قىزعانىش سەزىمى قانشالىقتى ورىندى؟
ءبىرى «ماحاببات قىزعانىشسىز بولمايدى»، «جۇبىن شىن سۇيەتىن جان قىزعانادى» دەسە، ەندى ءبىرى قىزعانىشتى جازىلماس دەرتكە، ۇرىس باستايتىن ورتكە بالايدى.
- سۇيىكتىڭنىڭ سەزىمى جەتكىلىكسىز بولىپ، باسقاعا كوبىرەك بولىپ كەتتى-اۋ دەگەندە تۋاتىن جاعىمسىدىق.
- تەك «مەن» دەپ وسكەن ادام جاقىن ادامىن باسقالارمەن بولىسكىسى كەلمەگەندە تۋاتىن سەزىم.
- جۇبىنا وزگەلەر كوز سالعاندا تۋاتىن، سىڭارىنا ۇنايتىن، جاعىمدى سەزىم.
- كەز كەلگەن جاعدايعا ۇرىس تۋعىزۋعا سەبەپ بولاتىن ورىنسىز سەزىم.
وسىنىڭ بارلىعى قىزعانىش ۇعىمىن اشا الادى. ءىلياس ەسەنبەرلين «قىزعانشاقتىق - كەڭ دۇنيەنى تار ەتەتىن كەسەل. ول ادامدى ىشتەن جەگىدەي جەيدى. ءبىر كەزدەگى دەنەلى، سالماقتى جاس جىگىت، ەندى كۇجىرەگەن، قاس- قاباعى تۇنەرگەن، اشۋلى كىسىگە اينالادى» دەسە، ءجۇسىپ بالاساعۇن «قىزعانىش قايدا بولسا، ۇرىس سول جەردە» دەيدى. ونىڭ جاعىمدى دا، جاعىمسىز دا جاقتارى بولاتىنى بەلگىلى. قاي نارسەنى دە ورنىمەن ورىنداسا، جايسىزدىق تۋدىرماس.
سۇيگەنىڭدى قانشالىقتى جاقسى كورسەڭ دە، وعان قىزعانعانىڭدى بىلدىرمەگەن ءجون. ءار باسقان قادامىن اڭدىپ وتىرساڭ، كۇماندانا بەرەسىڭ. شايتاننىڭ ازعىرۋىنا ءتۇسىپ، بويىڭدى جامان ويلار بيلەيدى.
قىزعانىش كەيدە ءتاتتى سەزىم. وت شىعارماي ويناپ، اراسىندا قىزعاندىرىپ، قىزعانۋدا تۇرعان ەشتەڭە جوق. ءبىراق قىزعانۋ دەگەن الەۋمەتتىك جەلىدە كىممەن نە دەپ سويلەسكەنىن باقىلاپ، ءار قىزعا باسقان لايك ءۇشىن جازعىرىپ، داۋ تۋعىزۋ ەمەس.
جىگىتتەر قىزىنىڭ جابىق كيىنۋىن قاداعالاپ، سۇقتانعان سىرت كوزدەن ساقتاۋ ارقىلى قىزعانۋى ءتيىس. قىزدار بار ماحابباتى مەن مەيىرىمىن تەك وزىنەن توگىپ، جات قۇشاقتى اڭساماۋىنا جاعداي جاساپ قىزعانعانى ءجون.
«قايدا بولدىڭ؟»، «ول نەگە ساعان قاراپ كۇلدى؟»، «بەتىنەن نەگە ءسۇيدىڭ؟»، «ءتۇن ىشىندە تاۋسىلمايتىن نە جۇمىس؟» دەگەن مازاسىز مىلجىڭ سۇراق ورنىنا «ساعان سەنەمىن» دەگەن سالماقتى ءسوزدى موينىنا ارتىپ قويعان ابزال. باسقا جاققا قارايىن دەسە دە، قورعاسىنداي اۋىر جاۋاپكەرشىلىك جان-جاققا مويىن بۇرعىزبايدى. ماحابباتاعى پاراساتتىلىق وسى قاسيەتپەن ولشەنبەك.
الەمدەگى ەڭ قىزعانشاق جان بولساڭىز دا، ونداي تەنتەك سەزىمدى تاسادا ۇستاڭىز.