برازيليا بيلىگى ريو-دە-جانەيروداعى وليمپيادا قوناقتارىنىڭ قاۋىپسىزدىگىن قامتاماسىز ەتۋگە ءسوز بەردى

استانا. قازاقپارات - برازيليا بيلىگى ريو-دە-جانەيروداعى وليمپيادا ويىندارىنا كەلەتىن سپورتشىلار مەن جانكۇيەرلەردىڭ قاۋىپسىزدىگىن قامتاماسىز ەتۋگە دايىن.

بۇل تۋرالى باسپا ءسوز ءماسليحاتىندا برازيليانىڭ ادىلەت مينيسترلىگى بۇقارالىق شارالاردى ۇيىمداستىرۋ دەپارتامەنتىنىڭ باسشىسى اندرەي اۋگۋستۋ پاسسۋس رودريگەس مالىمدەدى، دەپ حابارلادى ت ا س س.

«قاۋىپسىزدىكتى قامتاماسىز ەتۋ جاعىنان وليمپيادا ويىندارىن وتكىزۋگە دايىن ەكەنىمىزگە سەنىمدىمىن، - دەدى رودريگەس. - قوسىمشا پوليتسەيلەردى تارتۋ جانە قارۋلى كۇشتەردىڭ ىقپالداسۋىمەن ءتارتىپتى قامتاماسىز ەتەمىز».

شەنەۋنىك جارىس كەزىندە ريو-دە-جانەيرودا قاۋىپسىزدىكتى 85 مىڭ ادام، ياعني 47 مىڭ پوليتسەي مەن 38 مىڭ اسكەري قىزمەتشى قامتاماسىز ەتەتىنىن ەسكە سالدى. سونىمەن قاتار، رودريگەس وليمپيادا الدىندا برازيليا بيلىگى تەرروريزمگە قارسى ارنايى ورتالىق اشقانىن ايتتى. ونىڭ جۇمىسىنا برازيليالىقتارمەن قاتار جەتى ەلدىڭ - ارگەنتينا، پاراگۆاي، بەلگيا، ۇلى بريتانيا، فرانسيا، يسپانيا جانە ا ق ش ماماندارى قاتىسۋدا.

XXXI جىلدىق وليمپيادا 2016-جىلى 5-21- تامىز ارالىعىندا وتەدى. بۇل وڭتۇستىك امەريكادا ۇيىمداستىرىلعان العاشقى وليمپيادا ويىندارى بولماق. پاراليمپيادا 7- 18- قىركۇيەك ارالىعىندا وتەدى.