زومبىلىق - جەكە پروبلەما ەمەس، ول قوعامدىق ماسەلە - باس پروكۋرور

استانا. قازاقپارات - زومبىلىق - جەكە پروبلەما ەمەس، ول قوعامدىق ماسەلە.

بۇگىن تۇرمىستىق زورلىق- زومبىلىق پروفيلاكتيكاسىنا ارنالعان ۆەدومستۆوارالىق كەڭەستە ق ر باس پروكۋرورى جاقىپ اسانوۆ وسىنداي پىكىر ءبىلدىردى.

جيىن بارىسىندا بايانداما جاساعان باس پروكۋرور ومىردەن بىرنەشە مىسال كەلتىردى. «كۇيەۋىم، قايناعام، اتام 11 جىل بويى ۇرىپ-سوقتى دەپ، شەمونايحادا ءبىر كەلىنشەك كىشكەنتاي ءۇش بالاسىن اسىپ ءولتىرىپ، ءوزى دە دارعا اسىلعان. تۇركىستاندا ءۇي يەسى 6 ادامدى - اناسىن، ايەلىن، 5 جاسار قىزى مەن ۇلىن، ەكى باۋىرىن ولتىرۋگە ۇمتىلعان. شەشەسى مەن ۇلى ءتىرى قالىپ، تورتەۋى قازا تاپتى. استانادا بۇرىنعى ايەلىنىڭ ۇستىنە بەنزين قۇيىپ، ورتەپ جىبەرگەن. كىشكەنتاي ءتورت بالا جەتىم قالدى. قىزىلوردانىڭ جوسالى كەنتىندە ايتقانىما كونبەدى دەپ، ايەلىن بايلاپ، اتپەن سۇيرەپ ولتىرگەن. ستاتيستيكا بويىنشا وتكەن جىلى ءۇي-جايلاردا 308 ادام كوز جۇمدى. بۇل جالپى كىسى ءولتىرۋدىڭ ۇشتەن ءبىرى»، - دەگەن باس پروكۋرور زورلىق- زومبىلىقتىڭ باسقا دا سوراقى تۇرلەرى كوپ ەكەنىن العا تارتتى.

ونىڭ ايتۋىنشا، تەك بيىلدىڭ وزىندە 316 ايەل وزىنە قول سالعان. ال، بۇگىندە تۇرمەدە 300 ايەل وتباسىنداعى جانجال كەزىندە ادام ولتىرگەنى ءۇشىن جازاسىن وتەۋدە. «قانشاما شاڭىراق شايقالىپ، ىرگە سوگىلدى، بالالار جەتىم قالدى. ەڭبەك ەتۋگە ەرىنىپ، ايەلىنىڭ تاپقان اقشاسىن ىشىمدىك پەن ەسىرتكىگە جۇمساپ، بالالارىن اش-جالاڭاش قۋىپ شىققان ازاماتتار از ەمەس. وتباسىنان بەزىنىپ، اليمەنت تولەۋدەن قاشىپ جۇرگەندەر قانشاما. وسىنداي جان تۇرشىگەتىن جاعدايلارعا نە سەبەپ؟ جالپى، بۇل ماسەلە ۇزاق جىلدار ايتىلماي كەلدى. الەۋمەتتىك پروبلەما رەتىندە قارالمادى. وتباسى ءار ادامنىڭ جەكە شارۋاسى دەگەن كوزقاراستى ۇستاندىق. جابۋلى قازان جابۋلى كۇيىندە قالسىن دەدىك. بۇل بۇرىننان كەلە جاتقان، قانىمىزعا سىڭگەن جامان دەرت»، - دەدى ج. اسانوۆ.

ونىڭ پىكىرىنشە، كوشەدەگى اگرەسسيانىڭ دا ءبىر ۇشى وتباسىنداعى جاعدايمەن بايلانىستى. ۇيدەن ىزامەن شىققان ادام ءوشىن وزگەدەن الادى. قوعامدىق جەردە، كولىكتە، كەزەكتە، ءتىپتى دەمالىس ساتتەرىندە دە جۇرت شىدامسىز، اشۋلى.

«زومبىلىق - جەكە پروبلەما ەمەس، ول قوعامدىق ماسەلە. جۇمىسسىزدىق، قىلمىستار، وزگە دە كەلەڭسىز جاعدايلار وتباسىنداعى احۋالعا تىكەلەي قاتىستى»، - دەدى باس پروكۋرور.

اۆتور: قانات مامەتقازى ۇلى