استانادا «ازيا جاڭعىرىعى» سيرك ونەرى فەستيۆالى توعىزىنشى مارتە وتكىزىلەدى - فوتو
ەلوردا تۇرعىندارى مەن قوناقتارى ءبىر اپتا بويى شىلدەنىڭ 2 ءسى مەن 7 ءسى ارالىعىندا ۇزدىك سيرك ۇجىمدارىنىڭ ونەرىن تاماشالايدى.
ەلوردانىڭ رەسمي سايتىنىڭ حابارلاۋىنشا، سيرك ونەرى مارافونىنا الەمنىڭ 8 مەملەكەتىنىڭ ۇزدىك ارتىستەرى قاتىسادى.
دۇنيەجۇزىلىك فەستيۆالداردىڭ جەڭىمپازدارى مەن جۇلدەگەرلەرى، ءوز جانرلارىنداعى ناعىز شەبەرلەر، سيرك اۋلەتتەرىنىڭ وكىلدەرى قالا تۇرعىندارى مەن قوناقتارىن قۋانتپاق. اتاپ ايتقاندا، بەلورۋسسيا، گوللانديا، قازاقستان، قىرعىزستان، موڭعوليا، رەسەي، تۇركمەنستان جانە ەفيوپيا ارتىستەرى ەلوردالىق سيرك كۇمبەزىنىڭ استىندا ءوز ونەرىن ورتاعا سالادى. ولاردىڭ كوبى استاناعا العاش رەت كەلەدى.
فەستيۆال كورەرمەندەرى افريكانىڭ ەكزوتيكالىق الىپتارىنىڭ شوۋىن تاماشالايدى - كەرىك باگيرا جانە ءمۇيىزتۇمسىق بوني، سونداي-اق، ۇيرەتىلگەن ايۋلار مەن مايمىلدار مانەجگە شىعادى.
سونىمەن قاتار كەلۋشىلەر نازارىنا اكروباتتاردىڭ وزىنە باۋراپ الاتىن نومىرلەرىن، سونىڭ ىشىندە اكروباتتىق جول، اۋادا تارتىلعان ءجىپ ۇستىندە ونەر كورسەتەتىن، مونوتسيكل مىنگەن ەكۆيليبريستتەر، ارقانمەن جۇرەتىندەر، سونداي-اق، ەفيوپيالىق ارتىستەردىڭ ورىنداۋىنداعى يكاريلىك ويىندار. فەستيۆال باعدارلاماسىنا گيمناستيكالىق جانرلار دا ەنگىزىلدى.
فەستيۆال بارىسىندا ۇيىمداستىرىلاتىن جارقىن وقيعالاردىڭ ءبىرى - «كاۆالكادا» مەرەكەلىك شەرۋى - قاتىسۋشىلار شىلدەنىڭ 1 ءى مەن 4 ءى كۇنى ساعات 17:00 دە ۇرمەلى اسپاپتار وركەسترىنىڭ سۇيەمەلدەۋىمەن قالا كوشەلەرىمەن ءجۇرىپ وتەدى. سيرك ارتىستەرى قابانباي باتىر داڭعىلىنىڭ بويىمەن دوستىق كوشەسىنە دەيىن بارادى، سودان كەيىن تۇركىستان جانە قونايەۆ كوشەلەرىمەن ءجۇرىپ، شەرۋ قابانباي باتىر داڭعىلىندا استانالىق سيركتىڭ جانىندا اياقتالادى.
فەستيۆال استانادا وسىمەن توعىزىنشى رەت وتكىزىلەدى. وسى ۋاقىتتىڭ ىشىندە «ازيا جاڭعىرىعى» سيرك ونەرى الەمىندەگى وزىندىك برەندكە اينالىپ، جوعارى كوركەمدىك، ۇيىمداستىرۋشىلىق جانە تەحنيكالىق دەڭگەيدە وتەتىن ماڭىزدى شارا بولىپ تابىلادى. استانالىق سيرك جىل سايىن تورتكۇل دۇنيەگە جاڭا ارتىستەردىڭ تالانتتى، ءتۇرلى جانرلارداعى ارتىستەردىڭ - سايقىمازاقتار مەن اكروباتتاردىڭ، جونگلەرلار مەن ەكۆيليبريستتەردىڭ، گيمناستتاردىڭ، سيقىرشىلاردىڭ جانە اڭ ۇيرەتۋشىلەردىڭ ەسىمدەرىن جاريا ەتەدى.
ايتا كەتەيىك، بيىلعى فەستيۆال قازاقستاننىڭ تاۋەلسىزدىگىنىڭ 25 جىلدىعىنا ارنالادى جانە الەمدىك سيرك ونەرىنىڭ باستى جەتىستىكتەرىن كەڭىنەن تاراتۋعا، ۇزدىك داستۇرلەر مەن باعىتتاردى ساقتاۋعا جانە ۇلعايتۋعا باعىتتالعان.