تەراكتىدە جاراقات العان قارۋ دۇكەنىنىڭ ساتۋشىسىن قۇتقارعان اقتوبە مەدبيكەسى ماراپاتتالدى
دەپ جازادى وبلىستىق «اقتوبە» گازەتى.
وقيعا بولعان كۇنى «پانتەرا» دۇكەنىنىڭ ساتۋشىسى المات راحمەتوۆ اۋىر جارالانىپ، اۋرۋحاناعا تۇسكەن بولاتىن. دارىگەرلەر الماتتىڭ امان قالۋى العاشقى كومەك كورسەتكەن مەدبيكەنىڭ ارقاسى ەكەنىن ايتقان ەدى. وقيعانىڭ قالاي بولعانىن مەدبيكەنىڭ وزىنەن سۇرادىق.
«مەن «پانتەرا» دۇكەنى ورنالاسقان ءۇيدىڭ ەكىنشى قاباتىندا تۇرامىن. سول كۇنى تۇستەن كەيىن، ساعات ءۇشتىڭ شاماسىندا بىرەۋ ەسىك قاعىپ، كومەك سۇرادى. ەسىكتى اشسام، ءۇستى- باسى قان ازامات دۇكەندە اتىس بولعانىن، كومەكتەسۋىمدى ءوتىندى. العاشقىدا ساسىپ قالدىم، ءبىراق دەرەۋ ەسىمدى جيىپ ۇيگە كىرگىزدىم. كوشەدەگى توبەلەستەن بولعان شىعار دەپ ويلادىم. ويتكەنى سول ۋاقىتتا ءۇيدىڭ اينالاسىنان تارسىلداعان دىبىستار شىعىپ جاتتى. ساتۋشىنىڭ باسى جارالانعان، قۇلاعى تەرىسىنەن ءبولىنىپ تۇر. كەۋدەسىنەن دە جاراقات العان، اياعىنىڭ سۇيەگى كورىنەدى. قاننىڭ كوپ كەتكەنى سونداي، دەنەسى كورىنبەيدى.
دەرەۋ تاڭعىش الىپ، قاندى توقتاتۋعا تىرىستىم. جەدەل جاردەم كولىگىن شاقىرتتىق. ءبىراق كولىك ءۇش ساعاتتان كەيىن كەلدى. ويتكەنى ءبىزدى كەپىلدىككە الدى دەپ ويلاپ، كەلۋگە قورىقسا كەرەك. ۇيدەگى ەكى ۇلىم قورقىپ، بولەك بولمەگە كەتتى. جۇبايىم تەلەفون تۇتقاسىن الىپ ۇزدىكسىز جەدەل جاردەم شاقىرۋمەن بولدى»، - دەيدى ستەللا.
وقيعا ورنىنا پوليتسيا قىزمەتكەرلەرى جەتكەننەن كەيىن، ستەللانىڭ كۇيەۋى تەرەزەدەن ايقايلاپ، جاراقات العان ادامنىڭ ءولىم اۋزىندا جاتقانىن ايتادى. ىشكى ىستەر قىزمەتكەرلەرى الدىمەن ۇيدەن ءۇي يەسىنىڭ ءوزى شىقسىن دەيدى. تەرەزەدەن تۇسكەن كۇيەۋى ءمان- جايدى ايتقان سوڭ، جەدەل جاردەم كولىگى الماتتى اۋرۋحاناعا الىپ كەتەدى.
«جەدەل جاردەم قىزمەتكەرلەرى كەلگەنشە جاراقات العان ادامنىڭ قاسىندا بولدىم. ول دا ازامات ەكەن، قينالسا دا شىداۋعا تىرىسىپ جاتتى. جالپى بۇنداي جاعداي مەدبيكەلەرگە جاقسى تانىس. ءوزىمنىڭ 18 جىل ەڭبەك وتىلىمدە اۋىر جاراقات العان تالاي ادامعا كومەكتەستىم. سودان بولار ۇرەيلەنۋ، قورقۋ، سەكىلدى سەزىم بولعان جوق، تەك قالايدا قاندى توقتاتىپ، جەدەل جاردەم كولىگى كەلگەنشە امان الىپ قالۋدى ويلادىم»، - دەيدى ستەللا.
المات راحمەتوۆكە مەديتسينالىق كومەك كورسەتىلگەننەن كەيىن، اپاسى كەلىپ ستەللاعا العىسىن ايتىپ كەتتى.
«بۇل مەنىڭ دارىگەرلىك قىزمەتىم، بىرەۋگە ىستەگەن جاقسىلىعىمدى مىندەت قىلۋدان اۋلاقپىن. ءبىراق ادامداردىڭ وسىنداي ىستىق ىقىلاسى كوڭىلىمە ەرەكشە قۋانىش سىيلايدى»، - دەدى مەدبيكە.
«دارۋ» وڭالتۋ ورتالىعىندا وتكەن جيىندا قالا اكىمىنىڭ ورىنباسارى دارىگەرلەردى ءتول مەرەكەسىمەن قۇتتىقتاپ، ولاردىڭ وتباسىلارىنا اماندىق تىلەدى. سونداي- اق تەررورلىق ارەكەت كەزىندە مىندەتىن مۇلتىكسىز ورىنداعان مەدبيكە ستەللا مولديمانوۆانىڭ ەڭبەگىن جوعارى باعالاپ، العىس حات تابىستادى.
ستەللا مارات قىزىنىڭ «دارۋ» ورتالىعىندا جۇمىس ىستەگەنىنە ءۇش جىلدان اسىپتى. ورتالىق ديرەكتورى عالىمجان ەلەۋوۆ تە مەدبيكەنىڭ ەرلىگىنە ريزاشىلىعىن ءبىلدىرىپ، العىس ايتتى. سونداي- اق مەرەكە قارساڭىندا وزگە دە دارىگەرلەر مەن مەدبيكەلەردى ورتالىق اتىنان قۇتتىقتاپ، العىس حاتتار تابىس ەتتى.
كامشات قوپايەۆا