باس پروكۋرور تۇرمىستاعى زورلىق-زومبىلىققا قاتىستى ءبىرقاتار ۇسىنىستار جاسادى

استانا. قازاقپارات - بۇگىن تۇرمىستىق زورلىق- زومبىلىق پروفيلاكتيكاسىنا ارنالعان ۆەدومستۆو ارالىق كەڭەستە ق ر باس پروكۋرورى جاقىپ اسانوۆ ءبىرقاتار ۇسىنىستاردى العا تارتتى.

«قىلمىستىق كودەكس بويىنشا بۇرىن ۇرىپ-سوقسا نەمەسە دەنساۋلىققا جەڭىل زيان كەلتىرسە، وندا پوليتسيا ءبىر- ەكى كۇندە پروتوكول تولتىرىپ، سوت 24 ساعاتتا شەشىم شىعاراتىن. 2 جىل بۇرىن بۇل ارەكەتتەردى اكىمشىلىك كودەكستەن قىلمىستىق كودەكسكە اۋىستىردىق. نە وزگەردى؟ زورلىق- زومبىلىق بولعانىن جابىرلەنۋشى ەندى ءوزى دالەلدەۋى ءتيىس. سوتقا جۇگىنۋ، ەكسپەرتيزا ءوتۋ، كۋالەردى ىزدەۋ، قاجەتتى قاعازداردى جيناۋ، ادۆوكات جالداۋ - مۇنىڭ ءبارى جابىرلەنۋشىنىڭ ءوز موينىنا ارتىلدى. بۇل مىندەتتەن پوليتسيانى تولىق بوساتتىق. اشىعىن ايتساق، جازانى كۇشەيتەمىز دەپ، كەرىسىنشە، ءبۇلدىرىپ العان سياقتىمىز»، - دەيدى باس پروكۋرور.

ونىڭ كەلتىرگەن مالىمەتىنە قاراعاندا، وتكەن جىلى ۇرىپ- سوعۋ جانە دەنساۋلىققا جەڭىل زيان كەلتىرۋ بويىنشا بار بولعانى 627 ادام سوتتالعان. بۇل 2014- جىلعا قاراعاندا 37 ەسە از. الايدا باس پروكۋرور «شىن مانىندە زومبىلىق كەمىگەن جوق، ونى دالەلدەۋ قيىنداپ كەتكەن سوڭ جۇرت سوتقا جۇگىنۋدى قويعان» دەگەن پىكىردى العا تارتتى. وسىعان وراي، باس پروكۋرور ۇرىپ- سوعۋ مەن دەنساۋلىققا جەڭىل زياندى اكىمشىلىك كودەكسكە قايتارۋ كەرەكتىگىن ايتادى. ايتپەسە، زومبىلىق جاساسام، مەنى ەشكىم جاۋاپقا تارتپايدى دەگەن تۇسىنىك قالىپتاسىپ كەلە جاتىر.

«ەكىنشىدەن، قىلمىستىق كودەكستە وزىنە-ءوزى قول جۇمساۋعا جەتكىزگەنى ءۇشىن جاۋاپكەرشىلىك كوزدەلگەن. ءبىراق، كىمدى ولىمگە جەتكىزدىڭ - ەرەسەك ادامدى ما، الدە بالانى ما، ول جاعى اجىراتىلماعان. جازا بارلىعىنا بىردەي. بۇل دۇرىس ەمەس. كەلەشەگى الدا، وي- ساناسى تولىق بەكىمەگەن بالانى ولىمگە جەتكىزسە، نەگە جازا بىردەي بولۋى كەرەك؟ كەرىسىنشە، ونى قاتايتۋعا ءتيىسپىز. سوندىقتان وسى باپتا بالاعا قاتىستى ارنايى جازا بەلگىلەۋدى ۇسىنامىز»، - دەدى ول.

اۆتور: قانات مامەتقازى ۇلى