ە. توعجانوۆ: جۋرناليستەردى مەدياتور دەپ ايتامىن

استانا. قازاقپارات - جۋرناليستەردىڭ ءارقايسىسىن مەدياتور دەپ ايتا الامىن.

بۇگىن ق ح ا جۋرناليستەر كلۋبىنىڭ كەڭەيتىلگەن وتىرىسىندا قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى ەرالى توعجانوۆ ءمالىم ەتتى.

«بيىلعى جىلدىڭ ەرەكشەلىگى تاۋەلسىزدىگىمىزدىڭ 25 جىلدىعىمەن تىكەلەي بايلانىستى. سوندىقتان بىرلىكتىڭ قۇندىلىقتارى - تاۋەلسىزدىكتى قامتاماسىز ەتۋدىڭ نەگىزگى كەپىلى. جالپى، ق ح ا سەسسياسىندا بەرگەن ەلباسىنىڭ ءبىراز تاپسىرمالارى بار. ونىڭ ىشىندە «قوعامدىق كەلىسىم» يدەياسىنا بايلانىستى ارنايى كەڭەستەردىڭ قۇرىلۋى قامتىلعان، ياعني ءۇش جىلدان بەرى جۇمىستار اتقارىلۋدا، ءبىراق قوعامدىق ورتادا بۇل باعىتتاعى جۇمىستارعا بىرگە تارتۋىمىز كەرەك. جۋرناليستەر قاۋىمىن قوعامدىق كەڭەستىڭ جۇمىسىنا بەلسەندى ارالاسۋعا شاقىرامىن. بۇگىندە وسىنداي 1932 ارنايى كەڭەستەر وبلىستاردان باستاپ، اۋداندارعا دەيىن جانە اۋىلدىق جەرلەردە قۇرىلدى. سوندىقتان ەلىمىزدىڭ بۇكىل تىنىسى مەن تىرشىلىگىن سىزدەرمەن بىرگە قاراستىرۋ كەرەك دەپ ويلايمىن»، - دەدى ە. توعجانوۆ.

بۇدان بولەك، ول مەدياتسيا باعىتىنداعى جۇمىستارعا توقتالدى. «جۋرناليستەردىڭ ءارقايسىسىن مەدياتور دەپ ايتسام، ارتىق بولمايدى. بۇگىندە ءبىز جوعارعى سوتپەن ارنايى مەموراندۋم دايىنداپ جاتىرمىز، قۇجاتتىڭ جوباسى اياقتالۋعا جاقىن. ءاربىر ادام ءوزىنىڭ ومىرىندە سوت جۇيەسىندە ازاماتتىق، اكىمشىلىك نەمەسە باسقا دا ىستەر اياسىندا ارالاسىپ تۇراتىنى انىق. ەگەر سول ماسەلەلەردى سوتقا جەتكىزبەي، سىزدەردىڭ قاتىسۋىڭىزبەن بىرگە شەشىپ وتىراتىن بولساق، بۇل ءبىزدىڭ ۇلكەن جەڭىسىمىزدىڭ ءبىرى بولادى. شەتەلدىڭ تالداۋ جۇمىستارىنا قاراساق، سوتقا دەيىنگى ماسەلەلەردىڭ 70 پايىزعا دەيىنگى كورسەتكىشى مەدياتسيا الاڭدارىندا شەشىلۋدە. بۇل رەتتە قارجىنىڭ، ۋاقىتتىڭ ۇنەمدەلۋىن اتاپ وتۋگە بولادى»، - دەدى حاتشىلىق مەڭگەرۋشىسى.

اۆتور: رۋسلان عابباسوۆ