قازاقستاندا شەنەۋنىكتەرگە تىم قىمبات كيىم كيۋگە تىيىم سالىنباق

استانا. قازاقپارات - ەلىمىزدە شەنەۋنىكتەردىڭ سىرتقى كەلبەتى قاتاڭ قاداعالانباق. جۇمىسقا قىمبات كيىم كيىپ كەلگەن مەملەكەتتىك قىزمەتكەرلەر بۇدان بۇلاي جازالاناتىن بولادى.

بۇل تۋرالى «ك ت ك» ارناسى حابارلايدى.

ول ءۇشىن مەملەكەتتىك قىزمەت ىستەرى مينيسترلىگىنىڭ جانىنان ارنايى ينستيتۋت قۇرىلدى.

ازىرگە بەلگىلى ءبىر برەندكە، شەنەۋنىكتىڭ جەكە كولىگىنىڭ باعاسىنا قاتىستى ناقتى تىيىم جوق. الايدا، مەملەكەتتىك قىزمەتكەر بارىنشا قاراپايىم كيىنۋى ءتيىس. جاڭادان قۇرىلعان ينستيتۋت شەنەۋنىكتەردىڭ كيىمىن عانا ەمەس، ءجۇرىس-تۇرىسى، ورتادا ءوزىن ۇستاۋ مەن ەتيكاسىن دا باقىلايتىن بولادى.

ەگەر مەكەمە باسشىسى، اكىم نەمەسە ونىڭ ورىنباسارلارى ەسكەرتۋگە قۇلاق اسپاسا، تارتىپتىك جاۋاپقا تارتىلادى، ءتىپتى بۇدان دا قاتال جازا قولدانىلۋى مۇمكىن.

بۇعان دەيىن مەملەكەتتىك قىزمەتكەرلەرگە جاپپاي وتاندىق كولىككە اۋىسۋ تۋرالى تالاپ قويىلعان بولاتىن. جانە جۇمىستا سمارتفون پايدالانۋعا تىيىم سالىنعان-دى.