇلاردان باسقا 1 تىكۇشاق جارىس جولىن ۇستىنەن اينالىپ ءجۇرىپ، بايگە اتتارىن بيىكتەن باقىلاپ كامەراعا تۇسىرەدى. كورەرمەندەر مەن ات يەلەرى ءوز جۇيرىكتەرىنىڭ قاي تۇستا شاۋىپ بارا جاتقاندىعىن جارىس الاڭىندا ورنالاستىرىلعان لەد ەكراننان باقىلاۋعا مۇمكىندىك قاراستىرىلعان. الامان جارىسقا ەلىمىزدىڭ 14 وبلىسى جانە استانا، الماتى قالالارىنىڭ ءارقايسىسىنان 10 سايگۇلىكتەن قاتىسادى. جارىسقا جۇيرىك تۇقىمداردىڭ بارلىعى قاتىستىرىلادى. مارەگە العاشقى جەتكەن 9 تۇلپارعا ديپلوم جانە قارجىلاي جۇلدە بەرىلەدى.
اتالمىش شارا اياسىندا «ات سىنشىسى» بايقاۋى ۇيىمداستىرىلادى. شىن جۇيرىكتى جازباي تانىعان سىنشىلارعا «تولىباي سىنشى» ، «كۇرەڭباي سىنشى» ، «شوقاي سىنشى» جانە «كيىكباي سىنشى» اتىنداعى ارنايى جۇلدەلەر بار.
جارىس وتەتىن جەرگە جولاۋشىلار تاسىمالدايتىن اۆتوبۋس قاتىنايدى. جارىس كەزىندە كونسەرتتىك باعدارلاما، قول ونەر كورمەلەرى جانە تويشىل قاۋىمعا ارناپ قىمىزمۇرىندىق، ۇلتىق تاعام تۇرلەرىنەن فەستيۆال ۇيىمداستىرىلادى.