روزا ءالقوجا «مۇزارت»، سۇلۋشاش نۇرماعامبەتوۆا سىندى ارىپتەستەرىنە رەنجۋلى
ول ىشتەگى وكپەسىن كەزەكتى جازباسى ارقىلى جەتكىزدى.
بۇل تۋرالى Stan.kz حابارلايدى.
روزا ءالقوجا ءوزىنىڭ ءانىن رۇقساتسىز ورىنداعان ارىپتەستەرىنە وكپەسىن جەتكىزدى. ءانشىنىڭ ايتۋىنشا، مۇنداي جاعداي ءبىر رەت ەمەس، باسىندا بىرنەشە رەت بولعان. ءتىپتى، وزىنەن تىكەلەي رۇقسات سۇراپ، ونى بەرمەگەن سوڭ دا ساحناعا الىپ شىققاندار بار ەكەن. شىدامى تاۋسىلعان ءالقوجا ىشتەگى وكپەسىن سىرتقى شىعاردى. ال ارىپتەستەرىنىڭ ارەكەتىنە ەلەمەۋ، ۇرلىق، جىندى قىلۋ دەپ باعا بەردى.
«ادامدى ەلەمەۋ، جورتا جىندى قىلۋ دەگەن نارسەلەر بار. سونداي ءۇش جاعدايدى ايتقىم كەلىپ وتىر! العاش «مەن سىيعا تارتقان ورامال» دەگەن ءانىمدى جاناتبەك اعا «سۇنەكەش» توبىنا، سايات پەن اقبوتا وزدەرىنە سۇراعان. بۇل كەزدە ءوزىم ءانشى بولۋدى ارمانداپ جۇرگەن ەدىم. ورىنداۋىمداعى ءان «داستان» ستۋدياسى ارقىلى كاسسەتالارمەن تاراپ كەتكەن. بەرە المادىم ەشكىمگە!
ءبىر كۇنى سۇلۋشاش نۇرماعامبەتوۆا قوڭىراۋ شالدى. ول كەزدە دە ءانىمدى ءوزىم ايتامىن دەپ بەرمەدىم. الايدا تۇسىنىكسىز سەبەپتەرمەن ەفيرگە مەرگەن تۇرعان اتتى قىرعىز انشىسىمەن ورىنداپ شىقتى. ەكىنشى بالاممەن ۇيدە وتىرعان كەزىم ەدى. ءوزىم پاتەردە تۇراتىنمىن. سوزگە تۇسىنبەگەن سوڭ اپكەمدى سوتقا بەردىم. مارال ىسقاقپاي حابارلاسىپ، اپاي ەندى ەش جەردە ورىندامايتىندىعىن ايتقان. ارىزىمدى قايتىپ الدىم. سوسىن سول ىشقىنۋمەن ۇلكەن ساحناعا ءوزىم الىپ شىقتىم!
ارادا 10 جىل وتكەن سوڭ ەرمەك ەلگەزەكوۆ وسى ءاندى 10 مىڭ دوللارعا سۇرادى. ونىڭ باعاسىز ەكەنىن ايتتىم. ءسويتتىم دە العاش رەت جەكە ءان كەشىمدى وتكىزدىم.
«ول كوكتەم ورالمايدى»
بۇل ءاندى ەكىنشى كۋرستا، قاز ۇ ۋ- دىڭ جۋرناليستيكا فاكۋلتەتىندە جۇرگەن كەزدە جازعان بولاتىنمىن. ارادا ءتورت جىل وتكەن سوڭ قاسىمحان بەكمانوۆ اعامەن تانىستىم. «ورامالدى» جاقسى كورەتىنىن ايتىپ، سونداي ءبىر ءان بەرۋىمدى ءوتىندى. ءوزىم جايلى، كوركىم جايلى، بولمىسىم مەن ءانىم جايلى عاجاپ اڭگىمەگە قاتتى ەلىكتىم! «ول كوكتەم ورالمايدى» دەگەن انگە ءسوز جازىپ بەردى. سوزگە قاتتىلىعىمدى ايتىپ «يليا جاقانوۆپەن، سوسىن سەنىمەن جۇمىس ىستەۋ وتە قيىن ەكەن» دەدى.
مەن انگە ءسوز قاراپايىم، تۇسىنىكتى، شىنايى جازىلۋى كەرەكتىگىن ايتىپ باعام عوي باياعى! سودان ول ءاندى وڭدەتىپ ءبىر كونسەرتتە ورىنداپ شىقتىم. بەينەبايان تۇسىردىك. اعامىز ءوزى دەمەۋشى تاپتى. كەيىن دەمەۋشىسىنىڭ ۇسىنىسىن ورىنداي الماي، اعامىزبەن ارامىز سالقىن تارتىپ كەتتى. اراعا بىرنەشە جىل سالىپ قايتا ارالاسا باستادىق.
