الماتىدا «اڭىز دومبىرا» رەسپۋبليكالىق بايقاۋ- بايگەسى ءوتىپ جاتىر - فوتو
سونىڭ الدىندا ۇيىمداستىرۋشىلار جۋرناليستەرمەن كەزدەسىپ، باسپا ءسوز ءماسليحاتىن وتكىزگەن بولاتىن.
«بايقاۋدىڭ ماقساتى - قازاقتىڭ ۇلتتىق قۇندىلىقتارىنىڭ ءبىرى، عاسىرلار بويى ءاربىر قازاق وتباسىنىڭ تورىنەن ورىن الىپ كەلە جاتقان قاسيەتتى قارا دومبىرانىڭ مارتەبەسىن كوتەرۋ، ونى جاساۋشى شەبەرلەردىڭ ونەرىن جانداندىرۋ. سونداي- اق، جاستاردىڭ ۇلتتىق قۇندىلىقتارعا دەگەن قىزىعۋشىلىعى مەن قۇرمەتىن وياتۋ»، - دەدى ءو سوزىندە ىقىلاس اتىنداعى حالىق مۋزىكالىق اسپاپتارى مۋزەيىنىڭ ديرەكتورى، جىرشى ۇلجان بايبوسىنوۆا.
ءوز كەزەگىندە ق ر مادەنيەت قايراتكەرى، كۇيشى مۇرات ءابۋعازى بايقاۋدىڭ باستى ەرەكشەلىكتەرىنە توقتالدى.
«رەسپۋبليكالىق دەڭگەيدە تۇڭعىش رەت ۇيىمداستىرىلىپ وتىرعان بۇل بايقاۋدا دومبىرانىڭ ەكى ءتۇرلى ۇلگىسى قاتىستىرىلادى. ءبىرى - باتىس قازاقستان وڭىرىندە قالىپتاسقان، توكپە كۇي تارتۋعا ارنالعان كادىمگى قۇراما شاناقتى دومبىرا. بۇعان دەيىنگى قانداي دا ءبىر بايقاۋلاردا كوپ جاعدايدا وسى دومبىرا عانا باعالانىپ كەلگەنى بەلگىلى. ەكىنشىسى - مىنا ارقا مەن التايدىڭ اراسىندا قالىپتاسقان، اتاقتى تاتتىمبەت كۇيشىدەن باستاۋ الاتىن شەرتپە كۇي ونەرىندە قولدانىلاتىن قالاق دومبىرا. بۇل دومبىرا مۇنداي دەڭگەيدەگى بايقاۋعا تۇڭعىش رەت قاتىستىرىلىپ وتىر. ونىڭ قۇراما شاناقتى دومبىراعا قاراعاندا از پايدالانىلۋىنىڭ سەبەبى - ونى جاساۋشى شەبەرلەر از بولدى. ونىڭ ۇستىنە كەزىندە 1934 -جىلى احمەت جۇبانوۆ قۇرمانعازى اتىنداعى وركەستردى قۇرعاندا نەگىزىنەن قۇراما شاناقتى دومبىرالار پايدالانىلدى عوي. سودان بەرى، ەلىمىزدە كۇيلەردىڭ بارلىعىن دەرلىك وسى قۇراما شاناق دومبىرامەن ورىنداۋ ءداستۇرى قالىپتاستى»، - دەدى م. ءابۋعازى.
سونىمەن قاتار ول، بايقاۋ بارىسىندا دومبىرالار 7 ءتۇرلى تالاپ بويىنشا باعالاناتىندىعىن ايتتى.
«ءبىرىنشى، دومبىرانىڭ ءۇنى تازا، قوڭىر، تەمبرى جۇمساق، قۇلاققا جاعىمدى بولۋى قاجەت. ەكىنشى، ىشەكتىڭ تەربەلىسى ءجيى بولۋى كەرەك. ءۇشىنشى، دىبىس نەعۇرلىم الىسقا جەتۋى شارت. ءتورتىنشى، دومبىرانىڭ بەت قاقپاعىنىڭ جاڭعىرىعى مول بولعانى دۇرىس. بەسىنشى، دومبىرانىڭ باسى مەن اياعى بىردەي «سويلەۋى» كەرەك. التىنشى، دومبىرانىڭ باۋىرى جۇمساق، موينى ىڭعايلى كەلۋى ءتيىس جانە جەتىنشى، دومبىرانىڭ سىرت ءپىشىنى قاراپايىم، ەستەتيكالىق تۇرعىدان اسەم جانە ۇيلەسىمدى بولعانى ابزال»، - دەدى ول.
