كۇنتىزبەلىك اينالىمى 32 جىلدان تۇرادى. ءار جىلدىڭ جانۋار-توتەممەن بايلانىستى وزىندىك سيمۆولى بار. ءاربىر توتەم سول جىلى تۋعان ادامداردىڭ مىنەز-قۇلقىن، سىر-سىمباتىن ايقىندايدى، ياعني ءوز توتەمىنە ۇقساپ تۋعان جاندار باقىتتى بولماق. كەرىسىنشە ءوز توتەمىنە قارسى بەلگىدە تۋاتىن جانداردىڭ ءومىرى قايشىلىققا تولى بولادى. زورواستريزمدىك كۇنتىزبە بويىنشا جىل باسى 21- ناۋرىزدا باستالادى.
بۇعى
(1906, 1938, 1970, 2002)
بۇعى - جوعارى كۇشتىڭ بەلگىسى. بۇل جىلى تۋعان ادامدار وتە ساق، وزىنە تونەر قاۋىپتى الدىن الا سەزەدى. بۇعى توتەمى ورلىك پەن ەتى تىرىلىكتى، كەيدە جالعىزدىقتى، سونداي-اق قول جەتكەن بيىگىنە قاناعاتتانباۋشىلىقتى، ۇنەمى جاڭا ىستەرگە قۇلشىنۋدى بىلدىرەدى. وزگەلەردى سوڭىنان ەرتكەندى قالايدى. مۇمكىندىگىنە قاراي بۇل جىلى تۋعان ادامداردىڭ ۇزىن سيراقتى جانە ۋاقىتىن ەشقاشان بوسقا جىبەرمەيتىندەرى باقىتتى بولادى.
انتيتوتەم - جۋان دەنەلى، جالتىرباس، ۇنەمى وزىنە كوڭىلى تولمايتىن، بىرەۋدىڭ بەدەلىن پايدالانىپ كەتەتىن ادامدار.
قوي
(1907, 1939, 1971, 2003)
بۇل جىلى تۋعاندارعا ءوز وتباسىنان ارتىق ورتا بولماق ەمەس. قوي توتەمى بويىنشا دۇنيەگە كەلگەندەر ءبىرقالىپتى تىنىش، تىڭداعىش بولىپ كەلەدى. ەسەسىنە كوپشىلىك ورتاسىندا بولعاندى ۇناتادى جانە كوپتىڭ قولداۋ-كومەگىنە سۇيەنگەندى قالايدى. ءوزىنىڭ شىققان تەگىن، اتا-باباسىن قاتتى قۇرمەتتەيدى.
انتيتوتەم - وتكەنىن ەسكە المايتىن، ءوزىنىڭ شىققان تەگىن قۇرمەتتەمەيتىن، كوسموپوليتتىك كوزقاراستاعى، تەك قاراقان باسىن عانا كوككە كوتەرەتىن ادام.
مانگۋست
(1908, 1940, 1972, 2004)
بۇل جىلى تۋعاندار كەز كەلگەن ۋاقىتتا زۇلىمدىقپەن كۇرەسۋگە دايىن جانە اقىماقتىق پەن ايارلىققا توزبەيتىندەي بولۋى شارت. مانگۋست - شاپشاڭدىق پەن كەز كەلگەن جاعدايدى ۋىسىنان شىعارماۋدىڭ، ءبىرسىدىرعى بولۋدىڭ سيمۆولى.
ەگەر بۇل جىلى تۋعان ادامدار ارىقشا، قول- اياعى جىلدام، قيمىل- قوزعالىسى بيشىلەرگە ءتان بولىپ كەلسە، ول تاماشا بەلگىدەن سانالادى.
كەرىسىنشە توپاس، ەشكىمگە جاردەمى جوق جانە وتىرىككە قۇمار بولسا، ول انتيتوتەمنىڭ بەلگىسى.
