جالعىز باستى اناعا ون كەڭەس
قاي انا بالانىڭ اكەسىز وسكەنىن قالايدى؟ الايدا، تاعدىردىڭ سىناعىنا ۇشىراپ، بالانى جالعىز تاربيەلەپ جاتقان انالار از ەمەس. ونداي انالار ءسىزدىڭ دە تانىستارىڭىزدىڭ اراسىندا بار شىعار؟ ولاي بولسا، ولارعا Comode ۇسىنعان كەڭەستەر ارتىق بولماس.
1. ءسىز جالعىز ەمەسسىز
ءيا، بالانى اكەسىز تاربيەلەپ جاتقان ءسىز عانا ەمەس. ونداي انالار جەتكىلىكتى. ارينە، بالاڭىزدىڭ قاسىندا اسىر سالىپ ويناپ جۇرگەن اكەسى بار دوستارىنىڭ قاراپ، بالاڭىزدى اياپ، كوڭىلىڭىز ءتۇسۋى دە مۇمكىن.
سونداي كەزدەردە ءسىزدىڭ بالاڭىز اكەنىڭ تاربيەسىن كورمەي ءوسىپ كەلە جاتقان جالعىز بالا بولىپ كورىنەدى دە. ءبىراق، بۇل ولاي ەمەس. ءسىز جالعىز ەمەسسىز.
2. اكەسىز وسكەن ۇلى تۇلعالار مەن تانىمال ادامدار از با؟
شارليز تەرون، دەمي مۋر، كيانۋ ريۆز، نەلسون ماندەلا جانە ت. ب. ءومىردىڭ ەڭ بيىك بەلەستەرىن باعىنىدىرا العان وسىنداي بالالاردى تاربيلەگەن انادان ءسىزدىڭ قاي جەرىڭىز كەم؟ ءسىز دە بالاڭىزدى بولاشاق قولباسشى قىلا الاسىز.
3. اكەنىڭ ورنىن ءوزىڭىز باسپاڭىز
جالعىز باستى انالاردىڭ ەڭ ءجيى جىبەرەتىن قاتەلەرىنىڭ ءبىرى - بالاعا اكە دە بولۋ، شەشە دە بولۋ. بۇلاي ىستەۋدىڭ قاجەتى جوق. بىرىنشىدەن، بۇل بالانىڭ وتباسىلىق مودەلىنىڭ بۇزىلۋىنا الىپ كەلەدى.
بالا ايەل ادامدى نازىك جان ەمەس، ەر مىنەزدى ەركەك سياقتى بولۋ كەرەك دەپ ەسەپتەيدى. ەكىنشىدەن، بالاعا اكە دە، شەشە دە بولۋ وتە كوپ ەڭبەكتى تالاپ ەتەدى.
بۇنداي اۋىرتپاشىلىقتى ءسىز ۇزاق ۋاقىت بويى ءبارىبىر ارقالاپ جۇرە المايسىز. سوڭىندا اكە بىلاي تۇرسىن، دەنى دۇرىس انا بولا الماي قالاسىز. بالاعا جاقسى انا بولىڭىز. سول ەڭ ابزالى.
4. باقىتسىز اكە- شەشەدەن باقىتتى اكە مەن انا ارتىق
كەي جاعدايلاردا ءبىر وتباسى مۇشەلەرى ءبىر- ءبىرىن باقىتتى قىلا المايدى. ءوزى باقىتسىز ادام ەشكىمگە باقىت سىيلاي المايدى. ءتىپتى، ءوز بالاسىنا دا. بۇل تۋرالى پسيحولوگ مامانداردىڭ ايتىپ جۇرگەنىنە ۇزاق ۋاقىت بولدى.
ءبىر- ءبىرىن جەك كورەتىن اتا- اناسى بار وتباسىندا بالا دۇرىس تاربيە المايدى. بولەك تۇراتىن باقىتتى اكە- شەشە، بىرگە تۇراتىن باقىتسىز ادامداردان ارتىق. تەك سول كەزدە بالا ومىردە باقىتتى بولۋدىڭ ەڭ ماڭىزدى ەكەنىن ءتۇسىنىپ، ەرتەڭ باقىتتى بولۋعا تالپىنادى.