مۇزارتتىڭ كەشىنە قاساعامەن بىرگە باردىق. رەنجىمەۋىمدى ءوتىندى. ءسوز جازىلا بەرەتىنىن ايتتى. كونسەرتكە شاقىرىپ، بارعان بولاتىنمىن. سوڭىنا دەيىن وتىردىم. «ول كوكتەم ورالمايدى» ءانىن شىرقاعاندا جىگىتتەرگە گۇل ۇسىندىم. ول - مۇزارت قوي. ولارمەن تەڭەسۋ ماعان قايدا؟!
اقبەرەن
2011 -جىلى كەش بەرىپ، 1-2 جىل ەركىن تىنىستاپ ءجۇردىم. داريا ءجۇسىپ اپكەم «جىلاتقانىڭ نەتكەنىڭ» اتتى ءانىڭدى ورىنداپ شىقتى» دەدى. تۇسىنبەي قالدىم. مەن تەك تويلاردا ايتۋعا رۇقسات بەردىم ەمەس پە؟! نەگە بەينەبايان ءتۇسىرىپ العان؟ اقمارال اپام اۆتور بولعان سوڭ رۇقسات بەرگەن شىعار دەپ ويلادىم.
ول ءاننىڭ ءسوزىن العاش س م س- حاتپەن اپانىڭ ءوزى جىبەرگەن. ارتىنان ءبىر وتىرىستا انىمەن ورىندادى. جەتىساي جاققا جول تارتىپ بارا جاتقان سوڭ اسىعىس قوشتاستىم. ءبىراق جاڭاعى ءان مازا بەرمەدى. «اپا، قاشان جازارىمدى بىلمەيمىن. ءبىراق ماعان وسى ءاندى بەرىڭىز» دەدىم. ول كىسى «سەنىكى بولسىن» دەپ كۇلدى.
اتالعان انگە ءسوز قوسىپ، ءيىرىمىن ءپىسىردىم. كوپ قىزدىڭ باسىنداعى جاعداي ەكەن. تارازدا ەكى رەت ورىنداپ، ارتىنشا حالىققا قانشالىقتى ۇنايتىنىن ۇقتىق. ءاليا قۇربىمنىڭ كەڭەسىمەن كونتسەرتتە تۇسكەن اقشاعا بەينەبايان تۇسىردىك. ونى ەفيردەن كورسەتۋگە اقشا دا بەردىك. سولاي ءار كونسەرتىم «ەي، وقتاۋلى اقبەرەن» دەپ باستالاتىن-دى.
ارمان دۇيسەنوۆتەن اقىل سۇراپ بارعان ەدىم ول كىسى «قايتەسىڭ؟! ەل وزىنە كەرەگىن الادى. بىرەۋگە جارناما جاساما دا ءمان دە بەرمە» دەدى.
ءبىر سۇحباتتا تۇڭعىشباي اعا «ءانىڭدى وزگەلەردىڭ ورىنداۋىنا قالاي قارايسىڭ؟» دەپ سۇرادى. «ورىنداي بەرسىن. مەن ەلگە جەتكىزدىم باستىسى. ارى قاراي ەلدىڭ يگىلىگىنە» دەپ جاۋاپ قايىردىم.
مەن سولاي ۇساق دۇنيەلەرگە ءمان بەرمەۋدى ۇيرەنگەنمىن! مەن وسىلاي ءوزىمدى نەشە رەت قاۋقارسىز سەزىندىم. مەن سولاي اعا- اپكەلەرىمە دەگەن قۇرمەتىمدى گراممداپ ولشەپ وتىراتىن بولعانمىن. السىزدىگىمدى ۇعىندىرىپ جىبەرگەندەر قايسارلىعىمدى دا قايراپ جىبەرەدى ءبىراق»، - دەيدى روزا ءالقوجا.
ءانشىنىڭ بۇل جازباسىنان كەيىن جەلى قولدانۋشىلارى ونى قولداۋعا كىرىستى. مۇنىمەن قاتار، ونەردىڭ بارىنە ورتاق ەكەنىن ايتقاندار دا بولدى. كوپشىلىك ءانشىنىڭ اندەرىن وزگەلەر تارتىپ الۋعا تىرىسقانىمەن ەرەكشە داۋىسىن ەشكىم يەمدەنە المايتىنىن ايتقان.