قاسقىر
(1909, 1941, 1973, 2005)
بۇل بەلگىدە تۋعاندار بەلسەندى، ەشقانداي قاۋىپ-قاتەردەن سەسكەنبەيتىن، ءبىر ورىندا بايىز تاۋىپ وتىرۋدى بىلمەيتىن، ساپارعا شىعۋعا جانى قۇمار بولىپ كەلەدى. مۇنداي جاندار اتلەت ءمۇسىندى، موينى جۋان، مىعىم بولىپ كەلەدى.
كەرىسىنشە ءالسىز، جاسقانشاق، قورعانسىز جان ءوز توتەمىنە قارسى تۋعان بولىپ ەسەپتەلەدى.
كوكقۇتان (لايلەك)
(1910, 1942, 1974, 2008)
لايلەكتەر - تۋعاندارى مەن جاقىندارىنا ابدەن باۋىر باسقاندار. ءبىر جاققا شىعا قالسا، ءوز ورتاسىنا جەتكەنشە اسىعادى. لايلەك - ۇندەمەس، ءبىر-اق رەت ءسۇيىپ، ءوز كۇشىنە عانا سۇيەنەدى. مىنەزى - مەلانحوليك. كوبىنە ۇزىن سيراقتى، ويلى پىشىندەگى ادام بولىپ كەلەدى.
انتيتوتەم - تۋعان ۇيىنە جاتباۋىر، جانىن- جۋىقتارىنا نەمقۇرايلى بولۋ.
ورمەكشى
(1911, 1943, 1975, 2007)
وزدەرىن بەيتاراپ، تىنىش قالىپتا ۇستايدى. جايباراقات، ماقساتشىل، سەزىمتال. مۇنداي جانداردىڭ قولدارى ۇزىن، ساۋساقتارى يكەمدى كەلىپ، ءىس تىگۋ، ءجىپ توقۋ سياقتى جۇمىستارعا ىڭعايلىلىق تانىتادى.
انتيتوتەم - كۇشىن بولىمسىز ىسكە جۇمسايتىندىر.
جىلان
(1912, 1944, 1976, 2008)
جىلان بەلگىسىندە تۋعان ادام - وزگەرمەلى، يكەمشىل، سەزگىش، ميستيكاعا بەيىم، وزىنە سەنىمدى، ءوز ىسىنە بەرىلگەن، جاسىرىن ىستەرگە قۇمار. جىلان توتەمدى جانداردىڭ جىڭىشكە، يكەمدى، ءابجىل، سوزدەن گورى ىسكە بەيىم بولعانى جاقسى.
انتيتوتەم - كوز قاراشىعى ءبىر ورىندا تۇرمايتىن، بوس مىلجىڭعا قۇمار ادام.
قۇندىز
(1913, 1945, 1977, 2009)
قۇندىز بەلگىسى - ەڭبەك سۇيگىشتىكتى، ۇقىپتىلىقتى، قوناقجايلىلىقتى، نىق ۇستانىمدىلىقتى بىلدىرەدى. ولار قول قۋسىرىپ قاراپ وتىرمايدى - بارلىق ۋاقىتتا بىردەڭەنى جوندەپ، قالىپقا كەلتىرىپ، شۇقىلانىپ وتىرادى. مۇنداي جاندار شىمىر دەنەلى، وتباسىنا ۇيىرسەك، كوپ بالالى بولىپ كەلەدى.
انتيتوتەمدى جان ومىرلىك داعدىسىن ءجيى وزگەرتەتىن، بالالارىنا سۋىق قارايتىن ادام.
تاسباقا
( 1914, 1946, 1978, 2010)
تاسباقالار جايباسار، وزىنە سەنىمدى، ءبىر قالىپتان شىقپايدى. ءوز ماقساتىنا اسىقپاي- اپتىقپاي جەتكەندى قالايدى. ەگەر بۇل جىلى تۋعان جاندار تىعىز، قالىڭ تەرىلى بولىپ، ارقاسىندا داقتارى بولسا، جاقسى بەلگىلەردەن سانالادى.
