ۇكىمەت باسشىسى ەل ەكونوميكاسىنا قاتىستى ەكى ماسەلە بار ەكەنىن ايتتى

استانا. قازاقپارات - قازاقستاننىڭ ەكسپورتتىق تاۋارلارى باعاسىنىڭ تۇراقتالۋى ۇزاققا سوزىلاتىن ءتۇرى بار.

بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا دەپۋتاتتاردىڭ ساۋالىنا جاۋاپ بەرگەن ق ر پرەمەر-ءمينيسترى كارىم ءماسىموۆ ءمالىم ەتتى.

«2015 -جىلدىڭ جەلتوقسانىنان باستاپ بۇگىنگى كۇنگە دەيىن مەملەكەت باسشىسىنىڭ تاپسىرماسىمەن ۇكىمەتپەن، ۇلتتىق بانكپەن، وبلىس اكىمدەرىمەن، ۇلتتىق كومپانيالار مەن حولدينگتەردىڭ باسشىلارىمەن ەكونوميكاداعى تۇراقتىلىقتى قامتاماسىز ەتۋگە باعىتتالعان ۇلكەن جۇمىستار اتقارىلدى دەپ سانايمىن. ەستەرىڭىزگە سالا كەتسەم، 2015 -جىلدىڭ جەلتوقسانىندا قازاقستان ەكسپورتقا شىعاراتىن نەگىزگى تاۋارلار مۇناي، مۇناي ونىمدەرى، شيكىزاتتاردىڭ باعاسى كۇرت قۇلدىراپ كەتكەن بولاتىن. شىندىعىن ايتقاندا، تومەن نۇكتەدەگى مۇنداي باعا كونيۋكتۋراسىنا وراي زور قاۋىپ تە بولعان ەدى»، - دەدى ول.

وسى رەتتە ۇكىمەت باسشىسى ءبىر كەزدەرى Brent ماركالى مۇنايدىڭ باعاسى بارەلىنە 26 دولارعا دەيىن تومەندەگەندىگىن دە ەسكە سالىپ، مۇنداي تومەن باعا كونيۋكتۋراسى ۇزاق ۋاقىت ساقتالادى دەگەن قاۋىپتىڭ دە بولعانىن جاسىرمادى.

«سوندىقتان دا ءبىز سىزدەرگە جۇگىندىك. سىزدەر قولداۋ كورسەتتىڭىزدەر. ءبىز ورىن الىپ وتىرعان جايتقا قارجىلىق مۇمكىنشىلىكتەرىمىزدى بەيىمدەۋ ءۇشىن 2016 -جىلدىڭ بيۋدجەتىن قايتا قارادىق. قازىر وتكىر فازا بەلگىلى ءبىر دەڭگەيدە ءوتىپ بارا جاتىر. مۇناي باعاسى بارەلىنە 50 دوللارعا جاقىنداپ قالعانىن كورىپ وتىرمىز. بىردەن كوتەرىلەدى، بىردە تۇسەدى. باسقا دا شيكىزاتتاردىڭ باعاسى بەلگىلى ءبىر دەڭگەيدە تۇراقتالۋ ۇستىندە. وكىنىشكە وراي، بۇل ۇزاققا سوزىلاتىن ءتۇرى بار»، - دەدى ك. ءماسىموۆ.

سونداي-اق، ۇكىمەت باسشىسى بانك جۇيەسى كاسىپكەرلىكتى دامىتۋدى جەتكىلىكتى دەڭگەيدە قارجىلاندىرىپ وتىرعان جوق ەكەنىن اتاپ ايتتى.

ك. ءماسىموۆ كەشە «اتامەكەن» فورۋمىندا كاسىپكەرلەرمەن كەزدەسىپ، ولارمەن كاسىپكەرلىكتى دامىتۋدى قالاي جۇزەگە اسىرۋعا بولاتىندىعىن جان- جاقتى تالقىلاعاندىقتارىن اتاپ ءوتتى.

«بۇل رەتتە بانك جۇيەسىنىڭ قىزمەتىنە قاتىستى كوپتەگەن ماسەلەلەر بار. ۇلتتىق بانكتىڭ بانك جۇيەسىن تازارتۋ جانە ىنتالاندىرۋ جۇمىستارى وتە ۇلكەن مانگە يە. وكىنىشكە وراي، بۇگىنگى كۇنى بانك جۇيەسى مەنىڭ پايىمداۋىمشا، كاسىپكەرلىكتى دامىتۋدى جەتكىلىكتى دەڭگەيدە قارجىلاندىرىپ وتىرعان جوق. سوندىقتان دا مەملەكەتكە پرەزيدەنتتىڭ تاپسىرماسىمەن ەكونوميكانى ىنتالاندىرۋ ءۇشىن قوسىمشا رەسۋرستار تابۋىنا تۋرا كەلىپ وتىر»، - دەدى ك. ءماسىموۆ.

سونىمەن قاتار ول قوسىمشا قارجى رەسۋرستارىن تابۋ ۇلكەن جۇمىستار ەكەندىگىن ايتا كەلە وسىعان وراي الداعى ۋاقىتتا ءبىرقاتار زاڭنامالىق وزگەرىستەردىڭ دە ورىن الۋى ىقتيمال ەكەندىگىن ەسكەرتتى.