centralasian.org سايتى تاراتقان اقپاراتقا سايكەس، ا ق ش پرەزيدەنتى باراك وباما سەيسەنبى كۇنى رەسپۋبليكالىق پارتيا اتىنان پرەزيدەنتتىككە ىقتيمال كانديدات دونالد ترامپتىڭ مۇسىلماندارعا قاتىستى مالىمدەمەسىنە «ول ءۇشىن امەريكانىڭ قاۋىپسىزدىگىن ويلاۋدان گورى ساياسي ادەپتى بولۋ الدەقايدا ماڭىزدى» دەدى.
«مەن پرەزيدەنت بولعان جەتى جارىم جىل ىشىندە «راديكالدى يسلام» تەرمينىن قولدانباي، ستراتەگيامىزدى جۇرگىزىپ كەلە جاتىرمىز. باسقا تەرمين قولدانۋ ارقىلى ءبىز قاۋىپتەن قاشا المايمىز»، - دەپ اتاپ ءوتتى پرەزيدەنت وباما. ول دونالد ترامپتىڭ مالىمدەمەسى تەرروريستەر ءۇشىن «وتقا ماي قۇيعانداي» ءتيىمدى بولادى دەدى.
«بۇل ولاردىڭ ناسيحاتى، وسى ارقىلى ولار قاتارىنا ادام جينايدى. ەگەر ءبىز قاقپانعا ءتۇسىپ، مۇسىلمانداردى باسقاشا سيپاتتاساق، ءبىز سوعىس جاعدايىندا قالامىز، ءبىز تەرروريستەرگە جاعداي جاساپ بەرەمىز»- دەدى باراك وباما.
ترامپتىڭ مالىمدەمەسىنە رەسپۋبليكالىق پارتيانىڭ كونگرەسستەگى وكىلى، سپيكەر پول رايان دا قارسى شىقتى. «مەن مۇسىلماندارعا ەلگە كىرۋگە تىيىم سالۋ، ءبىزدىڭ پايدامىزعا شەشىلەدى دەپ ويلامايمىن. مۇنداي قادام ءبىزدىڭ ەلدىڭ مۇددەسىنە سايكەس كەلەدى دەپ ويلامايمىن»، - دەپ اتاپ ءوتتى پول رايان.
دۇيسەنبى كۇنى دونالد ترامپ ورلاندوداعى گەي-كلۋبتا 50 ادام قازا تاپقان تەرروريستىك اكتىگە پىكىرىن ءبىلدىرىپ، مۇسىلمانداردى امەريكاعا كىرگىزۋگە تىيىم سالۋ كەرەك دەگەن.
baq.kz