انتيتوتەم - تاسباقاعا ءتان بەلگىسى جوقتار، بىرەۋدىڭ ىقپالىنا تەز تۇسكىش، ءتۇرلى ماسكاداعى جاندار.
ساۋىسقان
(1915, 1947, 1979, 2011)
بۇل بەلگىدە تۋعاندار جىلدام قيمىلدى، تاۋەلسىز، اينالاسىن تەز باعامداعىش بولۋى كەرەك. بۇلار ءبىر مەزگىلدە بىرنەشە ءىستى قاتار اتقارا بەرەدى، وڭتايلى، ويلاۋ قابىلەتى كۇشتى بولىپ كەلەدى.
انتيتوتەم - قۇپيا ساقتاي المايتىن، مىلجىڭدىققا قۇمارلىق.
ءتيىن
( 1916, 1948, 1980)
ءتيىن توتەمدى جاندار ەتى ءتىرى، اقىلدى، جۇمىسكەر، وتباسىنا بەرىلگەن بولىپ كەلەدى. ايتسە دە تيىنداردىڭ مىنەز-قۇلقى ءبىرقالىپتى ەمەس، جۇيكەلەرى شيرىعىڭقى، تىز ەتپە. ولار اجالدان قورىقپايدى، ءولىمدى جويىلۋ ەمەس باسقا الەمگە كەتۋ دەپ بىلەدى. مۇنداي بەلگىدەگىلەر ارىقشا، جىبىرلاق، بەت-الپەتى قۋشيىڭقى بولىپ كەلەدى.
انتيتوتەم بەلگىسى - ۇساقشىلدىق پەن جايباسارلىق، دەنەسىن ماي باسقاندىق.
قارعا
(1917, 1949, 1981)
قارعا جىلى - ادىلەتسىزدىككە تولى، ءتۇرلى اۋرۋ-سىرقاۋلى جىل. قارعا توتەمدى جاندار باعىنۋدى دا، باعىندىرۋدى دا جەك كورەدى. قاتال، ءوز كەمشىلىگىن ەشقاشان مويىندامايدى. بۇل جىلعىلار وتباسىن كەش قۇرادى نەمەسە مۇلدەم بويداق بولىپ وتەدى. قارعا ەشقاشان وزگەنىڭ ەسەبىنەن ءومىر سۇرمەيدى.
انتيتوتەم - وتباسى پروبلەماسىمەن ۇنەمى باسى قاتىپ جۇرەتىندەر.
قوراز
(1918, 1950, 1982)
قورازدار - بەلسەندى، ەرجۇرەك جاۋىنگەرلەر. ولار ءۇشىن ءۇيسىز جانە بالالارسىز ءومىردىڭ ءمان-ماعىناسى جوق. قوراز توتەمدى ادام قىزۋ قاندى، ماقساتسىز جۇرمەيتىن، اسىرەسە باس كيىمىنە ءمان بەرگىش، قىسىلعاندا قىزارىپ شىعا كەلەتىن، اشىق مىنەزدى، قيمىل- قوزعالىستى سۇيەتىن جان.
انتيتوتەم بەلگىسى ادام ءتۇرىنىڭ بوپ-بوز بولىپ كەلۋىنەن بىلىنەدى. ءارى قورعانسىز، جاسقانشاق، قاتال، ساراڭ بولىپ كەلەدى.
قوداس (وگىز)
(1919, 1951, 1983)
بۇل جىلى تۋعانداردان بەلسەندىلىك شىقپايدى. ولاردىڭ جان دۇنيەسى جاس بالانىكىندەي، ۇنەمى جەتىلدىرىپ وتىرۋدى قالايدى. شىدامدى، جۇمساق مىنەزدى، بىرەۋگە قول ۇشىن سوزعىش، مەيىرىمدى جاندار. قوداس - تابيعاتىنان يدەاليست، جان دۇنيەسى تەز جارالاناتىن نازىك، ونى مۇقالتۋ وڭاي. وسىعان قاراماستان ءوزىنىڭ جاقىندارىنا، اسىرەسە بالالارى ءۇشىن كەز كەلگەن توسقاۋىلعا ولگەن-تىرىلگەنىنە قاراماي قارسى تۇرا الادى.
