بەلگىلى عالىم وتەگەن كۇمىسبايەۆ ومىردەن وزدى
فيلولوگيا عىلىمىنىڭ دوكتورى، پروفەسسور، قازاقستان رەسپۋبليكاسى اۋىل شارۋاشىلىعى عىلىمدارى اكادەمياسى جانە گۋمانيتارلىق عىلىمدار اكادەمياسىنىڭ اكادەميگى وتەگەن كۇمىسبايەۆ قىزىلوردا وبلىسىنىڭ جالاعاش اۋدانىندا 1939-جىلى 20- مامىر كۇنى تۋعان.
قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن، ك س ر و عىلىم اكادەمياسىنىڭ شىعىس تانۋ ينستيتۋتىن جانە اسپيرانتۋراسىن بىتىرگەن. ەڭبەك جولىن اۋداندىق گازەتتە ادەبي قىزمەتكەردەن باستاپ، «ەگەمەن قازاقستان»، «قازاق ادەبيەتى» گازەتتەرىندە ادەبي قىزمەتكەر، ءبولىم مەڭگەرۋشىسى بولعان. ۇزاق جىلدار بويى ءال-فارابي اتىنداعى قازاق ۇلتتىق ۋنيۆەرسيتەتىندە ۇستازدىق قىزمەت اتقارعان.
ءو. كۇمىسبايەۆتىڭ 10 نان استام ولەڭ، اڭگىمە، پوۆەست، عىلىمي كىتاپتارى جارىق كوردى. ولەڭدەرى ورىس تىلىنە اۋدارىلىپ، ماسكەۋدە شىققان جيناقتاردا باسىلدى. پارسى- ءۇندى كلاسسيگى ءامىر حۇسراۋ دەحليەۆيدىڭ «جۇماقتىڭ سەگىز باعى» داستانىن ءتۇپ نۇسقاسىنان، سونداي-اق م. رىلسكيدىڭ «راۋشان مەن ءجۇزىم» ولەڭ-پوەمالارىن ءتارجىمالادى. عالىمنىڭ شىعىس ادەبيەتى مەن قازاق ادەبيەتىنىڭ ءوزارا بايلانىسىن زەرتتەۋگە ارنالعان «تەرەڭ تامىرلار»، «اباي مەن شىعىس»، «مۇحتار اۋەزوۆ جانە ادەبيەت الەمى» مونوگرافيالارى بار.