تۇركياداعى ۇلىن ءبىر كورۋگە زار بولعان انا جۇكتى ايەلدەرگە ۇيدە وتىرۋعا كەڭەس بەردى

استانا. قازاقپارات - تۇركيادا بوسانىپ قالعان قازاقستاندىق ەلەنا شيەۆچۋكوۆا دەنساۋلىق ساقتاۋ مينيسترلىگىنەن كومەك سۇراپ وتىر. دەمالىس كۇندەرى ەلگە ورالعان وتباسى بالانى تۇركيادا قالدىرۋعا ءماجبۇر بولعان. بۇل تۋرالى استانا ارناسى حابارلايدى.

750 گرامم بولىپ تۋعان ءسابي ارنايى قۇرىلعىدا جاتىر. دارىگەرلەر ونىڭ شيراۋىنا ەكى- ءۇش اي قاجەت دەپ وتىر. مەديتسينالىق قىزمەت اقىسى تاۋلىگىنە 1 مىڭ ا ق ش دوللارىن قۇرايدى. وعان جاس وتباسىنىڭ قالتاسى كوتەرمەيدى. ال قازاقستانعا ارنايى ۇشاقپەن جەتكىزىلمەسە، بالا ومىرىنە قاۋىپتى.

" ۇلىمدى انتاليادان قازاقستانعا اكەلۋ ءۇشىن، ارنايى ۇشاق كەرەك. ۇشاقتىڭ ءىشى ءتيىستى قوندىرعىمەن جابدىقتالىپ، نارەستەنى باقىلاپ، ەم- دوم جاسايتىن دارىگەرلەرى بولۋى شارت. سۇراپ بىلدىك. بۇل وتە قىمبات پروتسەدۋرا ەكەن. وكىنىشكە وراي، مۇنداي قىرۋار اقشا بىزدە جوق. سوندىقتان دەنساۋلىق ساقتاۋ مينيسترلىگى بىزگە قول ۇشىن بەرسە دەگەن ۇمىتتەمىز"، - دەيدى بالانىڭ اكەسى ۆلاديمير تروشەنكو.

ەرلى- زايىپتىلاردىڭ ايتۋىنشا، ولاردىڭ قايعىسىنا بەيجاي قاراماعان قازاقستاندىقتار ەسەپ- شوتتارىنا اقشا اۋدارىپ جاتىر. بۇگىندە ولار ساقتاندىرۋ كومپانياسىنان ايەلگە كورسەتىلگەن مەديتسينالىق قىزمەت شىعىنىن تولىق ءوندىرۋ ءۇشىن قۇجاتتارىن ازىرلەپ جاتىر.

بۇعان دەيىن فيرما جابىرلەنۋشىلەردىڭ شوتىنا 271 مىڭ تەڭگە اۋدارعانىن ايتقان بولاتىنبىز. ءبىراق بۇل سوما ءتيىستى قاراجاتتىڭ ۇشتەن ءبىر بولىگىن عانا قۇرايدى. اۋەلدە كلينيكا العاشقى جاردەم ءۇشىن 2 جارىم مىڭ ا ق ش ۆاليۋتاسىن تالاپ ەتكەن. كەيىن كونسۋلدىقتىڭ ارالاسۋىمەن سوما 1500 دوللارعا ازايعان.

«دارىگەرلەر بۇل جاعدايدىڭ «وقىس وقيعا» ەكەنىن راستادى. ويتكەنى مەنىڭ جانە بالامنىڭ ومىرىنە قاۋىپ ءتوندى. سوندىقتان ساقتاندىرۋ كومپانياسى كلينيكا تالاپ ەتكەن قارجىنى تولىقتاي وتەۋگە مىندەتتى. شىنىن ايتام، جۇرەگىم تۇركيادا قالدى. ۇلىمدى كورۋدىڭ ءوزى ارمان بولدى عوي. 10 مينۋتقا عانا كىرگىزەتىن. مەنىڭ باسىما تۇسكەن جاعداي بارلىق انالارعا ساباق بولسىن. جۇكتىلىك كەزىندە ۇيدە وتىرعان دۇرىس»، - دەيدى ەلەنا شيەۆچۋكوۆا.