الماتى اۆتوبۋستارىندا ءبىر رەتتىك جول ءجۇرۋ بيلەتتەرى ەنگىزىلەدى - فوتو

الماتى. قازاقپارات - الماتىنىڭ قوعامدىق كولىكتەرىندە ءبىر رەتتىك جول ءجۇرۋ بيلەتتەرى ەنگىزىلەدى.

ولاردى قولما- قول اقشاعا ساتىپ الۋعا بولادى. بۇل تۋرالى بۇگىن الماتىدا قوعامدىق كولىك جۇيەسىنە ەنگىزىلگەن جاڭا 35 اۆتوبۋستى تانىستىرۋ بارىسىندا بەلگىلى بولدى.

تانىستىرۋ ءراسىمى بارىسىندا الماتى اكىمى باۋىرجان بايبەك قازاقستاندا شىعارىلعان جانە گازبەن جۇمىس ىستەيتىن جاڭا اۆتوبۋستاردى مۇقيات قاراپ شىقتى. ولاردى 1 ميلليارد 200 مىڭ تەڭگەگە Green Bus كومپانياسى ساتىپ العان. بۇل اۆتوبۋستار 35- جانە 29- باعدار بويىنشا جۇمىس ىستەيدى. كومپانيا سونىمەن قاتار، قالا كۇنى قارساڭىندا تاعى 102 اۆتوبۋس ساتىپ الۋدى جوسپارلاپ وتىر.

«Green Bus» ج ش س ديرەكتورى باۋىرجان قۇلىشەۆ بۇگىندە كومپانيا بيلەتسىز جۇرەتىن جولاۋشىلاردىڭ سەبەبىنەن شىعىن كورىپ جاتقاندىعىن ايتتى. بۇگىندە الماتىدا جولاۋشىلاردىڭ 40 پايىزى بيلەتسىز جۇرەدى ەكەن.

«الماتىنىڭ كولىك حولدينگى» ج ش س ديرەكتورىنىڭ مىندەتىن اتقارۋشى سادىر حامرايەۆتىڭ ايتۋىنشا، بۇگىندە الماتى اۆتوبۋستارىندا ءبىر رەتتىك بيلەتپەن جۇرۋگە بولادى.

«قازىر بۇل جۇيە كەزەڭ- كەزەڭمەن ەنگىزىلىپ جاتىر. كوپ ۇزاماي بارلىق باعداردا قولدانىلاتىن بولادى. ءبىرىنشى Green Bus كومپانياسىنىڭ اۆتوبۋستارىندا قولدانىلادى. شىلدە ايىنىڭ سوڭىنا قاراي ءبىر رەتتىك جول ءجۇرۋ بيلەتتەرى تولىعىمەن ەنگىزىلەدى. بۇل بالاما تولەماقىلارى قالا قوناقتارى ءۇشىن ەنگىزىلىپ وتىر. ەندى، بيلەتسىز جۇرگەن جولاۋشىلاردى انىقتاۋ وڭايعا تۇسەدى. قازىر قالادا جول اقىسى - 80 تەڭگە. ال الەم ەلدەرىندە ءبىر رەتتىك جول ءجۇرۋ بيلەتى قىمبات تۇرادى. ەگەر قالا باسشىلىعى سارالانعان تاريف جۇيەسىن ەنگىزەتىن بولسا، وندا قالادا ءبىر رەتتىك جول ءجۇرۋ بيلەتى قىمبات بولادى.

   

 اۆتور: ايبوتا جاپپاربەرگەن