قىسقا بالاق، جاراسىمسىز ساقالدىلاردى بايقاماعان سىڭاي تانىتىپ، قۇقىقتىق شەكتەۋ ارقىلى جاۋاپقا تارتا الماي كەلە جاتىرمىز - سەناتور م. باقتيار ۇلى
بۇگىن پارلامەنت سەناتىنىڭ جالپى وتىرىسىندا ەلدەگى ءدىني احۋالعا قاتىستى ماسەلە كوتەرگەن سەناتور مۇرات باقتيار ۇلى وسىلاي ايتتى.
ءسوز اراسىندا دەپۋتات قاسيەتتى رامازان ايىنىڭ باسىندا اقتوبە قالاسىندا ورىن العان تەراكتى سالدارىنان جازىقسىز جانداردىڭ قازا تابۋى بارشا قازاقستاندىقتاردى ءدۇر سىلكىندىرگەنىن اتاپ ءوتتى. ونىڭ پايىمىنشا، بۇل ءدىني اعىمنىڭ ارتىندا مول قارجى مەن سۇرقيا ساياسات تۇرعانى اقيقات. «ەلىمىزدە ءداستۇرلى ەمەس ساياسيلانعان يسلام ىقپالىنا ۇيىرۋشىلەردىڭ ءدىني ۇستانىمدارى ءبىزدىڭ ۇلتىمىزدىڭ مىڭداعان جىلدار بويى ۇستانىپ كەلە جاتقان ءداستۇرلى دىنىمىزگە مۇلدەم قايشى، كوپ جاعدايلارعا اگرەسسيالىق سيپاتتا كورىنەدى. وكىنىشكە قاراي، قاسيەتتى ءدىنىمىزدى كۇنكورىستىڭ تاسىلىنە، تەكەتىرەستىك پەن وشپەندىلىكتىڭ ايلاسىنا اينالدىرعان ءداستۇرلى ەمەس ءدىني اعىمدار كۇندەلىكتى ومىردە كورىنىس بەرىپ جاتىر.
كەيبىر مەشىت الدىندا ءتۇرى قازاق، ءبىراق قازاققا مۇلدەم جات، ارابتانعان بەينەسىمەن جارناما جاساپ تۇرعان تەرىس اعىمداعى باۋىرلارىمىزدى، قازاقستان مۇسىلماندارى ءدىني باسقارماسىنىڭ يمامىنىڭ ۋاعىزىن قۇلاققا ىلمەي، اشىقتان اشىق نارازىلىق تانىتىپ جۇرگەن، قىسقا بالاق، جاراسىمسىز ساقالدىلاردى وسى كەزگە دەيىن بايقاماعان سىڭاي تانىتىپ، قۇقىقتىق شەكتەۋلەر ارقىلى جاۋاپقا تارتا الماي كەلە جاتىرمىز. وسى ورايدا، وي- ساناسى ءالى تولىق قالىپتاسىپ بولماعان جاستارىمىزدى جات اعىمداعى ءدىني باعىتتارعا كىمدەر تارتىپ جاتىر، كىم ۋاعىز ايتىپ ءجۇر دەگەن ماسەلەگە نازار اۋدارۋ كەرەك ەدى. بۇل بارشا قوعامدى ويلاندىراتىن ءارى جەدەل شارا قابىلداۋدى قاجەت ەتەتىن جاعداي»، دەدى سەناتور.
ونىڭ ايتۋىنا قاراعاندا، ءدىني ەكسترەميزم مەن جات اعىمداردىڭ ەلىمىزدىڭ قاي وڭىرىندە بولماسىن تارالۋى ءدىني ساۋاتسىزدىقتان تۋىپ وتىر. سونىمەن قاتار، دەپۋتات قازاقستانداعى كوپتەگەن يمامداردىڭ ءدىني ساۋاتتىلىعىن سىنعا الىپ، ولاردىڭ شەشەندىك ونەرى مەن ۋاعىزىنىڭ تومەندىگىن، اڭگىمەسىنىڭ ومىردەن تىم الشاقتىعىنا نالىدى.
«ءبىزدىڭ ءدىني ۇستانىمىمىز ەل بىرلىگى بولۋى ءتيىس. ولاي بولسا، ەلىمىزدەگى ءداستۇرلى ەمەس جات اعىمداردى شەكتەيتىن باتىل ساياسي شەشىم، قۇقىقتىق رەتتەۋ، اقپاراتتىق ءتۇسىندىرۋ مەن عىلىمي ساراپتاۋ، قوعامدىق ءدىني وي سالالارىنا تۇجىرىمدار تەز ارادا جاسالۋى ءتيىس. ماسەلەن، وزبەكستان، تاجىكستان سەكىلدى باۋىرلاس ەلدەر تاجىريبەسىندە ولار ءوز تاۋەلسىزدىكتەرىنە قاۋىپ توندىرەتىن ءداستۇرلى ەمەس بارلىق ءدىني اعىمعا الدەقاشان زاڭدى شەكتەۋ قويعان. ساۋاتتى يمامدار دايارلاۋ، ولاردىڭ بىلىكتىلىگىن ارتتىرۋ ارقىلى يمامداردىڭ تەك ءدىني ەمەس، زايىرلى ءبىلىم ۇيرەنىپ، شەشەندىگى، كەلبەتى، ءجۇرىس- تۇرىسى كوركەم مىنەزدىلىگىنە ءمان بەرىلسە. مۇمكىن ارنايى قور قۇرۋ ارقىلى قازاقستان مۇسىلماندارى ءدىني باسقارماسىنا قاراستى مەشىتتەردە قىزمەت جاسايتىن بارلىق مولدالار مەن يمامدارعا ايلىق جالاقىنى تولەۋ جۇيەسىن قۇراتىن كەز جەتتى. ەلىمىزدەگى ءداستۇرلى دىنىمىزگە كولەڭكە تۇسىرەتىن سايتتاردىڭ، اسىرەسە «ۆكونتاكتە» الەۋمەتتىك جەلىسىندەگى جاۋاپكەرشىلىكتى بارىنشا قاتايتۋ، قاجەت بولسا جاۋىپ تاستاۋ تەتىكتەرىن جاساۋ كەرەك. ەلىمىزدىڭ قاۋىپسىزدىگىنە نۇقسان كەلتىرەتىن راديكالدى ءدىني اعىمداعى كوزقاراستى مىعىم ۇستانىپ، ونى ناسيحاتتاپ جۇرگەن ازاماتتاردى مەملەكەتتىك قۇرىلىم، ورتا جانە ارناۋلى وقۋ ورىندارىنا، بۇقارالىق اقپارات قۇرالدارىندا جۇمىس ىستەۋىنە تىيىم سالۋ كەرەك»، دەدى م. باقتيار ۇلى.
اۆتور: قانات مامەتقازى ۇلى