انتيتوتەم بەلگىلى ادام ءجيى شامدانعىش بولىپ كەلەدى.
بورسىق
(1920, 1952, 1984)
بورسىق جىلعىلار وتكەن ومىرىنە كوپ قايىرىلعىش، بۇرىنعىنى ەسكە العىش بولىپ كەلەدى. بۇل توتەمدى جاندار شارۋاعا بەيىم، ۇنەمشىل، سىر شاشپايتىن بولعانى ماقۇل. ونىڭ سىرتقى ءتۇرى مەن ءىس-ارەكەتىنە قاراپ نەمەن شۇعىلداناتىنىن ءبىلىپ بولمايسىز. ءوز ومىرىندەگى ەڭ باستى ماقساتىن ەڭ جاقىن ادامدارىنان دا قۇپيا ۇستايدى. مۇنداي ادام شىمىر دەنەلى، تولىقتىققا بەيىم، ورتا بويلى بولىپ كەلەدى.
انتيتوتەم - ساراڭ، ءۇمىتسىز، قايىرىمسىز، اينالاسىنداعىلارعا سەنبەيتىن جانە كورە المايتىن ادامدار.
تۇيە
(1921, 1953, 1985)
تۇيە توتەمى شىدامدىلىق پەن اسكەتيزمدى بىلدىرەدى. ەشكىمگە سەنبەيدى جانە الدان ۇنەمى قيىندىق كۇتۋمەن بولادى. ادامدارمەن اشىق قارىم-قاتىناس جاسايدى، ءوز باعاسىن جەتىك بىلەدى جانە بارىنە ءوز كۇشىمەن جەتكىسى كەلەدى. ومىرگە تۋرا قارايدى. جارىنا، جاقىندارىنا، بالالارىنا كوپ كەشىرىممەن قارايدى جانە ولاردى ءوز بەتىنشە ءومىر سۇرۋگە ەرتە بەيىمدەيدى.
كەرىسىنشە نەنى بولسىن ناقتى باعالاي المايتىن، ءوز جاعدايىن جاساعىش ادام - انتيتوتەمدى ادام.
كىرپى
(1922, 1954, 1986)
كىرپى توتەمدى ادامنىڭ باسى ۇلكەن، شاشى تىكىرەيگەن بولىپ كەلەدى. مۇنداي بەلگىدەگى ادامدار ۇساق-تۇيەكتى ءومىرى ۇمىتپايدى، ەرەكشە ەستە ساقتاۋ قابىلەتىمەن دارالانادى.
انتيتوتەم - ساتقىندىققا بەيىم، سۋايت، اينالاسىن ءبۇلدىرىپ جۇرەتىن ادام.
قۇدىر (ەلىك)
(1923, 1955, 1987)
بۇلار ءمۇسىندى، قيمىل- قوزعالىسى اسەم، بويىنان اقسۇيەكتىك بەلگى اڭعارىلىپ تۇراتىن جاندار. تابيعاتىنان رومانتيك، ارتيستىككە بەيىم، كىنامشىل، كىرپياز، كوز جانارى سۇلۋ بولىپ كەلەدى. كوبىنەسە ونەرگە بەيىم بولىپ كەتەتىن مۇنداي بەلگىدەگى جاندارعا ومىرگە ناقتى كوزبەن قاراۋ جاعى جەتىسپەيدى.
انتيتوتەم - كوپ قيمىلداماۋ، دورەكى مىنەزدىلىك.
