استانادا ب ا ق وكىلدەرى اراسىندا شاعىن فۋتبولدان س. بەردىقۇلوۆ اتىنداعى تۋرنير ءوتىپ جاتىر - فوتو

استانا. قازاقپارات - بۇگىن حالىقارالىق سپورت جۋرناليستەرى كۇنى مەرەكەسىنە وراي ق ر مادەنيەت جانە سپورت مينيستىرلىگىنىڭ ۇيىمداستىرۋىمەن ب ا ق وكىلدەرى اراسىندا شاعىن فۋتبولدان سەيداحمەت بەردىقۇلوۆتى ەسكە الۋعا ارنالعان تۋرنير ءوتىپ جاتىر.

تۋرنيرگە «قازاقپارات» اگەنتتىگىنىڭ كومانداسىمەن بىرگە «استانا» تەلەارناسى، «ءالجان»، «قازاقستان ۇلتتىق ارناسى»، «كازكونتەنت»، «قازمەديا»، «حابار استانا»، «پولك- ت ۆ»، «يۋكو»، «الماتى قۇراماسى»، « قىزىلجار»، «24 ك ز»، «ەگەمەن قازاقستان» گازەتى، «اسسوتسياتسيا»، «National Geographic»، «حابار الماتى»، «ەۆرازيا ت ۆ»، «قازاق راديوسى»، «KazSport» تەلەارناسىنان قۇرالعان جالپى 19 كوماندا قاتىسۋدا.

ەستەرىڭىزگە سالا كەتەيىك، قازاق سپورت جۋرناليستيكاسىنىڭ كورنەكتى وكىلى سەيداحمەت بەردىقۇلوۆتى ەسكە الۋعا ارنالعان شاعىن فۋتبول ءتۋرنيرى جىل سايىن جۋرناليستەر اراسىندا وتەدى. بيىل وسىمەن 19- رەت ءوتىپ جاتقان بۇل ءدۇبىرلى دودانى ق ر مادەنيەت جانە سپورت مينيستىرلىگى ۇيىمداستىرىپ وتىر. جەڭىمپازدار مەن جۇلدەگەرلەر بۇگىن كەشتە انىقتالادى.

سەيداحمەت بەردىقۇلوۆ 1933 -جىلدىڭ 9 -مامىرىندا الماتى وبلىسى، جامبىل اۋدانىنداعى قاراقاستەك قىستاعىندا دۇنيەگە كەلگەن. قازاقستانداعى سپورت جۇلدىزدارىنىڭ تابىستارىن ناسيحاتتاۋعا ەڭبەك سىڭىرگەن. 1956 -جىلى قاز م ۋ- دىڭ جۋرناليستيكا فاكۋلتەتىن بىتىرگەن. 1965 - 1970 -جىلدارى «قازاقستان پيونەرى» باسىلىمىنىڭ رەداكتورى. 1970 - 1986 -جىلدارى «لەنينشىل جاس» (قازىرگى «جاس الاش» ) گازەتىنىڭ رەداكتورى، 1986 - 1994 -جىلدارى «جالىن»، «بالاۋسا» باسپالارىنىڭ ديرەكتورى بولعان.

شىعارمالارى: «سول ورامال جوعالمايدى» (1965)، «جۇرەك ۇيىقتاۋدى بىلمەيدى» (1967)، «ەگەۋلى نايزا» (1969)، «جۇمىر جەردە تەڭبىل دوپ» (1969)، «اسپاننان شۇعا جاۋعان كۇن» (1975)، «مۇڭايىپ ويانعان قالا» (1979)، «№3 پودەزد» (1980)، «پەردەسىز كوڭىل» (1983)، «ارباعان ءمانى ءبىر سيقىر» (1987).