قازاق ماناسشىسىنا - قىرعىز ماراپاتى

استانا. قازاقپارات - بەلگىلى اقىن، الامان ايتىسكەر، جامپوز جازۋشى، دراماتۋرگ، دەلەبەلى جىرشى، ىلكىمدى كينوگەر بايانعالي ءالىمجانوۆ قىرعىز تۋعانداردىڭ «ساياقباي ماناسشى» مەدالىمەن ماراپاتتالدى.

بۇل تۋرالى «ەگەمەن قازاقستان» گازەتى بۇگىنگى سانىندا حابارلادى.

بۇل اتاۋلى توسبەلگىنى حالىقارالىق ساياقباي قارالايەۆ قورى تاعايىنداپ، شوڭ ماناس باتىردى، ايگىلى «ماناس» جىرىن پاش ەتۋگە ەڭبەك سىڭىرگەن قايراتكەر ھام شىعارماشىل تۇلعالارعا بەرىپ وتىراتىن بولعان. «ساياقباي ماناسشى» مەدالىمەن وسى جولى باستاپ ماراپاتتالعانداردىڭ ىشىندە قىرعىزدىڭ ءبىر توپ مەملەكەت جانە قوعام قايراتكەرلەرى بار ەكەن.

سول قاتاردا ايرىقشا قىرعىزستان پرەزيدەنتى المازبەك اتامبايەۆ كوزگە تۇسەدى. سونىمەن بىرگە، مارتەبەلى مەدالدى جوگوركۋ كەنەش دەپۋتاتى سادىق شەرنياز، حالىق جازۋشىسى بەكسۇلتان جاكيەۆ جانە باسقا دەپۋتاتتار مەن ايتۋلى ماناسشىلار ەنشىلەگەن.

«ماناس» جىرىن بايانعالي جىرلاپ، تاڭدى تاڭعا ۇرىپ ايتىپ كەلە جاتقانىنا دا قىرىق جىلدىڭ شاماسى. سەگىز قىرلى، ءبىر سىرلى ونەر يەسىنىڭ قىرعىز ەلىندەگى قۇرمەت، سىيى دا زور. قىرعىزستاننىڭ ا. مالدىبايەۆ اتىنداعى سىيلىعىن دا يەلەنگەن، «قىرعىزستان مادەنيەتىنىڭ مىقتى قىزمەتكەرى» اتانعان. ماناستىڭ 1000 جىلدىعىنا ارنالعان «ماناسشى» حالىقارالىق سايىسىنىڭ ارنايى سىيلىعىن العان دا ءبىزدىڭ بايانعالي بولاتىن. قازاقتان شىققان، جالپى، جەر ءجۇزى بويىنشا قىرعىزدان باسقا التى ميلليارد ادامزاتتىڭ ىشىندەگى جالعىز ماناسشى دا بايانعالي. ماناسشىلار قوعامىنىڭ ءتوراعاسى، ءوزى دە شوڭ ماناسشى رىسباي يساقوۆ وسىلاي دەيدى»، - دەپ جازادى ۇلت گازەتى.