استانادا وقۋ بىتىرگەن تۇلەكتەرگە جۇمىس تابۋعا كومەك كورسەتىلدى

استانا. قازاقپارات - استانادا تەحنيكالىق جانە كاسىپتىك وقۋ ورىندارىنىڭ تۇلەكتەرىنە ارنالعان بوس ورىندار جارمەڭكەسى وتكىزىلدى، دەپ حابارلايدى ەلوردانىڭ رەسمي سايتى.

وندا ونەركاسىپتىك ءوندىرىس، قىزمەت كورسەتۋ، مەديتسينا، قۇرىلىس جانە ت. ب. سالالاردا قىزمەت ەتەتىن 50 دەن استام كومپانيا بوس جۇمىس ورىندارىن ۇسىندى. وقۋ ورىندارىنىڭ تۇلەكتەرى الەۋەتتى جۇمىس بەرۋشىلەرمەن اڭگىمەلەسۋدەن ءوتىپ، ەلورداداعى ەڭ قاجەتتى ماماندىقتارمەن تانىستى.

سونىمەن قاتار، ستۋدەنتتەر مەملەكەتتىك باعدارلاما اياسىندا جۇمىسقا ورنالاسۋ ماسەلەلەرى بويىنشا كەڭەس الدى.

«جۇمىسپەن قامتۋ جول كارتاسى - 2020» باعدارلاماسىن ىسكە اسىرۋ اياسىندا جۇمىس تاجىريبەسى جوق ورتا ارنايى، جوعارى وقۋ ورىندارىنىڭ تۇلەكتەرىنە ارنالعان جاستار پراكتيكاسى باعىتى ىسكە قوسىلعان. ولارعا باستاپقى تاجىريبە جيناۋ ءۇشىن التى ايعا ۋاقىتشا جۇمىس بەرىلەدى، ەڭبەكاقى مەملەكەت تاراپىنان تولەنەدى. ديپلوم العان تۇلەك جۇمىسپەن قامتۋ ورتالىعىنان جۇمىس بەرۋشىمەن اڭگىمەلەسۋگە جولداما الادى، ەگەر وڭ جاۋاپ الاتىن بولسا، قۇجاتتار ءتىزىمىن جيناپ، باعدارلاماعا قاتىسادى» ، - دەدى جۇمىسپەن قامتۋ ورتالىعىنىڭ كاسىپتىك وقىتۋ ءبولىمى باسشىسىنىڭ ورىنباسارى ازامات بايتاسوۆ.

باعدارلاما اياسىندا كاسىبي وقىتۋ دا ىسكە اسىرىلادى. ماماندىقتى يگەرىپ، جۇمىس تابا الماعاندار نەمەسە سۇرانىسى جوق كاسىپتى مەڭگەرگەندەر دايارلاۋ، قايتا دايارلاۋ جانە بىلىكتىلىكتى ارتتىرۋ بويىنشا تەگىن كۋرستارعا جىبەرىلەدى.

ەلوردادا بوس ورىندار جارمەڭكەلەرى تۇراقتى تۇردە وتكىزىلەدى، بوس جۇمىس ورىندارىن ىزدەۋ ماسەلەلەرى بويىنشا بەيبىتشىلىك كوشەسى، 25 -مەكەن جايىندا ورنالاسقان استانا قالاسىنىڭ جۇمىسپەن قامتۋ ورتالىعىنا جۇگىنۋگە بولادى.