قازاقستاندا ازاماتتاردى مەرزىمدى اسكەري قىزمەتكە شاقىرۋ اياقتالدى

استانا. قازاقپارات - قازاقستاندا ازاماتتاردى قازاقستان رەسپۋبليكاسىنىڭ قارۋلى كۇشتەرىنە، باسقا دا اسكەرلەرى مەن اسكەري قۇرالىمدارىنا مەرزىمدى اسكەري قىزمەتكە شاقىرۋ اياقتالدى، دەپ حابارلادى ق ر قورعانىس مينيسترلىگىنىڭ باسپا ءسوز قىزمەتى.

اعىمداعى جىلعى ءساۋىردىڭ 13 ى مەن ماۋسىمنىڭ 30 ى ارالىعىندا قازاقستان رەسپۋبليكاسىنىڭ قارۋلى كۇشتەرىنە، باسقا دا اسكەرلەرى مەن اسكەري قۇرالىمدارىنا كەيىنگە شاقىرىلۋعا نەمەسە شاقىرىلۋدان بوساتىلۋعا قۇقىعى جوق شاقىرىلىم جاسىنداعى 15000 عا جۋىق ازامات شاقىرىلدى.

2016 -جىلدىڭ كوكتەمگى شاقىرۋ ناۋقانىن اياقتاپ، جەرگىلىكتى اسكەري باسقارۋ ورگاندارى 10 شىلدەدەن باستاپ 2016 -جىلدىڭ كۇزىندە مەرزىمدى اسكەري قىزمەتكە شاقىرىلۋعا جاتاتىن شاقىرىلۋشىلاردى الدىن الا زەردەلەۋگە كىرىسەدى.

زەردەلەۋ شاقىرىلۋشىمەن، ونىڭ اتا- اناسىمەن، سونداي-اق شاقىرىلۋشى جۇمىس جاساپ نەمەسە وقىپ جۇرگەن كاسىپورىن نەمەسە وقۋ ورنىنىڭ اكىمشىلىگى وكىلدەرىمەن جەكە اڭگىمەلەسۋ ارقىلى جۇرگىزىلەدى. جەكە اڭگىمەلەسۋ بارىسىندا شاقىرىلۋشىنىڭ مورالدىق جانە ىسكەرلىك قاسيەتتەرى، دەنساۋلىق جاعدايى، دەنە تۇرعىسىنداعى دامۋى، جالپى ءبىلىمى مەن ارنايى دايىندىعى، وتباسى جاعدايى تۋرالى ماعلۇماتتار ناقتىلانادى. سونداي- اق، شاقىرۋ مەن اسكەري قىزمەت وتكەرۋ ءتارتىبىن رەتتەيتىن زاڭناما تالاپتارى جەتكىزىلەدى.

شاقىرىلۋشىلاردى ساپالى تۇردە زەردەلەۋ ءۇشىن ۇلتتىق قاۋىپسىزدىك كوميتەتى، ىشكى ىستەر ورگاندارى، احاج، دەنساۋلىق ساقتاۋ جانە حالىقتى الەۋمەتتىك قورعاۋ ورگاندارىنىڭ وكىلدەرىمەن جۇمىس جۇرگىزىلەتىنىن ايتا كەتەيىك.

ازاماتتاردى شاقىرۋ «اسكەري قىزمەت پەن اسكەري قىزمەتشىلەردىڭ مارتەبەسى تۋرالى» قر زاڭى، سونىمەن قاتار، «اسكەري قىزمەتتىڭ بەلگىلەنگەن مەرزىمىن وتكەرگەن مەرزىمدى اسكەري قىزمەتتەگى اسكەري قىزمەتشىلەردى زاپاسقا شىعارۋ جانە 2016 -جىلدىڭ ءساۋىر- ماۋسىم جانە قازان- جەلتوقسان ايلارىندا مەرزىمدى اسكەري قىزمەتكە ق ر ازاماتتارىنىڭ كەزەكتى شاقىرىلۋى تۋرالى» ق ر پرەزيدەنتىنىڭ جارلىعى نەگىزىندە ۇيىمداستىرىلىپ، وتكىزىلدى.