ەلوردالىق ءۇش مەكتەپ قازاقستاننىڭ ۇزدىك مامانداندىرىلعان مەكتەپتەرىنىڭ وندىعىنا كىردى

استانا. قازاقپارات - بيىلعى جىلى ۇ ب ت ورتاشا باللى قورىتىندىلارى بويىنشا قازاقستاننىڭ مامانداندىرىلعان ۇزدىك مەكتەپتەرىنىڭ وندىعىنا بىردەن ەلوردالىق ءۇش مەكتەپ كىردى. ولاردىڭ اراسىندا - №82 -«دارىن» مامانداندىرىلعان ليتسەيى (ورتاشا بالل - 112,8)، №9 «زەردە» دارىندى بالالار مەكتەبى (112)، «قىزدارعا ارنالعان قازاق- تۇرىك ليتسەي- ينتەرناتى» (111,3) بار. بۇل تۋرالى استانا قالاسى ءبىلىم باسقارماسىنىڭ باسپا ءسوز قىزمەتى حابارلادى.

استانادا دارىندى بالالارعا ارنالعان 5 مەكتەپ (قازاقستاندا ولار - 124) بار. ولاردىڭ ىشىندە - «دارىندى ۇل بالالار ءۇشىن قازاق- تۇرىك ليتسەيى» مەن №81 دارىندى بالالارعا ارنالعان Astana English School گيمنازياسى جۇمىس ىستەيدى.

وتكەن جىلى ەلوردالىق مەكتەپتەردىڭ اراسىندا №9 -«زەردە» دارىندى بالالار مەكتەبى ق ر- نىڭ ۇزدىك مامانداندىرىلعان ورتا ءبىلىم بەرەتىن وقۋ ورىندارىنىڭ وندىعىنا كىرگەن بولاتىن.