قازاقستان-ورال تەلەارناسىنىڭ رەداكتورى رەسپۋبليكالىق بايقاۋدىڭ باس جۇلدەگەرى اتاندى - فوتو

ورال. قازاقپارات - «قازاقستان ورال» تەلەارناسىنىڭ رەداكتورى گۇلدەن ساپيوللا بايلانىس جانە اقپارات قىزمەتكەرلەرىنىڭ كۇنىنە وراي ۇزدىك تەلەجۇرگىزۋشىلەر اراسىندا «قازاقستان» ر ت ر ك» ا ق ۇيىمداستىرعان «ارنانىڭ بەتكە ۇستارلارى» رەسپۋبليكالىق بايقاۋىنىڭ باس جۇلدەگەرى اتاندى.

«قازاقستان ورال» تەلەارناسىنىڭ باس رەداكتورى گۇلميرا تىلەۋبايەۆانىڭ ايتۋىنشا، اتالمىش كاسىبي سايىس الدىمەن وبلىس تەلەجۋرناليستەرى اراسىندا وتكىزىلدى. سودان كەيىن جيىرما كۇندەي «قازاقستان» ر ت ر ك» ا ق فيليالدارى اراسىندا رەسمي سايت ارقىلى داۋىس بەرىلدى. بايقاۋدا تەلەجۋرناليستەردىڭ كاسىبي جانە جۇرگىزۋشىلىك شەبەرلىكتەرى سارالاندى. بارلىعى 5176 داۋىس جيناعان گۇلدەن رەسپۋبليكالىق بايقاۋدا ۇزدىك شىقتى.

گۇلدەن ساپيوللا «قازاقستان ورال» تەلەارناسىندا 2008 -جىلدان بەرى ەڭبەك ەتىپ كەلەدى. ول - «ارنايى رەپورتاجدىڭ» مايتالمانى، قوعامداعى ءتۇرلى وزەكتى ماسەلەلەردى دەر كەزىندە كوتەرىپ، كورەرمەندەرگە جوعارى دەڭگەيدە جەتكىزىپ وتىرادى. وتكىر ءارى تاباندىلىعىمەن ەرەكشەلەنەدى.

ايتا كەتەيىك، گ. ساپيوللا وتكەن جىلى ساراتوۆ قالاسىندا وتكىزىلگەن «مير پراۆا» حالىقارالىق تەلەباعدارلامالار بايقاۋىنىڭ جۇلدەگەرى اتانعان بولاتىن.

   

اۆتور: ەلجان ەرالى