ن. نازاربايەۆ دونور بولۋعا تىلەك بىلدىرگەن اسكەري قىزمەتشىلەرگە العىس ءبىلدىردى

وسكەمەن. قازاقپارات - وسكەمەندە جاڭا قان ورتالىعىنا بارعان قازاقستان پرەزيدەنتى نۇرسۇلتان نازاربايەۆ وسى كۇنى دونور رەتىندە قان تاپسىرعان اسكەري قىزمەتشىلەرمەن كەزدەستى.

ن. نازاربايەۆ اسكەري قىزمەتشىلەر قان تاپسىرعاننان كەيىن دەمالىس زالىندا ولپارمەن اڭگىمەلەستى.

لەيتەنانت ولجاس ابەنوۆتىڭ باسشىلىعىمەن 27943- اسكەري ءبولىمنىڭ قاتارداعى ساربازدارى مەملەكەت باسشىسىنا كەز كەلگەن ساتتە وتانىن قورعاۋعا، ەگەر قاجەت بولسا، وتان ءۇشىن جان بەرۋگە ءازىر ەكەندىكتەرىن ايتتى.

«بۇل دۇرىس، الايدا دەنساۋلىقتارىڭدى ساقتاۋ قاجەت. قازىردىڭ وزىندە قان تاپسىرىپ، تالاي ناۋقاستىڭ ءومىرىن ساقتاپ قالىپ وتىرسىڭدار، - دەپ اتاپ ءوتتى نۇرسۇلتان ءابىش ۇلى. جاس اسكەري قىزمەتشىلەرمەن اشىق اڭگىمە بارىسىندا اقتوبەدەگى وقيعا دا ءسوز بولدى. قازاقستان پرەزيدەنتى ەش جازىعى جوق مىڭداعان بەيبىت تۇرعىنداردىڭ قازاسىنا سەبەپ بولىپ وتىرعان كۇللى الەمدەگى ماعىناسىز قارۋلى سوعىس جايلى ەسكەرتىپ ءوتتى.

«قازاقستانعا تىنىشتىق پەن بەيبىت ءومىر كەرەك. ەلدىڭ تىنىشتىعىن بۇزاتىن كەل كەلگەن لاڭكەستىڭ كوزىن اياۋسىز جوياتىن بولامىز. ءبىزدىڭ اسكەر تۇراقتىلىقتى قورعايدى».

مەملەكەت باسشىسى جىگىتتەرگە، ولاردىڭ اتا-انالارى مەن وتباسىلارىنا مىقتى دەنساۋلىق تىلەدى.

ەسكە سالساق، بۇگىن ساپارى اياسىندا قازاقستان پرەزيدەنتى جۇمىسىمەن تانىسقان وبلىستىق قان ورتالىعى بىرنەشە اي بۇرىن پايدالانۋعا ەنگىزىلگەن. ول پرەزيدەنتتىڭ «100 مەكتەپ، 100 اۋرۋحانا» باعدارلاماسى اياسىندا سالىندى.

ش ق و قان ورتالىعى ەلىمىزدىڭ ەڭ زاماناۋي قان ورتالىعىنىڭ ۇشتىگىنە ەندى. جوبانىڭ سمەتالىق قۇنى 3,6 ميلليارد تەڭگە. ونىڭ جارتىسى الەمدىك دەڭگەيدەگى زاماناۋي مەديتسينالىق جابدىقتى ساتىپ الۋعا، ورناتۋعا جۇمسالدى. قۋاتى - جىلىنا 25000 ليتر قان. جوعارى تەحنولوگيالىق جابدىق قاننىڭ بارىنشا كەڭ كومپونەنتتەر سپەكترىن الۋعا مۇمكىندىك بەرەدى.

ورتالىقتا قىزمەتكەرلەر سانى - 236. جەتەكشى ماماندار ا ق ش، رەسەي، يزرايل، گەرمانيا جەتەكشى قان بانكتەرىندە تاعىلىمدامادان ءوتتى.

قىسقا ۋاقىتتا جاڭا ورتالىقتىڭ جۇمىسى كەزىندە دونور قانى 4,7 مىڭنان استام ادامنىڭ ءومىرىن ساقتاۋعا جاردەمدەستى.