قازاقستان تۇركيا مەن رەسەي اراسىنداعى بايلانىستىڭ تولىق قالپىنا كەلۋىنە قولداۋ بىلدىرەدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە سىرتقى ساياسات ۆەدمستۆوسىنىڭ باسشىسى ەرلان ىدىرىسوۆ ءمالىم ەتتى.
«قازاقستان ءبىزدىڭ جاقىن ارىپتەستەرىمىز بولىپ تابىلاتىن تۇركيا مەن رەسەيدىڭ اراسىندا ورىن العان قاقتىعىستىق جاعدايدىڭ رەتتەلە باستالۋىنا قولداۋ بىلدىرەدى. تۇركيا مەن رەسەي ەلدەرىنىڭ باسشىلارىنا جازباشا ۇندەۋلەر جولداندى، تەلەفونمەن اڭگىمەلەسۋلەر جۇرگىزىلدى. وسىدان سوڭ تۇركيا مەن رەسەي سىرتقى ىستەر مينيسترلەرىنىڭ كەزدەسۋى سوچي قالاسىندا ءوتتى. بۇل بايلانىس جالعاسۋدا، وسى ەكى مەملەكەت اراسىنداعى قارىم-قاتىناستار ءورىسى اسا اۋقىمدى»، - دەدى ە. ىدرىسوۆ.
ءمينيستردىڭ ايتۋىنشا، قازاقستان پرەزيدەنتى نۇرسۇلتان نازاربايەۆ تۇركيا مەن رەسەي اراسىنداعى جانجالداردىڭ رەتتەلۋىندە نىسانالى ءرول اتقاردى. «ەندىگى كۇنى قازاقستانمەن ارىپتەس وسى ەكى مەملەكەت اراسىندا تولىق اۋقىمداعى ىنتىماقتاستىقتىڭ قالپىنا كەلۋىنە سەنىم بىلدىرگىمىز كەلەدى»، - دەدى س ءى م باسشىسى.
اۆتور: قانات مامەتقازى ۇلى