التى بالانىڭ اناسى ءوزىن ماسكۇنەم كۇيەۋىنەن قورعاۋدى سۇرادى

استانا. قازاقپارات - التى بالانىڭ اناسى ايجان كارىموۆا ءوزىن كۇيەۋىنەن قورعاۋدى ءوتىنىپ سۇرادى.

ايەل ونىڭ ءوزىن 19 جىلدان بەرى ۇرىپ كەلە جاتقانىن ايتادى. دارىگەرلەر سان مارتە مي جاراقاتى مەن ىشكى ورگاندارىنىڭ زاقىمدالعانىن تىركەگەن. سوت شەشىمى بويىنشا زاڭدى جولداسى ەندى ايجانعا جولاي المايدى. الايدا ازاماتتى بۇل توقتاتپاق ەمەس.

بۇل تۋرالى 31 ارنا حابارلايدى.

ايجان كارىموۆا كوپتەن بەرى العاش رەت كۇيەۋى تەمىر توردىڭ ار جاعىنا 10 كۇنگە قامالعاندىقتان ەركىن تىنىستاۋدا. الايدا ايەل ارى قاراي نە بولاتىنىن ويلاۋدان قورقادى. ول سوققىدان كەيىن ءوزىنىڭ بەس رەت اۋرۋحاناعا تۇسكەنىن ايتادى. سوڭعى رەت دارىگەرلەر دەنە جاراقاتىن، مي شايقالۋىن جانە ىشكى ورگانداردىڭ زاقىمدالۋىن تىركەگەن.

«ۇيگە اراق اكەلىپ، بالالارعا ىشكىزەدى. ولار ونى يىسكەپ، ساسىق ەكەنىن ايتادى»، - دەيدى ايەل.

وتباسىندا التى بالا بار. ەڭ كىشىسى ءۇش ايلىق. ايجان ولاردىڭ دا مەكتەپكە بەت-اۋزى كوگەرىپ باراتىندىعىن ايتادى. ەش سەبەپسىز، ءتىپتى 14 جاستاعى وزات وقۋشى ديانانى دا ۇراتىن كورىنەدى.

ايجان كۇيەۋىنىڭ ۇستىنەن سان مارتە شاعىم جازىپ قاماتسا دا، ساقشىلار ونى بىرنەشە ساعاتتان كەيىن بوساتىپ جىبەرەدى ەكەن. ايەل مەن بالالارى ءدال وسىلاي كۇن كەشىپ جاتقاندارىن تۋعان- تۋىسقاندارىنان جاسىرىپ كەلگەن.

قازاقستاندا وتباسىندا ايەلىنە قول كوتەرەتىن ەركەكتەر ءۇشىن قاتال جازا جوق. ولار 400 مىڭ ايىپپۇل تولەپ جازاسىنان قۇتىلىپ كەتەتىن كورىنەدى.

 

Stan.kz