ريودا بۇعان دەيىنگى وليمپيادالارداعى يگى ءۇردىس جالعاساتىنىنا سەنىمدىمىن - ن. نازاربايەۆ
بۇگىن اقوردادا ريو وليمپياداسىنا باراتىن سپورتشىلارمەن كەزدەسكەن ەلباسى نۇرسۇلتان نازاربايەۆ وسىلاي دەدى.
«ريودا وتەتىن وليمپياداعا ءبىر اي ۋاقىت قالدى. سونىڭ الدىندا داستۇرگە سايكەس سىزدەرمەن كەزدەسىپ، ءوزىمنىڭ تىلەگىمدى ايتىپ، ساتتىلىك تىلەيىن دەپ شاقىرىپ وتىرمىن. دايىندىقتىڭ ءبارىن ۋاقىتىندا جۇرگىزدىڭىزدەر. بۇل جىل - قازاقستان تاۋەلسىزدىگىنىڭ 25 جىلدىعى. سوندىقتان سىزدەرگە ۇلكەن سەنىم جۇكتەلەدى»، - دەدى مەملەكەت باسشىسى.
ق ر پرەزيدەنتى جازعى وليمپيادا ويىندارىنا 206 مەملەكەتتەن 10 مىڭ سپورتشى قاتىساتىندىعىن اتاپ ءوتتى. ولاردىڭ بارلىعى دا ءوز ءىسىنىڭ دۇلدىلدەرى ەكەندىگىن، جەڭىسكە ۇمتىلاتىندىعىن باسا ايتتى.
ءبىز سپورتتىڭ 26 تۇرىنەن 100 دەن استام جولداما الدىق. بارشالارىڭىزعا تابىس تىلەيمىن. مۇمكىنشىلىگىمىز جامان ەمەس. ءبىراق، جولدامانىڭ سانى ەمەس، سپورتشىلاردىڭ ساپاسى قاجەت ەكەندىگىن بىلەسىزدەر. كوپشىلىكتەرىڭدى جاقسى بىلەمىن، سپورت جولدارىڭدى باقىلاپ وتىرمىن. تالاي جەردە جەڭدىڭدەر»، - دەدى ن. نازاربايەۆ.
ەلباسى بۇل قازاقستاننىڭ قاتىسىپ وتىرعان 12- وليمپياداسى ەكەندىگىن، ەلىمىز كوك تۋىمىزدىڭ استىندا 5 رەت جازعى، 6 رەت قىسقى وليمپيادا ويىندارىنا قاتىسقانىن ەسكە سالدى.
«سوناۋ كەڭەستىك زاماننان بەرى قاراي الاتىن بولساق، ءالجان جارمۇحانبەتوۆ، نيللي كيم، جاقسىلىق ۇشكەمپىروۆ سياقتى ۇلكەن اعا-اپالارىڭىز قازاقستاننىڭ مەرەيىن كوتەرىپ، جەڭىپ شىققان بولاتىن. تاۋەلسىزدىك جىلدارىندا سپورتشىلارمىز وليمپيادا جەڭىپ العان 69 مەدالدىڭ 17- التىن القا بولاتىن. ريو دە جانەيرودادا يگى ءۇردىس جالعاسىپ، ەلىمىزدىڭ مەرەيى اسپانداي تۇسەتىندىگىنە سەنىمدىمىن. ناعىز پاتريوت عانا ەلدىڭ ابىرويى ءۇشىن تايتالاستا ءوز مۇمكىنشىلىگىنىڭ شەگىنەن دە شىعىپ جەڭىسكە جەتەتىن بولادى. سەندەر بارشا قازاقستاندىقتاردىڭ اق باتاسىن الىپ، جاۋاپتى ساپارعا اتتانايىن دەپ وتىرسىڭدار. 17 ميلليون حالىق تۇگەلدەي تەلەديدار الدىندا وتىرىپ، سەندەرگە جانكۇيەر بولادى»، - دەدى ق ر پرەزيدەنتى.
اۆتور: مارلان جيەمباي