استانادا باتپىراۋىقتار ۇشىرىلدى - فوتو

استانا. قازاقپارات - استانادا ونداعان باتپىراۋىق ۇشىرىلدى. سارايشىق كوشەسىندەگى كوپىردىڭ جانىندا ەسىل وزەنىنىڭ جاعالاۋىندا «استانا اسپانى» باتپىراۋىقتار فەستيۆالى ءوتىپ جاتىر.

شاراعا فرانسيا، گەرمانيا، يسپانيا، نيدەرلاندى جانە رەسەيدەن كەلگەن 70 جۋىق ادام قاتىسۋدا.

استانا قالاسى مادەنيەت باسقارماسىنىڭ مۇرىندىق بولۋىمەن اتالمىش شارا ەلوردادا ءۇشىنشى رەت ۇيىمداستىرىلىپ وتىر. ەلوردا تۇرعىندارى مەن قوناقتارىن 5- جانە 6- شىلدەدە ساعات 12 دەن كەشكى 8 گە دەيىن بۇل شارانى تاماشالاي الادى.

- شەتەلدىك ديزاينەرلەر ەلوردا تۇرعىندارى مەن قوناقتارىنىڭ نازارىنا ادەمى باتپىراۋىقتار ۇسىنادى. الەمدە باتپىراۋىقتار ۇشىراتىن باسقا دا فەستيۆالدار بار - جارىستار، باتپىراۋىقتاردى سينحروندى تۇردە ۇشىرۋ، - دەيدى «استانا اسپانى» فەستيۆالىنىڭ اكىمشىسى قايسار سابىبايەۆ.

ال كىشكەنتاي استانالىقتار ءۇشىن شارا بارىسىندا شەبەرلىك دارىستەرى ۇيىمداستىرىلىپ، باتپىراۋىقتار جاساۋ جانە ۇشىرۋ جولدارى كورسەتىلەدى.

ەكى كۇنگە جالعاساتىن فەستيۆال باعدارلاماسىندا ەلوردالىق «امەريكانو» لايۆ-بەند، «ۆىسوكيە براتيا & TallBrothers»  ماسكەۋلىك كوشە تەاترى، «پاۆانا» نيدەرلاندى تەاترىنىڭ ترۋپپاسى، سونداي-اق، ديدجەيلەر ونەر كورسەتەدى، كونكۋرستار مەن باتپىراۋىقتار ۇتىسى وتكىزىلەدى، دەپ حابارلايدى astana. kz.