كەڭەس: ماسالاردى جولاتپايتىن وسىمدىكتەر مەن امالدار

استانا. قازاقپارات - جاز كەلىسىمەن ماسالار مازانى قاشىرادى. ولاردان دالادا دا، ۇيدە دە جاسىرىنۋ مۇمكىن ەمەس.

بۇل جاندىكتەردەن قورعانۋدىڭ حالىق اراسىندا تاراعان ءادىس- تاسىلدەر كوپ.

ماسالار قازتاماق، قىزاناق جانە رايحان گۇلدىڭ ءيىسىن جاقتىرمايدى. گۇل سالىنعان ىدىستى تەرەزە الدىنا قويسا، جاندىكتەردىڭ بولمەگە كىرمەيتىنىن اڭعارۋعا بولادى. ۇيدە چەرري (بۇرىش) قىزاناعى مەن رايحان گۇلىن وسىرۋگە بولادى. ولاردىڭ جەمىسى كادەگە جارايدى.

ۆانيلدى ءىرىتىندىنىڭ كومەگىمەن دالادا ماسالاردان قورعانۋعا بولادى. ءبىر اس قاسىق ۆانيل ۇنتاعىن جارتى ستاقان سۋعا ەزىپ، بۇل ەرىتىندىنى كيىمگە، دەنەنىڭ اشىق جەرلەرىنە جاعىڭىز. ۆانيلينگە ءبىر اس قاسىق بالالار كرەمىن قوسۋعا بولادى. بۇدان كەيىن ەشبىر ماسا جولامايدى!

قايناتىلعان جۋسان تامىرى دا ماسالارعا قارسى جاقسى اسەر ەتەدى. جۋساننىڭ قۇرعاق تامىرلارىنا (ءدارىحانادان دايىن قوسپا ساتىپ الۋعا بولادى) ءبىر ليتر سۋ قۇيىپ، قايناتىپ، وتتان العان سوڭ بىرنەشە ساعات سۋىتۋ كەرەك. كەيىن بۇل قايناتپانى كيىمگە جانە دەنەگە سەۋىپ، ءتىپتى، كەرەۋەت ماڭىنداعى ەدەندى سول سۋمەن جۋۋعا بولادى.

مويىل گۇلدەرى، رايحان جاپىراقتارى مەن بيدايىق تامىرىنىڭ قايناتپالارى دا وسى ىسكە كومەگى تيەدى.

كەرەۋەت ماڭىنا ۆالەريان تۇنباسىنا قانىققان (مالىنعان) سپونجيكتەردى قويىڭىز. ماسالار ءسىزدى مازالامايدى. الايدا ۇيدە مىسىعى بارلارعا بۇل ءادىس جارامايدى.