بۇگىنگى بايقاۋعا بۇكىل رەسپۋبليكا بويىنشا 60 تان استام شەبەر قاتىسۋدا. بايقاۋ- بايگە بارىسىندا بارلىعى 120 شاقتى جاڭا دومبىراعا باعا بەرىلەدى. ياعني، قاتىسۋشىلاردىڭ سانى مەن جاسىنا شەك قويىلماعانىمەن، ءاربىر شەبەر ەكى دومبىرادان ارتىق اسپاپتى بايقاۋ- بايگەگە قاتىستىرا المايدى.
قازىلار القاسىنىڭ ءتورايىمى ۇلجان بايبوسىنوۆا، ال مۇشەلەرى - قازاقستاننىڭ ەڭبەك سىڭىرگەن قايراتكەرى، كۇيشى ءشامىل ابىلتايەۆ، قازاقستاننىڭ ەڭبەك سىڭىرگەن قايراتكەر، كۇيشى ەربولات مۇستافايەۆ جانە قازاقستاننىڭ مادەنيەت قايراتكەرى، كۇيشى مۇرات ءابۋعازى.
بايقاۋ- بايگەدە 9 جۇلدەلى ورىن بەلگىلەنگەن. باس جۇلدە - 700 مىڭ تەڭگە. ءبىرىنشى ورىن العان جۇمىر شاناق دومبىرا مەن قالاق دومبىرانى جاساعان شەبەرلەرگە - 350 مىڭ تەڭگەدەن تابىس ەتىلەدى. ەكىنشى ورىن العان قوس دومبىرا شەبەرلەرىنە - 300 مىڭ تەڭگەدەن جانە ءۇشىنشى ورىن العان ەكى جۇمىر شاناق دومبىرا مەن ەكى قالاق دومبىرا يەلەرىنە - 250 مىڭ تەڭگەدەن سىياقى بەرىلەدى.
قازىرگى ساتتە بايقاۋ ودان ءارى جالعاسۋدا. وعان ت. جۇرگەنوۆ اتىنداعى قازاق ۇلتتىق ونەر اكادەمياسى مەن قۇرمانازى اتىنداعى قازاق ۇلتتىق كونسەرۆاتورياسىنان كۇيشىلىك ونەردىڭ قىر- سىرىن مەڭگەرىپ جۇرگەن ەكى تاجىريبەلى ستۋدەنت شاقىرتىلعان. ولاردىڭ ءارقايسىسى ءوز كەزەگىمەن، بايقاۋعا ۇسىنىلعان دومبىرانى الدىمەن قازىلار القاسىنا اپارىپ بەرەدى. ال قازىلار القاسى دومبىرانى قولعا ۇستاپ، اينالدىرا قاراپ، ءتىپتى قاجەت بولىپ جاتسا، شەرتىپ تە كورىپ جاتىر. ودان كەيىن ستۋدەنت قازىلار القاسىنىڭ سۇراۋى بويىنشا سول دومبىرادا بىرنەشە كۇيدى ورىنداپ شىعادى. كەيىن قازىلار القاسى 1 دەن 10 عا دەيىن سان بويىنشا بالل قويادى. ال دومبىرا جاساۋشى شەبەرلەر بايقاۋعا كورەرمەن رەتىندە قاتىسۋدا. ولاردىڭ ەسىمدەرى دومبىرانى باعالاۋ بارىسىندا ايتىلمايدى.
ال بۇگىن كەشكە 18.00 دە وسى ىقىلاس دۇكەن ۇلى اتىنداعى حالىق مۋزىكالىق اسپاپتار مۋزەيىندە «اڭىز دومبىرا» بايقاۋ- بايگەسىنىڭ قورىتىندىسىندا جۇلدەلى ورىن العان دومبىرالاردىڭ جانە ونەر شەبەرلەرىنىڭ قاتىسۋىمەن گالا- كونتسەرت وتكىزىلەدى.
اۆتور: ايبوتا جاپپاربەرگەن