قازاق گەوگرافيالىق قوعامى «ءاليحان بوكەيحان ىزىمەن» اتتى ەكسپەديتسيانى باستادى
ەكسپەديتسيالىق جوبانىڭ ءبىر باعدارى ۇلت تاريحىنداعى كورنەكتى تۇلعانىڭ ءبىرى، «الاش» ۇلت ازاتتىق قوزعالىسىنىڭ نەگىزىن قالاۋشى، قوعام قايراتكەرى، قازاقتان شىققان تۇڭعىش گەوگراف ءاليحان بوكەيحاننىڭ تۋعانىنا 150 جىل تولۋىمەن بايلانىستىرىلىپ وتىر.
جالپى «ەكسپەديتسيا 25» جوباسى ەكى باعداردى قامتيدى. ونىڭ ءبىرى وسى - «ءاليحان بوكەيحان ىزىمەن» باعدارى.
ءاليحان بوكەيحان - قوعام قايراتكەرى عانا ەمەس، ساياساتكەر، اعارتۋشى، جۋرناليست، قازاق تىلىندەگى العاشقى گەوگرافيا وقۋلىعىنىڭ اۆتورى، ەتنوگراف، ورىس گەوگرافيالىق قوعامىنىڭ مۇشەسى. يۋنەسكو كولەمىندە اتالىپ ءوتىپ جاتقان مەرەيتوي اياسىندا بۇگىندە رەسەي مەن تۇركيادا ايتۋلى شارالار وتكىزىلگەن بولاتىن. قازاقستاندا دا الەم مويىنداعان الاش زيالىسىنىڭ ءومىرىن، شىعارماشىلىق جولىن، ساياسي تۇعىرىن تانىتارلىق، الاش كوسەمىنىڭ سان ءتۇرلى ونەردى بويىنا جيعان جان- جاقتى قىرىن اشارلىق كونفەرەنتسيالار مەن دوڭگەلەك ۇستەلدەر وتكىزىلىپ، شارالار ۇيىمداستىرىلۋدا.
قازاق گەوگرافيالىق قوعامى دا وسى ايتۋلى ۇدەرىستەن تىس قالماي «ءاليحان بوكەيحان ىزىمەن» اتتى ەكسپەديتسيا ۇيىمداستىرىپ وتىر. قۇرامىنا ايگۇل ءىسىماقوۆا، قايىربەك كەمەڭگەر، ايجان حاميت، ەلدوس توقتارباي سەكىلدى ت. ب. جەتەكشى الاشتانۋشىلار مەن تاريحشىلار تارتىلعان ەكسپەديتسيا اقتوعايدان باستالىپ، قارقارالى، سەمەي، ومبى، سانكت- پەتەربور، مينسك، سامارا، ورىنبوردا بولىپ، باعدارىن ماسكەۋدە اياقتاماق.
ەكسپەديتسيانىڭ ماقساتى - ءاليحان بوكەيحاننىڭ ءومىر جولىن كەڭ ارنادا تانىستىرۋ، وقىرماندارعا ەڭبەكتەرىن تانىتۋ، الاش كوسەمىنىڭ ەل ەركىندىگى ءۇشىن ىستەگەن ەرەن ەڭبەگىن ناسيحاتتاۋ. سونداي- اق ءالى كوپشىلىك قاۋىمعا ءمالىم بولا قويماعان دايەكتەر مەن قۇجاتتاردى ىزدەستىرۋ بولماق.
اۆتور: قانات مامەتقازى ۇلى