استانالىقتار حالىقارالىق سيرك فەستيۆالى اياسىندا كەرىك پەن ءمۇيىزتۇمسىقتىڭ ونەرىن تاماشالاي الادى
جىل سايىنعى شارا كورەرمەندەرىن بيىل دا ءتانتى ەتپەك.
بۇگىن استانالىقتار فەستيۆالدىڭ جارقىن شارالارىنىڭ ءبىرى - ءداستۇرلى كاۆالكادانى تاماشالادى. سيرك ارتىستەرى ۇرمەلى اسپاپتار وركەسترىنىڭ سۇيەمەلدەۋىمەن قالا كوشەلەرىمەن ءجۇرىپ ءوتتى، دەپ حابارلايدى ەلوردا اكىمدىگىنىڭ باسپا ءسوز قىزمەتى.
مەرەكەلىك شەرۋ استانالىق سيرك جانىنان باستالىپ، قابانباي باتىر داڭعىلىمەن، دوستىق كوشەسىمەن، تۇركىستان جانە قونايەۆ كوشەلەرىمەن ءجۇرىپ، استانالىق سيرككە كەلىپ توقتادى.
فەستيۆال قاتىسۋشىلارى ۇلكەن اۆتوبۋسقا ءمىندى. شەرۋدى جانۋارلار، اتتار، پوني، تۇيەلەر باستاپ ءجۇردى. ءوتىپ بارا جاتقان ادامدار مەن كولىك جۇرگىزۋشىلەرى پاراد قاتىسۋشىلارىن قوشەمەتتەپ، ەستەلىككە سۋرەتكە ءتۇستى.
«ادەتتەگىدەي، جالپى، سيرك ونەرىن كەڭىنەن تاراتۋ ءۇشىن فەستيۆالدى كاۆالكادادان باستادىق. تاعى دا ءبىر شەرۋ وتكىزۋدى جوسپارلاپ وتىرمىز»، دەدى استانالىق سيركتىڭ شىعارماشىلىق دامۋ جونىندەگى كەڭەسشىسى ۆلاديسلاۆ بەرناسكي.
ونىڭ ايتۋىنشا، بيىل استانالىق سيرك كورەرمەندەرىن جاڭا نومەرمەن تاڭ قالدىرماق. ەكى ءارتىس كۇردەلى جانر - شتەين- تراپتا ونەر كورسەتپەك. سيرك ونەرى مارافونىنا سەگىز مەملەكەتتىڭ ارتىستەرى قاتىسادى. بەلارۋس، گوللانديا، قازاقستان، قىرعىزستان، موڭعوليا، رەسەي، تۇركىمەنستان جانە ەفيوپيا ەلدەرىنىڭ دۇنيەجۇزىلىك فەستيۆالدەردىڭ جۇلدەگەرلەرى مەن لاۋرەاتتارى، ءوز جانرلارىنداعى حاس شەبەرلەر، سيرك ونەرىندەگى اۋلەتتەردىڭ ۇرپاقتارى وزدەرىنىڭ ۆيرتۋوزدىق كورسەتىلىمدەرىن قوناقتاردىڭ نازارىنا ۇسىناتىن بولادى. ارتىستەردىڭ كوبى ەلوردالىق سيرك كۇمبەزىنىڭ استىندا العاش رەت ونەر كورسەتەتىن بولادى.
«بيىل فەستيۆالگە بۇرىن- سوڭدى قازاقستاندا بولماعان ەكزوتيكالىق جانۋارلار قاتىسادى. رەسەيدەن ۇيرەتىلگەن كەرىك پەن ءمۇيىزتۇمسىق اكەلىنەدى. كەرىك ءۇشىن توبەلەردى الىپ تاستاۋعا تۋرا كەلدى. ەندى ول مانەجگە وتە الادى، ءقازىر دايىندالىپ جاتىر»، - دەيدى ۆلاديسلاۆ بەرناسكي.
قالا تۇرعىندارى مەن قوناقتارى سيرك ونەرى فەستيۆالىن شىلدەنىڭ 2 سى مەن 7 سى ارالىعىندا تاماشالايدى.