ءماجىلىس كەلەسى جىلدان باستاپ جۋرناليستەر اراسىندا پارلامەنتتىك سىيلىق تاعايىندايدى

استانا. قازاقپارات - پارلامەنت ءماجىلىسى جۋرناليستەر اراسىندا سىيلىق تاعايىندايتىن بولادى. بۇل تۋرالى بۇگىن ءماجىلىس سپيكەرى نۇرلان نىعماتۋلين جۋرناليستەردى بايلانىس جانە اقپارات سالاسى قىزمەتكەرلەرىنىڭ كۇنىمەن قۇتتىقتاۋى بارىسىندا ءمالىم ەتتى.

ب ا ق وكىلدەرىن ءتول مەرەكەلەرىمەن قۇتتىقتاعان سپيكەر ن. نىعماتۋلين جۋرناليستەردىڭ ەل ءومىرىنىڭ ماڭىزدى وقيعالارىن كورسەتۋدەگى ءرولىن جوعارى باعالايتىنىن جەتكىزدى. «جالپى دەپۋتاتتار مەن جۋرناليستەردىڭ قىزمەتىندە ورتاق ماسەلەلەر بارشىلىق - ولار ازاماتتار ءۇشىن جانە حالىقتىڭ يگىلىگى ءۇشىن تىنىمسىز قىزمەت ەتەدى. جۋرناليستەر تاۋەلسىزدىك العان 25 جىل ىشىندە ەلمەن، حالىقپەن بىرگە ەڭبەك ەتىپ كەلەدى. وسى كەزەڭدە قازاقستاننىڭ دامۋ جولىندا اتقارىلعان جۇمىستار تىكەلەي ب ا ق ارقىلى تارالىپ، الەمگە تانىمال ەل بولدىق. سونىڭ ىشىندە ءماجىلىستىڭ قىزمەتىن كورسەتۋدە دە ايانباي ەڭبەك ەتىپ كەلدىڭىزدەر»، - دەدى سپيكەر.

سونىمەن قاتار، سپيكەر ءماجىلىس بيۋروسىنىڭ بۇگىنگى وتىرىسىندا ماڭىزدى شەشىم قابىلداعانىن دا جەتكىزدى. «كەلەسى پارلامەنتتىك سەسسيادان باستاپ ءماجىلىستىڭ زاڭ شىعارماشىلىق قىزمەتى تۋرالى ەڭ ۇزدىك ماتەريالدار جاريالاعان جۋرناليستەردى ارنايى سىيلىقپەن ماراپاتتاۋ تۋرالى شەشىم قابىلدادىق. بۇل سىيلىق ءۇش اتالىم بويىنشا - ەڭ ۇزدىك تەلەارنا ماتەريالى، ەڭ ۇزدىك باسپا ءسوز جانە ەڭ ۇزدىك ينتەرنەت، راديوماتەريالدار بويىنشا بەرىلەتىن بولادى»، - دەدى ن. نىعماتۋلين.

ونىڭ ايتۋىنشا سىيلىقتى تاعايىنداۋ كوميسسياسىنا ءماجىلىس دەپۋتاتى قۋانىش سۇلتانوۆ جەتەكشىلىك ەتەدى، ال ونىڭ قۇرامىنا تانىمال قوعام قايراتكەرلەرى، ساياسي پارتيا وكىلدەرى مەن ۇكىمەتتىك ەمەس ۇيىم وكىلدەرى ەنەتىن بولادى.

 

اۆتور: قانات مامەتقازى ۇلى