قازاقستان قوسپاسىز، حيمياسىز ەكولوگيالىق تازا ءونىم شىعاراتىن ەل رەتىندە الەمدى جاۋلاۋى كەرەك - ن. نازاربايەۆ
بۇگىن استانادا «قازاقستان رەسپۋبليكاسىنىڭ يندۋستريالدى-يننوۆاتسيالىق دامۋىنىڭ مەملەكەتتىك باعدارلاماسى: 2016-جىلدىڭ I جارتىجىلدىق قورىتىندىسى» اتتى كەڭەستى اشقان مەملەكەت باسشىسى نۇرسۇلتان نازاربايەۆ وسىلاي مالىمدەدى.
مەملەكەت باسشىسىنىڭ ايتۋىنشا، قازاقستاننىڭ نەگىزگى ەكسپورتىنداعى بيرجا تاۋارلارىنا باعانىڭ تومەندەۋى جاعدايىندا ەكىنشى جانە بالاما ەكونوميكا، وڭدەۋشى ونەركاسىپ اسا ماڭىزدى ءرول اتقارادى.
«يندۋستريالاندىرۋ - بۇل تەك جاڭا باعدارلاما عانا ەمەس، بۇل جاڭا جۇمىس ورىندارى، تاۋارلار تەحنولوگياسى. بۇگىن وسىندا قويىلعان كورمەدەگى ونىمدەر ءبىزدىڭ وسى جىلدار ىشىندە جەتكەن جەتىستىكتەرىمىزدى پاش ەتىپ وتىر. مەنى اسىرەسە جەڭىل ونەركاسىپ تاۋارلارى، ۇساق وندىرىستەر، بالالار ويىنشىقتارىنىڭ، كيىمدەردىڭ وزىمىزدەن شىعا باستاعانى قۋانتادى. «قازاقستاندا جاسالعان» برەندىمەن شىعا باستاعان تاۋارلار نارىقتى جاۋلاي باستادى»، - دەدى ەلباسى.
بۇل رەتتە پرەزيدەنت اسىرەسە اگرارلىق كەشەن سالاسىنداعى جەتىستىكتەردى ەرەكشە اتاپ ءوتتى. ەلباسىنىڭ ايتۋىنشا، بۇگىن اۋىل شارۋاشىلىعى سالاسىندا ادامدارعا قاجەتتىنىڭ ءبارى ەلىمىزدە شىعارىلادى. الايدا، ولاردىڭ اۋقىمى ءالى دە ءتيىستى دەڭگەيدە ەمەس. «ارينە، بۇل - ۋاقىتتىڭ ەنشىسىندەگى ماسەلە. ءبىز اگروونەركاسىپ كەشەنىنە ۇلكەن ءمان بەرەمىز. ءبىز الەم اراسىندا قازاقستاندا شىعارىلعان ورگانيكالىق تازا ونىمدەرمەن ەرەكشەلەنۋىمىز كەرەك. قازاقستان قوسپاسىز، حيمياسىز، ەكولوگيالىق تازا ءونىم شىعاراتىن ەل رەتىندە الەمدى جاۋلاۋى كەرەك. وسى باعىتتاعى جۇمىستى جالعاستىراتىن بولامىز»، - دەدى ن. نازاربايەۆ.
«تۇتاستاي العاندا، يندۋستريالاندىرۋ جىلدارىندا ءبىز بۇعان دەيىن قازاقستاندا ەشقاشان شىعارماعان، مۇلدەم جاڭا 500 دەن استام ءونىم شىعارا باستادىق. ءبىز ءتورتىنشى ونەركاسىپتىك رەۆوليۋتسيانىڭ ءجۇرىپ جاتقانىن بىلەمىز، ياعني، الەمدىك ەكونوميكا جاڭا كەزەڭگە بەت الدى. جاڭا يننوۆاتسيالىق عىلىمي-تەحنيكالىق بۇيىمدار جاسالۋدا. ءبىز وسى جاڭالىققا، وسى قاتەرلەرگە ءازىر بولۋعا ءتيىسپىز. جاڭا يندۋستريالاندىرۋ اياسىندا جاڭا جاھاندىق شىنايىلىقتى ەسكەرۋگە ءتيىسپىز. بۇل ايتۋعا وڭاي، ىسكە اسىرۋ كۇردەلى. ويتكەنى، قازاقستاننىڭ بازاسى يننوۆاتسيالىق ونىمگە دايىندىعى ءالسىز. دەگەنمەن، بىلىكتى ماماندار ارقىلى ءبىز دىتتەگەن جەتىستىكتى باعىندىرا الامىز»، - دەدى ن. نازاربايەۆ.
اۆتور: قانات مامەتقازى ۇلى