تاسكەشۋدە تاسىعان سۋ جىلقى ءۇيىرىن اعىزىپ اكەتتى - فوتو

استانا. قازاقپارات - و ق و- داعىتاسكەشۋ اۋىلىندا توتەنشە جاعداي ورىن الدى.

توتەننەن جاۋعان جاۋىن سوڭى بۇرشاققا ۇلاسىپ، جايىلىمداعى ءتورت تۇلىك مال زارداپ شەكتى.

نوسەر جاۋىن قىر استىنداعى 200 دەن استام جىلقىنى اعىزىپ اكەتكەن دەيدى اۋىل تۇرعىندارى.

قۇيىنداتا جاۋعان جاڭبىر سۋى ارىق- اتىزدان تاسىپ اعىپ، اۋىل ماڭىنداعى سۋ قويماسىنا قۇيعان. سونىڭ سالدارىنان 30 عا جۋىق جىلقى سۋعا تۇنشىعىپ قالىپتى. سونداي-اق، سيىر مەن ۇساق مال دا سۋ استىندا قالعان، دەپ حابارلايدى otyrar.kz.

جان- جاققا حابار بەرگەن اۋىلدىقتار سۋعا كەتكەن تۇلىگىن تۇگەندەپ جاتىر. ال قۇتقارۋشىلار قايىقپەن ءجۇزىپ، توعاننىڭ بەتىندە قالقىعان جانۋارلاردىڭ دەنەسىن جاعاعا شىعارۋدا.

وقيعا ورنىنا ءال-فارابي اۋدانىنىڭ اكىمى باۋىرجان قالجان باستاعان بيلىك وكىلدەرى كەلدى. اكىمنىڭ ايتۋىنشا، شىعىننىڭ كولەمىن ءال-فارابي اۋدانى اكىمدىگىنىڭ قىزمەتكەرلەرىنەن قۇرالعان كوميسسيا انىقتاۋدا.

ازىرگە مال يەلەرىنە وتەم بولا ما، جوق پا، بەلگىسىز. ونى كوميسسيا مۇشەلەرى ابدەن زەردەلەپ، انىقتاپ بارىپ شەشەدى دەيدى اۋدان باسشىلىعى. بۇعان قوسا ىنتىماق كوشەسىندە ءۇش ءۇيدىڭ سارايى سۋ استىندا قالدى. قاتتى نوسەر ەلدى مەكەندەگى اعاشتاردى قۇلاتىپ، گاز قۇبىرىن دا قيراتىپ كەتكەن.