ءپىل
(1924, 1956, 1988)
تۇلعاسى جۋان، دوكىر اياقتى، مۇرنى ۇزىن، قۇلاعى كىشكەنتاي بولىپ كەلەدى. ءپىلدى اشۋلاندىرۋ وڭاي ەمەس، ءبىراق ءبىر اشۋلاندىرسا ساباسىنا ءتۇسىرۋ قيىن. ءپىل - شاڭىراق يەسى، اتا-بابا ءداستۇرىن قۇرمەتتەۋشى. ول جايباسار، ءبىراق وزگەلەرمەن سەرىكتەس بولۋدى قالايدى. الىپ قارا كۇشىنە قاراماي مۇمكىندىكتەردى ءجيى قولىنان شىعارىپ الادى.
انتيتوتەم بەلگىلى ادام جالعاندىققا جانى قۇمار، سەنۋگە تۇرمايتىن، ەرمەك ىزدەپ جۇرەتىن جان.
جىلقى
(1925, 1957, 1989, 2021)
جىلقى توتەمدى جان شىنشىل، تابيعات پەن كەڭ دالانى، ەركىندىكتى ءسۇيۋشى، ساياحاتتاعاندى جانە سپورتپەن شۇعىلدانعاندى جاقسى كورەدى. ءوز كۇش-قۋاتىن كوپشىلىك اراسىندا عانا كورسەتە الادى. جىلقى اتلەت ءمۇسىندى، ءور، قاتتى شاشتى، ۇلكەن ادەمى كوزدى، تىستەرى ساۋ بولىپ كەلەدى. ەگەر جىلقى جىلىندا تۋعان جان جاسقانشاق، قيسىق ءالسىز اياقتى، تىستەرى شىرىگەن بولىپ كەلسە، وندا ول انتيتوتەم بەلگىسى.
گەپارد
(1926, 1958, 1990, 2022)
گەپارد - ادامدار جاۋىنگەر، كوزسىز باتىر، سۇستى بولىپ كەلەدى. گەپارد - ادام شىنشىل، كۇشتى، وزىنە سەنىمدى، ۇنەمى ساقاداي ساي بولىپ جۇرەتىن بولۋ كەرەك.
انتيتوتەم بەلگىسى قورقاقتىقتان، السىزدىكتەن، ايانىشتىلىقتان بىلىنەدى.
تاۋىس
(1927, 1959, 1991, 2023)
تاۋىس قۇس - ادام تەز كوزگە تۇسكىش، كوڭىلدى جانە بويىنداعى بار كۇش-قۋاتىن جارقىراتا كورسەتۋگە تىرىساتىن جان. مۇنىڭ ۇنامسىز جاعى - قولى جەتپەيتىن بيىكتەرگە تىرىسۋشىلىق، كەيدە بولاشاعى جوق شەشىمدەرگە كوزسىز بوي ۇرۋ.
انتيتوتەم - سۇپ-سۇر، كەكشىل، تۇنەرىڭكى، ىشكى سىرى قۇلىپتاۋلى جان.
اققۋ
(1928, 1960, 1992, 2024)
اققۋ توتەمدى جانعا ورلىك، تاكاپپارلىق، بيىك يدەال، سەنىمدىلىك ءتان. ماتەريالدىق يگىلىكتەرگە مويىن بۇرمايدى. ول ءوزىنىڭ ىشكى الەمىنە تاۋەلدى، ماحابباتقا ادال، جاقىن ادامدارىمەن ۇنەمى بايلانىستا بولۋدى قالايدى. اققۋ - ادامنىڭ موينى ادەتتە سۇڭعاق بولىپ كەلەدى.
انتيتوتەمدىك بەلگى: ماتەريالدىق يگىلىكتەرگە باس ۇرعىش، سەنىمسىز، ساراڭ.
