استاناعا «ۇلى دالا ازاماتتارى» اۆتوشەرۋى كەلەدى

استانا. قازاقپارات - ۇلى وتان سوعىسى باستالعان كۇنى «ۇلى دالا ازاماتتارى» رەسپۋبليكالىق اۆتوشەرۋىن وتكىزۋگە ارنالعان كونفەرەنتسيا ۇيىمداستىرىلدى.

شارا ەلىمىزدىڭ تاۋەلسىزدىگىنىڭ 25 جىلدىعىن اتاپ وتۋگە جانە ۇوس جىلدارى العاشقى اسكەري قۇرامالاردىڭ قۇرىلعانىنا 75 جىل تولۋىنا ورايلاستىرىلعان، دەپ حابارلايدى ەلوردا اكىمدىگىنىڭ باسپا ءسوز قىزمەتى.

اتالعان كەڭ اۋقىمدى شارانىڭ ماقساتى مەملەكەتتىلىك پەن پاتريوتتىق سەزىمدى، حالىق بىرلىگىن، جالپى ۇلتتىق قۇندىلىقتاردى نىعايتۋعا سەپتىگىن تيگىزۋ جانە قازاقستاندىقتاردى «ماڭگىلىك ەل» يدەياسىن ۇستانۋعا، «نۇرلى جول» باعدارلاماسىن جۇزەگە اسىرۋعا شاقىرۋ، سونداي-اق، ۇلى وتان سوعىسى جىلدارىنداعى قازاقستاندىقتاردىڭ ەرلىگى مەن باتىلدىعىن ناسيحاتتاۋ بولىپ تابىلادى.

«ءبىز بىشكەك ارقىلى جۇرەمىز، تاراز، شىمكەنت، تۇركىستان، قىزىلوردا، قازالىدا مىندەتتى تۇردە بولامىز، اقتوبەگە سوعامىز - جاقىندا ورىن العان وقيعالاردىڭ سالدارىنان وتانىمىزدى قورعاپ، قازا تاپقان 312- ديۆيزيا - ۇلتتىق گۆاردياعا تاعزىم ەتەمىز، سودان كەيىن ديۆيزيا قۇرىلعان پەتروپاۆلعا بارامىز»، - دەيدى استاناداعى «گەنەرالدار كەڭەسى» ر ق ب وكىلى، گەنەرال- مايور مارات ماردەنوۆ باسپا ءسوز ءماسليحاتى بارىسىندا.

اۆتوشەرۋگە قاتىسۋشىلار 8 -شىلدەدە ەلورداعا ات باسىن تىرەيدى. سالتاناتتى شارا «وتان قورعاۋشىلار» مونۋمەنتىنىڭ الدىنداعى الاڭدا وتەدى. 1941 -جىلى بۇل جەردە قىزىل اسكەردىڭ دالالىق وقۋ ورتالىعى بولعان. الاڭدا قازاقستان حالقى اسسامبلەياسىنىڭ، قوعام، قالالىق جاستار ۇيىمدارىنىڭ، ۇكىمەتتىك ەمەس ۇيىمداردىڭ وكىلدەرىنىڭ جانە ت. ب. قاتىسۋىمەن ميتينگ وتكىزىلەدى.