ەلورداداعى «جەرۇيىق» پاركىندە قىمىزمۇرىندىق وتەدى

استانا. قازاقپارات - ەلوردا كۇنىن مەرەكەلەۋ اياسىندا «جەرۇيىق» پاركىندە قازاق اۋىلى تىگىلەدى.

5- جانە 6- شىلدەدە العاش رەت ۇلى دالا حالقىنىڭ باستى سۋسىنى - قىمىزعا ارنالعان «قىمىزمۇرىندىق» حالىقارالىق ەتنوگرافيالىق فەستيۆالى وتكىزىلەدى، دەپ حابارلايدى قالالىق اكىمدىكتىڭ باسپا ءسوز قىزمەتى.

قالادا 1992-جىلدان باستاپ وتكىزىلىپ كەلگەن بۇگىنگى ەتنوگرافيالىق مەرەكەنىڭ تاقىرىبى قر تاۋەلسىزدىگىنىڭ 25 جىلدىعى مەن «ەكسپو-2017» كورمەسى بولماق. ونى وتكىزۋ يدەياسى ەلىمىزدىڭ وزگە وڭىرلەرىندە دە قولداۋ تاپتى - الماتى، پاۆلودار، تاراز، شىمكەنت جانە ت. ب. قالالاردا.

بىرنەشە كۇن بويى كوك شالعىندا ۇلتتىق ناقىشتا بەزەندىرىلگەن 10 كيىز ءۇي تىگىلەدى. مول داستارحان جايىلىپ، كوپشىلىككە ۇلتتىق تاعامدار - قۇرت، باۋىرساق، جەنت، ىرىمشىك، شۇبات پەن قىمىز ۇسىنىلادى. بۇدان باسقا، قوناقتار ساماۋىرىننان قۇيىلعان حوش ءيىستى شاي ىشەدى. ال كىرە بەرىستە قولدانبالى ونەر كورمەسى كوپشىلىكتىڭ نازارىنا ۇسىنىلادى. سونىمەن قاتار، ەتنواۋىلدا التىباقاندار ورناتىلىپ، جىگىتتەر مەن قىزدار، ساۋىق- سايران قۇرىپ، ءان ايتادى. جاقىن ماڭدا باتىرلار مەن بالۋاندار كۇش سىناسىپ، شەبەرلىك بايقاسادى.

فەستيۆالدىڭ اشىلۋىندا قىمىزدى ماداقتاۋعا ارنالعان تەاترلاندىرىلعان قويىلىم، قاتىسۋشىلار شەرۋى، ءبي مەن ايتىس وتەدى.

مۇنىمەن قوسا، كەلۋشىلەر شارا بارىسىندا قىمىز تۋرالى ءبىلىمىن تەكسەرىپ، قىمىز ىشۋدەن جارىسادى، ارمرەستلينگ، ارقان تارتۋ جانە ت. ب. سايىستاردا كۇش سىناسادى.

ەجەلدەن دالا حالقى جازدا بيە ساۋىپ، قىمىز اشىتقان. بۇل ايتۋلى شاراعا اۋىلدىڭ التى اۋىزى، تۋعان-تۋىستار، كورشى-قولاڭ، دوس جاراندار شاقىرىلعان. جازداعى العاشقى سۋسىننان ءدام تاتقىزۋ جانە مولشىلىقتىڭ بەلگىسى رەتىندە قاسيەتتى سۋسىندى جەرگە توگۋ قازاقتار ءۇشىن تۇتاستاي ءبىر سالت-جورا. ۇيىمداستىرۋشىلار فەستيۆال بارىسىندا وسى ءداستۇردى جاڭعىرتپاق نيەتتە. شاراعا قازاقستاننان باسقا، قىرعىزستان، ومبى، قالماق، التاي ايماعى، ءنوۆوسىبىر، ياكۋتيا، زابايكالە ايماعى، بۋرياتيادان كەلگەن شەبەرلەر قاتىسادى.

ەتنواۋىل قوناقتارى قىمىز ءىشۋ ءراسىمىن جانە ياكۋتيالىق قالىڭدىقتى كيىندىرۋ جوراسىن، زابايكالە ايماعىنىڭ وكىلى جالسانوۆا داريمانىڭ اتتىڭ قىلىنان جاساعان ۇلگىلەر كوللەكتسياسىنىڭ، ەۋرازيالىق ديزاينەرلەر وداعىنىڭ مۇشەسى، قازاقستاندىق قايروللا ابىشيەۆتىڭ كوللەكتسياسىنىڭ، شاداپوۆا حاندانىڭ «بايكال مارجاندارى» كوستيۋمدەر كوللەكتسياسىنىڭ كورسەتىلىمىن جانە ت. ب. تاماشالايدى. مەرەكە كۇندەرى «التىن دالا داۋىسى» بۇكىلرەسەيلىك بايقاۋىنىڭ لاۋرەاتى، سوزىلىڭقى قالماق اندەرىن ورىنداۋشى ەۆرەنا ورگايەۆا، ناعىز التاي حومۋسىندا وينايتىن يگناتيەۆ ۆيكتور ۆيكتوروۆيچ استاناعا ارنايى ات باسىن تىرەيدى.

قىمىز جاساۋ مەن ونى ساقتاۋ تۋرالى بىلگىسى كەلەتىندەر، سونداي-اق، ۇلتتىق قۋىرشاقتار جاساۋدى، توقۋ مەن تىگۋدى ۇيرەنۋگە نيەتتى جاندار شەبەرلىك دارىستەرىنە قاتىسا الادى.

سونىمەن قاتار، فەستيۆال قىمىز جاساۋ مەن ءوندىرۋ، قولدانبالى قولونەر بويىنشا جاس دارىندى شەبەرلەر، سۋرەتشىلەر مەن مودەلەرلەر ءۇشىن جاقسى الاڭعا اينالىپ، ءوزىن- ءوزى تانىستىرۋعا مۇمكىندىك بەرەدى.