قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە بايلانىستى كەشەندى جوسپار ازىرلەنەدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە سىرتقى ساياسات ۆەدومستۆوسىنىڭ باسشىسى ەرلان ىدىرىسوۆ ءمالىم ەتتى.
«28- ماۋسىمدا ب ۇ ۇ- عا مۇشە 193 مەملەكەتتىڭ داۋىس بەرۋى ناتيجەسىندە قازاقستان 2017-2018-جىلدارعا ۇيىمنىڭ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. بۇل، شىندىعىندا، مەملەكەت باسشىسىنىڭ جەكە بەدەلىنىڭ جانە حالىقارالىق كۇن تارتىبىندەگى وزەكتى ماسەلەلەر بويىنشا بەلسەندى قىزمەتىنىڭ ارقاسىندا مۇمكىن بولعان تاريحي وقيعا. سونىڭ ىشىندە، پرەزيدەنتتىڭ جاھاندىق قارۋسىزدانۋ مەن تەرروريزمگە قارسى كۇرەس جانە قاۋىپسىزدىك پەن دامۋدىڭ وزگە دە قاتەرلەرىنە قارسى باستامالارىنىڭ قاجەتتىلىگى دە ايقىن كورىنىپ وتىر»، - دەدى ە. ىدىرىسوۆ. ونىڭ ايتۋىنشا، ب ۇ ۇ نەگىزگى ورگانىنا مۇشە بولۋ بىرىككەن ۇلتتار ۇيىمىنداعى قاۋىپسىزدىك كەڭەسىنىڭ تۇراقتى جانە تۇراقتى ەمەس مۇشەلەرىمەن ءوزارا ارەكەتتەستىكتى دامىتۋ ءۇشىن ەلىمىزگە ۇلكەن مۇمكىندىك تۋدىرادى. «سونىمەن قاتار، قازاقستان ءۇشىن ەلىمىزدىڭ ءداستۇرلى ارىپتەستەرىمەن ىنتىماقتاستىقتى كۇشەيتىپ، ەكۆاتوريالدى افريكا، مۇحيت جاعالاۋى ەلدەرىمەن، لاتىن امەريكاسى، كاريب باسسەينى سەكىلدى وڭىرلەردەگى جاڭا ارىپتەستەرمەن قارىم-قاتىناستى دامىتۋعا سەپتىگىن تيگىزەدى. قاۋىپسىزدىك كەڭەسىندەگى قازاقستاننىڭ جۇمىسى ءبىرقاتار باسىمدىقتارعا نەگىزدەلەدى. ونىڭ العاشقىسى يادرولىق قارۋدى تاراتۋعا قارسى جانە تەرروريزممەن كۇرەس بويىنشا ەلباسى كوتەرگەن باستامالار. «الەم. ХХІ عاسىر» مانيفەسى مەن باسقا دا قۇندىلىقتار مەن يدەيالار. ەكىنشىدەن، ءىرى دەرجاۆالار، سونىڭ ىشىندە ەۋرازيا كەڭىستىگىندەگى مەملەكەتتەر بويىنشا قازاقستاننىڭ ۇلتتىق مۇددەلەرىن ەسكەرە وتىرىپ، پروبلەمالاردى شەشۋ جولدارىن قاراستىرۋ»، - دەدى مينيستر.
ونىڭ ايتۋىنشا، قازاقستاننىڭ باسىمدىقتارىنىڭ اراسىندا الەمنىڭ ءارتۇرلى وڭىرلەرىندەگى ازىق-تۇلىك قاۋىپسىزدىگى، سۋ، ەنەرگەتيكا جانە يادرولىق قاۋىپسىزدىك، ب ۇ ۇ قاۋىپسىزدىك كەڭەسى تەتىكتەرى ارقىلى مەملەكەتتىك كاسىبي اپپاراتتى قالىپتاستىرۋ ماسەلەلەرى دە قاراستىرىلاتىن بولادى. «وسى باعىتتاعى باسىمدىقتار نەگىزىندە ق ر سىرتقى ىستەر مينيسترلىگى ب ۇ ۇ قاۋىپسىزدىك كەڭەسىنىڭ 2017-2018-جىلدارداعى قازاقستان قاتىساتىن جۇمىستارىنىڭ كەشەندى جوسپارىن ازىرلەيتىن بولادى»، دەدى ۆەدومستۆو باسشىسى.
اۆتور: قانات مامەتقازى ۇلى