ماجار جاستارى قازاق ءتىلىن مەڭگەرۋگە جوعارى قىزىعۋشىلىق تانىتۋدا - ەلشى ن. رۇستەموۆ

استانا. قازاقپارات - ماجارستان مەن قازاقستان اراسىندا ستۋدەنتتەرمەن الماسۋ سانى ارتادى.

بۇل تۋرالى بۇگىن استانادا وتكەن باسپا ءسوز ءماسليحاتىندا قازاقستان رەسپۋبليكاسىنىڭ ۆەنگرياداعى، سەربياداعى، ماكەدونيا رەسپۋبليكاسىنداعى توتەنشە جانە وكىلەتتى ەلشىسى نۇرباح رۇستەموۆ ءمالىم ەتتى.

«ماجارلىق جاستار قازاق ءتىلىن مەڭگەرۋگە جوعارى قىزىعۋشىلىق تانىتۋدا. سەگەد ۋنيۆەرسيتەتىندە التاي تانۋ كافەدراسى بار، وسى وقۋ ورنىندا قازاق ءتىلى زەرتتەلۋدە. جاقىندا بۇل ەلدىڭ ازاماتشاسى PhD- دى قازاق تىلىندە قورعاپ شىقتى»، - دەدى ەلشى.

ن. رۇستەموۆتىڭ سوزىنە قاراعاندا، بۇگىندە ماجارستاندا ەلىمىزدەن 200 دەن استام ستۋدەنت ءبىلىم الۋدا، ونىڭ ىشىندە 45 ى ۇكىمەتارالىق كەلىسىم اياسىندا وقىپ جاتىر. اتاپ ايتقاندا، ءوزارا كەلىسىمگە وراي قازاقستاننان 45 ادام، سايكەسىنشە ماجارستاننان دا وسىنشاما ادام ءبىلىم الۋ ءتيىس.

«بۇگىندە ءبىلىم مينيسترلىگىندە كەلىسۋ كەزەڭىندە ستۋدەنتتەرمەن الماسۋدى 200 گە دەيىن جەتكىزۋ تۋرالى ۇسىنىمى جاتىر. وتكەن جىلى بۇل ۇسىنىستى ماجارستان پرەمەر- ءمينيسترى ۆ. وربان ەنگىزگەن ەدى. بيىلدىڭ وزىندە اتالعان 45 ورىنعا 300 دەن استام ءوتىنىم كەلىپ ءتۇستى، ياعني ءبىر ورىنعا توعىز ۇمىتكەرگە دەيىن بولدى»، - دەدى ول.

اۆتور: رۋسلان عابباسوۆ