سىلەۋسىن
(1929, 1961, 1993, 2025)
سىلەۋسىن - ادام مىسىققا ءتان قىلىقتارعا جاقىن بولىپ كەلەدى. ولاردىڭ مىنەز- قۇلقىن اجىراتۋ قيىن. بىردە سابىرلى، بەيبىتشىل، كەيدە اشۋلى، ۇرىسقۇمار. سىلەۋسىندەرگە ۇنەمى تارتىپسىزدىك، رەتسىزدىك ءتان بولعانمەن، وزگەلەرگە ول مۇنى كەشىرمەيدى. ەركىن جايىلىپ جۇرگەندى جاقسى كورەدى، ءبىراق كەرەك كەزدە دەمدە جيناقىلانا الادى. ولارعا وپتيميستىك قاسيەت ءتان، باسى تولعان يدەيا. كورىپكەلدىك قاسيەتتەن دە كەندە ەمەس.
انتيتوتەم - جاسقانشاق، ۇساقشىل، اسكەت.
ەسەك
(1930, 1962, 1994, 2026)
ەسەك - ادامنىڭ جۇمىس ىستەۋ قابىلەتى جوعارى، شىدامدى، سابىرلى، بەيبىتشىل، قاراپايىم، كوپ نارسەگە ءوز كۇشىمەن جەتكىسى كەلەدى. مۇنداي ادام ءومىردىڭ كەز كەلگەن سالاسىنا بەيىمدى، تۇراقتى، ءبىراق جۇمىس ىستەۋ ءۇشىن قوسىمشا كۇشتەگەندى قاجەت ەتىپ تۇرادى. مازاسىزدىق، ۇرىس- كەرىس جايلاپ تۇرعان جەردە ەسەك - ادامنىڭ ەشتەڭە ىستەگىسى كەلمەيدى. ءوز ويىنا تۇنشىعىپ جۇرەدى. مۇنداي بەلگىدەگى جانداردىڭ قۇلاعى ۇلكەن بولىپ، كۇشتى تىستەرى العا شىعىپ تۇرسا، ۇنامدى بەلگىلەردەن سانالادى.
ەگەر ادام جاسقانشاق، ۇساق- تۇيەكشىل بولىپ كەلسە - بۇل انتيتوتەم بەلگىسى.
اق ايۋ
(1931, 1963, 1995)
اق ايۋ - ادامعا جاۋىنگەرلىك، قاتاڭ ءپىشىم ءتان. ءومىر سۇرۋگە بەيىم، جان- دۇنيەسى جومارت. ولاردا ادامدى قيناعىشتىق قاسيەت جوق، ساتقىندىقتىڭ كەز كەلگەن ءتۇرىن جەك كورەدى. الدىنا بيىك ماقسات قويىپ، ومىردە سوعان قول جەتكىزۋگە تالپىنادى. ادامداردى ءوز ماڭايىنا توپتاستىرۋعا بەيىم جانە ءوز سوڭىنان ەرتە الادى.
انتيتوتەم - ۇساق- تۇيەكشىل، قيناۋعا بەيىم.
بۇركىت
(1900, 1932, 1964, 1996, 2028)
بۇركىت - ادام اسەم، ءوزىن كەز- كەلگەن ورتادا لايىقتى ۇستاي بىلەتىن، ءور مىنەزدى بولىپ كەلەدى. ءوزىن ۇلكەن ىستەرگە قۇربان ەتۋگە قابىلەتتى. بۇركىت - ادامداردى بيىك يدەالى، جاۋىنگەرلىك مىنەز-قۇلقى، اقسۇيەكتىگى ءۇشىن ۇناتپايتىندار كوپ.
انتيتوتەم بەلگىسى لاستىقتان، زيانكەستىكتەن بىلىنەدى. مۇنداي جاندار ۇزىن، ارىق سيراقتى بولىپ كەلەدى.
تۇلكى
(1901, 1933, 1965, 1997)
تۇلكى جىلىندا تۋعان جاندار جۇمباق مىنەزدى، قۋلىققا بەيىم، وڭتايلى بولىپ كەلەدى. ازداپ قورقاقتاۋ، وزگەگە ءجون سىلتەگىشتىگى بار. تۇلكى تەكتەس جانداردىڭ بەلگىسى ۇشكىر تۇمسىعىنان جانە نازىكتىگىنەن بىلىنەدى. ناداندىق پەن اقىماقتىقتى ءاجۋالاعاندى، بىرەۋدىڭ ءمىنىن كوزگە شۇقىپ كورسەتكەندى قالاپ تۇرادى.
