ەستەرىڭىزگە سالا كەتەيىك، ەلىمىزدىڭ مادەنيەت ءمينيسترى ارىستانبەك مۇحامەدي ۇلى «ماسكەۋدىڭ اجەتحانالارىن جۋىپ جۇرگەن قىرعىز قىزدارىنا جانىم اشيدى» دەگەن سوڭ، قىرعىز رەسپۋبليكاسى قازاقستانعا قارسىلىق نوتاسىن جولداعان ەدى.
«بۇل جاعدايدى ءبىز رەتتەپ قويدىق. مادەنيەت مينيسترلىگىنىڭ باسشىلىعى رەسمي جاۋاپ بەردى. ياعني، ءمينيستردىڭ نە ايتپاق بولعانىن ءتۇسىندىرىپ بەردى. ينتەرنەتتەگى بلوگتاردان وقىعاندارىڭىز جەكەلەگەن قىرعىز ازاماتتارىنىڭ ەموتسيا ۇستىندە جازعان پىكىرلەرى ەدى. ءبىزدىڭ مينيستر ورتا ازياداعى ەڭ جاقىن دوسىمىزدىڭ نامىسىنا ءتيۋدى ويلاعان جوق، نامىسىنا تيە المايدى دا. سەبەبى، ول (ارىستانبەك مۇحامەدي ۇلى - اگەنتتىك) قىرعىزداردى قاتتى قۇرمەتتەيدى. كەرىسىنشە، ول شىڭعىس ايتماتوۆتاي ۇلى بار قىرعىز باۋىرلارىمىزدىڭ ۇلىلىعىن اتاپ كورسەتكىسى كەلدى. ونىڭ ايتپاعى وسى ەدى. ياعني، قىرعىز باۋىرلارىمىزدى قورلايىن دەگەن ويى بولعان جوق. ول كەيىن ءسوزى ءۇشىن ءوزى جاۋاپ بەردى»، - دەدى ە. ىدىرىسوۆ.
سىرتقى ىستەر ءمينيسترى اتاپ وتكەندەي، بۇل جاعداي ەكى ەل اراسىنداعى قارىم-قاتىناسقا كولەڭكەسىن تۇسىرگەن جوق.
«رەسمي تۇردە بۇل جاعدايدى رەتتەدىك. مەن قىرعىز رەسپۋبليكاسىنىڭ سىرتقى ىستەر مينيسترىمەن سويلەستىم. ياعني، وقىستان شىققان ءسوزدى تەرىس تۇسىنگەندەر ول ءسوزدى ەموتسيامەن وزگەرتىپ جەتكىزگەنىن ايتتىم. قازاقستان مەن قىرعىز رەسپۋبليكاسىنىڭ قارىم-قاتىناسى بۇزىلعان جوق»، - دەدى ە. ىدىرىسوۆ.
اۆتور: كەنجەكەي توقتامۇرات قىزى