جۇمىسسىزدار اراسىندا ناقتى ماماندىعى بار ادامدار از

استانا. قازاقپارات - ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ ايتۋىنشا، جۇمىسسىز ازاماتتاردى جۇمىسپەن قامتۋ شارالارى جالعاسا بەرەدى.

الايدا ۇدەمەلى يندۋستريالدىق- يننوۆاتسيالىق دامۋ باعدارلاماسى اياسىندا ناقتى ماماندىعى بار ادامدار قاجەت، دەپ حابارلايدى Baq.kz ءتىلشىسى.

ءمينيستردىڭ ايتۋىنشا، جۇمىسپەن قامتۋ ماسەلەسى بويىنشا بارلىق مەملەكەتتىك باعدارلامالارعا وزگەرىس ەنگىزىلگەن بولاتىن. وعان سايكەس، جاڭا قۇرىلىس نىسانى سالىنسا، جەرگىلىكتى جەردە تىركەلگەن جۇمىسسىزداردىڭ 15 پايىزى اتالعان نىسانعا جۇمىس كۇشى رەتىندە تارتىلۋى شارت.

«بىلتىر ۇدەمەلى يندۋستريالدىق- يننوۆاتسيالىق دامۋ باعدارلاماسى اياسىندا ءبىز 5145 ادامدى جۇمىسقا تۇرعىزدىق. بيىل ايماقتاردا 26644 جۇمىس ورنى اشىلادى. سونىڭ 19 پايىزىن جۇمىسپەن قامتۋ ورتالىعىنان تارتاتىن بولدى. بۇگىندە اتالعان 165 جوبانىڭ باسىم بولىگى قىزىلوردا، وڭتۇستىك قازاقستان مەن پاۆلودار وبلىستارىندا ىسكە اسىپ وتىر. ازىرشە، ءوزىن- ءوزى جۇمىسپەن قامتىپ جۇرگەن ازاماتتاردىڭ قاتارىنان 551 ادامدى تۇراقتى جۇمىسقا الدى. دەگەنمەن، ونداي جوبالارعا ناقتى ماماندىعى بار ادامداردىڭ قاجەت ەكەنىن اشىق ايتۋىمىز قاجەت»، - دەپ اتاپ كورسەتتى ت. دۇيسەنوۆا ۇكىمەتتىڭ بۇگىنگى وتىرىسىندا.

جالپى، ۇدەمەلى يندۋستريالدىق- يننوۆاتسيالىق دامۋ باعدارلاماسى اياسىندا الماتى قالاسىندا، وڭتۇستىك قازاقستان، قىزىلوردا مەن الماتى وبلىستارىندا جۇمىسپەن كوپتەپ قامتاماسىز ەتۋ شارالارى جوسپارلانعان.