تورەعالي تورەالى مەن ەركە ەسماحان قايتا تابىستى

استانا. قازاقپارات - ورىنسىز سىن ايتامىز دەپ رەنجىسكەن تورەعالي مەن ەركە قايتا تابىستى.

بۇل تۋرالى Stan.kz حابارلايدى.

گاككۋ ارناسى ۇيىمداستىرعان كونسەرتتە «اللو» ءانىن ورىنداسا دا، ودان كەيىن ەش جەردە بىرىگىپ ونەر كورسەتپەگەن بولاتىن. ءتىپتى تىڭدارماندارى مۇنى جۇرت الدىنداعى جاساندىلىققا بالاعان-دى.

بۇگىندە ارالارىنان قارا مىسىق جۇگىرىپ وتكەن ەركە ەسماحان مەن تورەعالي تورەالى قايتا تابىستى. تاعدىر قوسپاسا دا، حالىق قوسىپ ۇلگەرگەن جۇلدىزدى جۇپ ەل ارالاپ، دۋەت ايتىپ ءجۇر.

كۇنى كەشە ەكەۋى «ۇلى دالا بالاسى» اتتى رەاليتي شوۋدىڭ تۇسىرىلىمىنە قىزىلوردا قالاسىنا بىرگە باردى. اتالعان ەلدە بىرىگىپ ءان سالىپ، جوبانىڭ كەزەكتى سانىن تۇسىرۋگە اتسالىستى.

ەركە ەسماحان وتاندىق باعدارلامالاردىڭ بىرىندە «تورەعالي، كەلىپ قايتادان دۋەت ايتايىق دەسە، مەن قۋانا كەلىسەمىن» دەگەن بولاتىن. ءانشىنىڭ وسى تىلەگى ورىندالعان سياقتى. دەسە دە، كىمنىڭ كىمنەن كەشىرىم سۇراعانى ءالى كۇنگە دەيىن بەلگىسىز. ەكەۋى دە بۇل ماسەلەگە قاتىستى ءتىس جارىپ ەشنارسە ايتپاعان.

«تورەش تورەلىك تانىتىپ ەركەمەن بىرگە ورداعا كەلىپ قالىپتى. الدىنداعى كونسەرتتە ەركەنى كورەمىز دەپ بارعان جۇرت كوڭىلدەرى ءتۇسىپ قايتقان بولاتىن. ەلگە ادەمى ءان كەرەك. جۇپتارىڭ جازىلماسىن» دەيدى جەلى قولدانۋشىسى. وزگەلەرى دە قۋانىپ، قوس جۇلدىزدىڭ ورىنداۋىندا اسەم اندەر كۇتەتىندىكتەرىن جەتكىزدى.