شاريعات بويىنشا تىرناقتى اپتانىڭ قاي كۇنى الام دەسەڭىز دە، ءوز ەركىڭىز. ءبىراق جۇما كۇنى نامازعا دەيىنگى ۋاقىت ىشىندە تىرناق الۋدى ادەتكە اينالدىرۋ - مۇستاحاب (ۇنامدى امال). ولاي بولعان سەبەبى، ءحاديسشى ءبايھاقي كىتابىندا پايعامبارىمىزدىڭ (ﷺ) جۇما كۇنى نامازدان بۇرىن تىرناعىن الىپ، مۇرتىن قىسقارتاتىندىعى ايتىلادى. تىرناق استىنا قانشاما ميكروبتار مەن كىر جينالاتىندىقتان، قاجەتتىلىك تۋىنداعان جاعدايدا قانداي كۇن ەكەنىنە قاراماستان الىپ وتىرعان دۇرىس. مەيلى سەيسەنبى، سارسەنبى بولسىن، ءتىپتى تۇندە دە تىرناق قيۋعا بولادى. تۇندە تىرناق الماۋ دەگەن، جارىقتىڭ جوق كەزدەرى دەنەڭدى جاراقاتتاپ الماۋ ءۇشىن ايتىلسا كەرەك. تاعى ءبىر ۇنامدى ارەكەت - الىنعان تىرناقتى كومۋ. ويتكەنى، پايعامبارىمىزدىڭ (ﷺ) الىنعان تىرناق پەن شاشتى كومۋدى كەڭەس ەتكەندىگى ريۋايات ەتىلەدى.
تىرناقتى، ابزالى اپتاسىنا ءبىر رەت الىپ تۇرۋ كەرەك. ال، قىرىق كۇننەن اسسا - حارامعا جاقىن ماكرۇھ بولىپ ەسەپتەلىنەدى. ولاي بولعان سەبەبى، ساحابا ءاناس: «مۇرتتى قىسقارتۋدى، تىرناق الۋدى، قولتىق تۇگىن جۇلىپ، اۋرەت تۇگىن قىرۋدى قىرىق كۇننەن اسىرماۋدى بۇيىردى»، - دەگەن.
تىرناق الۋ ادەبى بويىنشا، اۋەلى وڭ قولدىڭ سۇق ساۋساعىنان باستاپ، رەتىمەن ورتاڭعى، اتى جوق جانە شىناشاق، ەڭ سوڭىندا باسبارماعىنىڭ تىرناعى الىنادى. سول قولى شىناشاعىنان باستاپ، رەتىمەن باسمارماعىنىڭ تىرناعىمەن الۋمەن اياقتالادى. اياق تىرناقتارىن وڭ اياعىنىڭ كىشكەنتاي باشپايىنان باستاپ، رەتىمەن الادى. ال، سول اياعىنىڭ تىرناعىن، كەرىسىنشە، ۇلكەن باشپايىنان باستاپ، كىشكەنتاي باشپايىنان اياقتايدى.
Ihsan.kz