باس پروكۋراتۋرا تۇسىككە قىلمىستىق جاۋاپكەرشىلىك ەنگىزىپ، جاس جۇبايلاردى ترەنينگتەن وتكىزۋدى ۇسىنادى

استانا. قازاقپارات - باس پروكۋراتۋرا تۇسىك جاساۋعا ماجبۇرلەگەندەرگە قىلمىستىق جاۋاپكەرشىلىك ەنگىزۋدى ۇسىنادى.

بۇگىن تۇرمىستىق زورلىق- زومبىلىق پروفيلاكتيكاسىنا ارنالعان ۆەدومستۆوارالىق كەڭەستە ق ر باس پروكۋرورى جاقىپ اسانوۆ وسىلاي ءمالىم ەتتى.

«تۇسىك جاساۋعا ماجبۇرلەگەنى ءۇشىن قىلمىستىق جاۋاپكەرشىلىك ەنگىزۋ قاجەت. سەبەبى، بۇل قىز بالانىڭ دەنساۋلىعىنا زور قاتەر، ال ءقازىر ول ءۇشىن ەشكىم جاۋاپ بەرمەيدى. بۇل نورما ەۋرووداقتىڭ كونۆەنتسياسىندا بار، ونى ءبىزدىڭ زاڭناماعا ەنگىزسەك»، - دەدى ج. اسانوۆ. بۇدان باسقا، باس پروكۋرور نەكە جانە وتباسى تۋرالى كودەكسكە دە وزگەرىستەر ەنگىزۋدى ۇسىنادى.

«وتكەن جىلى قازاقستاندا 149 مىڭ نەكە تىركەلسە، 53 مىڭى بۇزىلعان. بۇل - ءاربىر ءۇشىنشى وتباسى. سوتتار وتكەن جىلى 60 مىڭداي داۋ قاراعان ەكەن. ول ازاماتتىق ىستەردىڭ 15 پايىزى. نە ىستەۋ كەرەك؟ بىرىنشىدەن، ۇيلەنۋگە ءوتىنىش بەرگەن كۇننەن باستاپ جاستار ارنايى ترەنينگتەن وتسە. ماقسات - ەكى جاقتى ەرەسەك ومىرگە دايىنداۋ، داۋلاردى شەشۋگە ۇيرەتۋ. ساۋد ارابياسىنىڭ ءوزى اجىراسۋلاردى ازايتۋ ءۇشىن وسىنداي دايىندىق كۋرستارىن ەنگىزبەكشى ەكەن. مالايزيا دا سولاي ىستەمەكشى. ەكىنشىدەن، ۇيلەنەمىن دەگەن جاستارعا ارنايى كىتاپشا ۇسىنساق. مۇندا ۇلتتىق داستۇردەگى وتباسى قۇندىلىقتارىن ساقتاۋ، ءبىر- بىرىنە قۇرمەتپەن قاراپ، تۋىنداعان داۋلاردى اقىلمەن شەشۋ جايى قامتىلسا»، - دەدى باس پروكۋرور. ونىڭ ايتۋىنشا، اتالعان كىتاپشادا اجىراسۋ ستاتيستيكاسى، ەكى جاقتىڭ قۇقىقتارى مەن مىندەتتەرى، اكىمشىلىك جانە قىلمىستىق جاۋاپكەرشىلىگى، مۇلىكتى ءبولۋ ءتارتىبى، كۇش قولدانباۋ جونىندە اقىل- كەڭەستەر جازىلعانى ءجون.

«ۇلتتىق كوميسسيا باستاماسىمەن كاسىبي پسيحولوگتاردى، وتباسى ينستيتۋتىن زەرتتەۋشى عالىمداردى ۇيىمداستىرا وتىرىپ، وسىنداي كىتاپشانى حالىققا تۇسىنىكتى، قاراپايىم تىلمەن جازىپ شىعۋدى ۇسىنامىن. ال، باس پروكۋراتۋرا بولسا، بار اقپاراتتى بەرۋگە دايىن. ۇشىنشىدەن، پسيحولوگ- مەدياتور فيگۋراسىن ەنگىزۋ. اجىراسامىن دەگەندەرگە زاڭ ويلانۋعا ءبىر-اق اي ۋاقىت بەرەدى. وسى جەردە ەكى جاقتى بىتىمگە شاقىرۋ ءۇشىن پسيحولوگتىڭ كومەگى اسا قاجەت»، - دەدى ج. اسانوۆ.

اۆتور: قانات مامەتقازى ۇلى