مينيستر قازاقستانداعى قاۋىپتى بەس اۋرۋدىڭ ءتۇرىن اتادى

استانا. قازاقپارات - قازاقستاندا ينفەكتسيالىق ەمەس اۋرۋلار دەڭگەيى جوعارىلاپ كەلەدى.

بۇگىن ماجىلىستەگى «نۇر وتان» پارتياسى فراكسياسىنىڭ كەڭەيتىلگەن جينالىسىندا ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.

ەسكە سالايىق، فراكسيا وتىرىسىندا «ءولىم كورسەتكىشى جوعارى اۋرۋلارمەن كۇرەسۋ بويىنشا مەملەكەتتىڭ اتقارىپ جاتقان جۇيەلى شارالارى» تاقىرىبى تالقىلانعان بولاتىن.

«بۇگىنگى كۇنى رەسپۋبليكامىزدا، بۇكىل الەمدەگى سەكىلدى ينفەكسيالىق ەمەس اۋرۋلار ءتۇرىنىڭ دەڭگەيى جوعارىلاپ وتىر. ماسەلەن، ءولىم-ءجىتىم كورسەتكىشىندە قايتىس بولۋدىڭ جارتىسىنا جۋىعى قان اينالىمى جۇيەسى اۋرۋلارىنا تيەسىلى - 26 پايىز، اسقىنعان ميوكاردا ينفاركتى - 5,5 پايىز، قاتەرلى ىسىكتەر - 13 پايىز، جاراقات الۋدان بولاتىن اۋرۋلار - 11 پايىز، بوسانۋ بارىسىندا جانە بالالار اۋرۋلارى - 3,6 پايىز. ساراپشىلاردىڭ ەسەپتەۋىنشە، وسى دەرتتەر بويىنشا شىعىندار قازاقستاندا كۇتىلەتىن ءومىر ءسۇرۋ ۇزاقتىعىن 8 جىلعا دەيىن قىسقارتادى»، - دەدى مينيستر ت. دۇيسەنوۆا.

ونىڭ ايتۋىنشا، 2016-2019 -جىلدارعا ارنالعان «دەنساۋلىق» جاڭا باعدارلاماسىندا جوعارىدا اتالعان 5 اۋرۋ تۇرلەرىن ەمدەۋ مەن الدىن الۋعا باسا نازار اۋدارىلادى. ويتكەنى، ءدال وسى بەس باعىتتاعى اۋرۋ تۇرلەرى ەل دەموگرافياسىنا ايتارلىقتاي اسەر ەتەدى.

اۆتور: قانات مامەتقازى ۇلى