شاڭحايداعى ەكسپو مۋزەيى قازاقستانمەن ارىپتەستىك ورناتۋعا دايىن
ونىڭ ايتۋىنشا، 2017-جىلعى حالىقارالىق كورمە الەمدەگى ەڭ جاس قالا استانانى الەمگە تانىتاتىن شارا بولادى، دەپ حابارلادى www.24.kz.
ال قازاقستاندا اشىلعان تىڭ جاڭالىقتاردى شاڭحايداعى EXPO جەتىستىكتەرى كورمەسى ارقىلى ناسيحاتتاۋعا دايىن. يۋي چجەنيۋي 2010-جىلى شاڭحايدا وتكەن EXPO- نىڭ باستى عيماراتىن ەندى قانداي ماقساتتا پايدالاناتىنىن تاپىشتەپ ءتۇسىندىرىپ جاتىر. ونىڭ سوزىنشە، كورمە وتەدى دە كەتەدى، ال قىرۋار قارجىعا سالىنعان نىسانداردى ماقساتتى تۇردە ءتيىمدى پايدالانۋ قاجەت. وسى رەتتە استانا كورمەسىنەن كەيىن باس عيماراتتى قارجى ورتالىعىنا بەرۋى وتە ۇتىمدى شەشىم دەيدى. 70 ميلليون ادام تاماشالاعان شاڭحاي كورمەسىنىڭ باسى-قاسىندا جۇرگەن بىلىكتى مامان قازاقستاندىق ۇيىمداستىرۋشىلارمەن ارىپتەستىك ورناتۋعا ءازىر.
«قازاقستان ءالى دە ءبىز ءۇشىن قۇپياسىن اشا قويماعان جانە كورۋگە اسىعاتىن ەل دەپ ويلايمىن. ەستۋىمشە، استانادا وتەتىن ەكسپو- عا قىتايلىق تۋريستەر كوبىرەك بارۋى مۇمكىن. ەڭ باستىسى وسى كورشى مەملەكەتتەردەن كەلەتىن ساياحاتتاۋشىلارعا بارىنشا جاقسى تانىستىرۋ جۇمىستارىن جۇرگىزۋ كەرەك. بۇل تۇرعىدا قازاقستاندىق ارىپتەستەرىمىزگە كومەكتەسۋگە ءارقاشان ءازىرمىز»، - دەپ اتاپ ءوتتى شاڭحاي ەكسپو مۋزەيى ديرەكتورىنىڭ ورىنباسارى يۋي چجەنيۋي.
سونىمەن قىتاي شاڭحاي كورمەسى وتەردە ۋاقىتشا جانە ۇزاق مەرزىمگە دەپ ەكى ءتۇرلى عيمارات تۇرعىزدى. توت باسقان بۇل تەمىر پاۆيلوندار تاياۋدا ءسۇرىلىپ تاستالماق. ال كورمەنىڭ اشىلۋ سالتاناتى وتكەن باستى عيماراتتى قازىر قايتا جوندەۋدەن وتكىزىپ جاتىر. مۇندا EXPO مۋزەيىنە ارنالعان ۇلكەن زال ورنالاسادى. جۇرت 2010-جىلعى شاڭحاي كورمەسىنە ساياحات جاساپ، ءتىپتى استانادا پاش ەتىلەتىن تىڭ جاڭالىقتارمەن تانىسىپ قالۋى مۇمكىن.
«عيماراتتى وسى جىلدىڭ اياعىندا قولدانىسقا بەرەمىز. مۇندا كەلۋشىلەر 2010-جىلعى EXPO - نى قايتا تاماشالاۋعا مۇمكىندىك الادى. سونىمەن قاتار 2017-جىلعى استانادا وتەتىن EXPO كورمەسىندە جاقسى قابىلدانعان ەكسپوناتتاردى دا وسى مۋزەيگە قويۋ جوسپارىمىزدا بار»، - دەيدى شاڭحاي كورمە قۇرىلىس جانە دامۋ جونىندەگى سەرىكتەستىك باستىعىنىڭ ورىنباسارى ۋ تسين.
شاڭحاي اكىمشىلىگى بۇدان بولەك EXPO- نىڭ شاعىن عيماراتتارىن حالىق دەمالاتىن ويىن-ساۋىق، ساۋدا ورتالىعىنا اينالدىرىپ جىبەرگەن. الايدا ۇزىندىعى ءبىر شاقىرىمعا دەيىن سوزىلىپ جاتقان كوشەدە ادام اياعى سيرەك. جەرگىلىكتى تۇرعىنداردىڭ ايتۋىنشا، كەشقۇرىم تۋريستەر قاپتايدى ەكەن.
«قازىر بۇندا ساۋدا ورتالىعى، كينوتەاتر، ءدامحانالار ورنالاسقان. دەمالىس كۇندەرى جۇرت وسى جەرگە جينالادى. مۇندا ءبارى بار. ال وڭ جاعىمداعى بۇل EXPO عيماراتى قازىر مادەني ورتالىققا اينالعان»، - دەيدى شاڭحاي قالاسىنىڭ تۇرعىنى گۋن مەيجە.
ەستەرىڭىزگە سالايىق، شاڭحاي كورمەسى 2010-جىلى 184 كۇن بويى ءوتتى. EXPO تاقىرىبى «جاقسى قالا - جاقسى ءومىر» دەپ اتالدى. قازاقستان بۇل كورمەگە «استانا -ەۋرازيا جۇرەگى» دەگەن تاقىرىپتا قاتىستى. شاراعا 198 مەملەكەت پەن 27 حالىقارالىق ۇيىم كەلگەن.