5. بالاعا اكەسىن جامانداماڭىز
بالا ءۇشىن اكەسى - ومىرلىك اۆتوريتەت(ابىروي، بەدەل). جانە سولاي بولعانى دا دۇرىس. اكەسىن جامانداۋ سول اۆتوريتەتتى تومەندەتۋ. بۇل قىزدار ءۇشىن دە، ۇل بالالار ءۇشىن دە جامان. سەبەبى، قىزدار ءۇشىن اكە - ومىرىندەگى ءبىرىنشى ەر ادام.
اكەسىنىڭ ماقتاۋ سوزدەرىن ەستىگەن قىز ءوزىن ءوزى سىيلايتىن، وزىنە ءوزى سەنەتىن، ومىرلىك جارىن دۇرىس تاڭداي الاتىن ايەل بولىپ وسەدى. ۇلدار ءومىر يەرارحياسىندا ءوز ورنىن تابا الاتىن ەر ادام بولادى. سول سەبەپتەن بۇل اۆتوريتەتتى جامانداماڭىز. الايدا، وتىرىك ماقتاۋدىڭ دا قاجەتى جوق.
6. ۇل بالانى وعان ۇلگى بولاتىن ەر ادامدارمەن قورشاڭىز
ول بالانىڭ اتاسى، اعاسى، ناعاشىلارى، ت. ب. بولۋ مۇمكىن. ەڭ باستىسى، ول بالاعا ەر ادامنىڭ تاربيەسىن بەرە الاتىن بولۋى كەرەك.
ونداي ادام تابىلماعان جاعدايدا، بالانى سپورتقا بەرىپ، سول جەردەگى جاتتىقتىرۋشىمەن سويلەسىپ، جاعدايدى تۇسىندىرۋگە بولادى.
7. كومەكتەن باس تارتپاڭىز
بالا تاربيەلەۋ وڭاي ەمەس. بالانى جالعىز تاربيەلەۋ - ەكى ەسە اۋىر. سول سەبەپتەن تۋما- تۋىسقانداردىڭ، جاقىن ادامداردىڭ كومەگىنەن باس تارتپاڭىز. كەرەك كەزدە كومەك سۇراپ ۇيرەنىڭىز. الايدا، ادامدار سىزگە مىندەتتى ەمەس ەكەنىن ۇمىتپاڭىز.
8. بالاڭىزدى شامادان تىس ەركەلەتپەڭىز
بالامنىڭ اكەسى جوق دەپ قالاعانىن ورىنداپ، سۇراعانىن الىپ بەرىپ، شەكتەن تىس ەركەلەتىپ كەتۋ دە ۇلكەن قاتە. ونداي بالا اناسىنا العىس ايتۋدىڭ ورنىنا ەگوسەنتريست(داراشىل، مەنمەن - رەد.) بولىپ ءوسۋى ابدەن مۇمكىن.
9. بالاعا اكەنىڭ جوقتىعىن دۇرىس ءتۇسىندىرىڭىز
اكەسى قايتىس بولسا، ادامداردىڭ بارلىعى ماڭگى ءومىر سۇرمەيتىنىن، اللانىڭ بەرگەن تاعدىرى ءتۇرلى بولاتىنىن ايتقان ابزال.
اكەسىمەن اجىراسىپ كەتسەڭىز اجىراسۋدىڭ سەبەبىن بالاعا تۇسىنىكتى تۇردە جەتكىزىڭىز. ءبىراق، «قول كوتەردى»، «كوزىمە ءشوپ سالدى» دەگەن سەبەپتەردى بالاعا ەسەيگەنشە ايتپاعان ابزال.
10. ءوزىڭىزدى ۇمىتپاڭىز
جالعىز باستى انا دا - ايەل. ايەل رەتىندە ءوزىڭىزدى ۇمىتپاڭىز. وزىڭىزگە كۇتىم جاساپ، جەتكىلىكتى دارەجەدە ۋاقىت ءبولىڭىز. كىتاپ وقىڭىز، قۇربىلارىڭىزبەن كەزدەسىپ تۇرىڭىز، سۇلۋلىق سالوندارعا بارىپ تۇرىڭىز. بالاڭىزبەن ءومىرىڭىزدى شەكتەپ قويماڭىز.
nur.kz