التىنشى سايلانعان پارلامەنتتىڭ ءبىرىنشى سەسسياسى ءۇش اي عانا جۇمىس ىستەدى - ن. نىعماتۋلين

استانا. قازاقپارات - التىنشى سايلانعان پارلامەنتتىڭ ءبىرىنشى سەسسياسى ءۇش اي عانا جۇمىس ىستەسە دە، ەلىمىزدە ماڭىزدى شەشىمدى قابىلداۋدى قاجەت ەتەتىن كوپتەگەن ەلەۋلى وقيعالار ورىن الدى. بۇل تۋرالى بۇگىن پالاتالاردىڭ بىرلەسكەن وتىرىسىندا ق ر پارلامەنتى ءماجىلىسىنىڭ سپيكەرى نۇرلان نىعماتۋلين ءمالىم ەتتى.

«قاسيەتتى وتانىمىز قازاقستانىمىزدىڭ تاۋەلسىزدىك العانىنا بيىل 25 جىل تولادى. بۇل جىلداردىڭ ءاربىر كۇنى، ءاربىر ايى، ءاربىر جىلى ءبىز ءۇشىن وتە ماڭىزدى، وتە باعالى. وسى ۋاقىتتىڭ ىشىندە ءوزىمىزدىڭ قازاقستاندىق دامۋ جولىن قالىپتاستىرىپ، بۇكىل الەم تانىعان ابىرويلى، بەدەلدى جانە وتە ىقپالدى مەملەكەتكە اينالدىق. بۇل، ەڭ الدىمەن، تۇڭعىش پرەزيدەنتىمىز نۇرسۇلتان ءابىش ۇلى نازاربايەۆتىڭ ەرەن ەڭبەگىنىڭ، سونىمەن بىرگە ءارقاشان پرەزيدەنتىمىزگە تىرەك بولىپ، قولداۋ بىلدىرگەن حالقىمىزدىڭ بەرەكە- بىرلىگىنىڭ جەمىسى»، - دەپ توقتالدى ن. نىعماتۋلين.

سونىمەن قاتار ول وسى ۇلكەن جولدا تاۋەلسىز تاريحىمەن بىرگە كەلە جاتقان پارلامەنت تە ەلىمىز دامۋىنا قوسىپ جاتقان ۇلەسى وتە زور ەكەنىن اتاپ ءوتتى. «قۇرمەتتى دەپۋتاتتار! بارشاڭىز جاقسى بىلەسىزدەر، التىنشى سايلانعان پارلامەنتتىڭ ءبىرىنشى سەسسياسى ءۇش اي عانا جۇمىس ىستەدى. ءبىراق تا از عانا ۋاقىت بولسا دا، ەلىمىزدە ماڭىزدى شەشىمدى قابىلداۋدى قاجەت ەتەتىن كوپتەگەن ەلەۋلى وقيعالار ورىن الدى»، - دەدى ءماجىلىس سپيكەرى.

اتاپ ايتقاندا، سەسسيا ىشىندە پارلامەنت پالاتالارىنىڭ ءۇش بىرلەسكەن وتىرىسى، ءماجىلىستىڭ 12 جالپى وتىرىسى، 3 «ۇكىمەت ساعاتى»، تۇراقتى كوميتەتتەردىڭ 109 وتىرىسى، زاڭ جوبالارى بويىنشا جۇمىس توپتارىنىڭ 160 وتىرىسى، 7 «دوڭگەلەك ۇستەل»، كوميتتەردىڭ 3 كوشپەلى وتىرىسى وتكىزىلدى.

اۆتور: رۋسلان عابباسوۆ