انتيتوتەم بەلگىسى توپاستىقتان، ساراڭدىقتان، سەزىمسىزدىكتەن بىلىنەدى.
دەلفين
(1902, 1934, 1966, 1998)
دەلفين جىلى تۋعاندار اقىلدى، يدەاليست، كەز كەلگەن قيىن ساتتە قول سوزۋعا دايىن. ولار فيلوسوفيالىق توپشىلاۋعا، ءومىردى شىعارماشىلىق تۇرعىدان تۇيسىنۋگە بەيىم. مىنەز- قۇلقىندا، ءجۇرىس- تۇرىسىندا قۇپيالىلىق باسىم. وزىنە جۇمىستىڭ ەڭ اۋىر جاعىن بايقاتپاي الۋدان قاشپايدى. وزگە جاندارعا بىلدىرمەي كومەگىن تيگىزىپ جۇرەدى.
انتيتوتەم - اشۋ-ىزاعا بەيىم، بۇلىك شىعارۋعا قۇمار، قايىرىمسىز.
قابان
(1903, 1935, 1967, 1999)
قابان جىلعىلار ەرجۇرەك، شەشىمتال، جاۋىنا سوققى بەرۋگە دايىن، ۇنەمى الدا جۇرگەندى قالايدى. ول ءوز كۇش- قۋاتىن باعالاي بىلەدى جانە ونى كەز- كەلگەن جەرگە جۇمساي بەرمەيدى. بەيبىتشىل جاعدايدا ول وزگەلەردىڭ پىكىرىنە سۇيەنۋگە، جاقىندارىن تىڭداۋعا، ايتقاندارىنا كونۋگە بەيىم. باستارى ۇلكەن، اتلەت تۇلعالى بولىپ كەلەدى.
ءوز توتەمىنە قارسى جان ساراڭ، ىزاقور، ءىرى قىلمىس جاساۋعا بەيىم بولىپ كەلەدى.
جاپالاق
(1904, 1936, 1968, 2000)
وزدەرىنىڭ ءومىر ءسۇرۋ گرافيگى بار. كۇندىز ۇيىقتاپ، تۇندە كوز ىلمەۋى مۇمكىن. ولاردان قۇپيا توپ ۇيىمداستىرۋشىلارى شىعادى. وزىمەن ءوزى جۇرەدى، اسىرەسە ەرلەرى ميستيكاعا بەيىم. كوبىنە جۇمباق جاعدايدا ءومىر ءسۇرىپ، ومىردەن دە جۇمباقتاۋ كۇيدە كەتەدى. ءومىردىڭ قۇندىلىق جاعىن قورعاۋشى رەتىندە كورىنەدى.
ەگەر ادام كۇشتىگە باس يزەگىش، جاسقانشاق بولسا، ول - انتيتوتەم بەلگىسى.
سۇڭقار
(1905, 1937, 1969, 2001)
سۇڭقار توتەمدى جان ەرجۇرەك، ءور مىنەزدى، پاتريوت، ءدىننىڭ بەلسەندى ۋاعىزداۋشىسى مەن رەفورماتورى، بيىك ماقساتتى بولىپ كەلەدى. ءوزىنىڭ ۇستىنەن بىرەۋدىڭ بيلىك جۇرگىزگەنىن قالامايدى. ءبىراق باسشىسى دانا بولسا، كوپتەگەن ۇلگىلى ىستەر تىندىرا الادى. بۇلار وزدەرى ومىردەن وتكەندە ارتتارىندا جاقسى ىزدەرى قالعانىن كوبىرەك ويلايتىندار.
انتيتوتەم - جاسقانشاق، ايعاي- شۋعا بەيىم، ەشتەڭەنىڭ قادىرىنە جەتپەۋ.
تورەعالي تاشەنوۆ
«ايقىن»