ورازادا شولدەمەۋدىڭ امالدارى

استانا. قازاقپارات - بيىل رامازان ايى نەگىزىنەن ماۋسىم-شىلدە ايلارىمەن تۇستاس كەلەتىندىكتەن، ورازا ۇستايتىندار ءۇشىن شولگە شىداۋ ماسەلەسى اسا ماڭىزدى بولىپ تابىلادى.

وسى كۇندەرى كۇننىڭ استىندا جۇمىس ىستەيتىندەر دە كەزدەسەدى. سول كەزدەردە ارگانيزم كوپ سۋ جوعالتسا، ادامنىڭ باسى اينالىپ، ىستىعى كوتەرىلىپ، جۇرەگى اينىپ، ءتىپتى قۇسۋى دا مۇمكىن. ەندەشە، جازدىڭ ىستىق كۇندەرىندە اۋىز بەكىتكەندە، شولدەمەۋ ءۇشىن نە ىستەۋ كەرەك؟

ەندى وسى جونىندەگى ازداعان كەڭەستەرگە قۇلاق تۇرىڭىزدەر.

1. شاي، كوفە، گازدالعان سۋسىن مەن الكوگول ىشپەگەن دۇرىس. ولاردا كوفەين مەن حيميالىق قوسپالار بولعاندىقتان، ءشول قانۋدىڭ ورنىنا، ورگانيزمدى قايتا سۋساتۋعا اكەلىپ سوقتىرادى.

2. اۋىز بەكىتەردە ءبىر شىم-شىم تۇز سالىنعان ءبىر كەسە تۇزدى سۋ ىشسەڭىز، ورگانيزمنەن سۋ شىعۋ ءۇردىسى تەجەلەدى. اركىمنىڭ قاجەتىنە قاراي ادامدار سۋ مولشەرىن ءارقالاي قابىلدايدى. وتە بەلسەندى ادام تاۋلىگىنە 2-3 ليتر سۋ ءىشۋى كەرەك. سۋ، كوك شاي جانە ءار ءتۇرلى شوپتەردەن جاسالعان شاي ءشولدى جاقسى قاندىرادى.

3. ورازا كەزىندە تاماق ىشكەندە وتە اششى، تۇزدى، قۋىرىلعان، مايلى جانە ءتاتتى تاعامدار جەمەڭىز. قۋىرىلعان جانە مايلى تاعام اسقازان مەن ىشەكتى تىتىركەندىرەدى جانە وتە باياۋ قورىتىلادى. ال اششى، تۇزدى جانە ءتاتتى تاعامدار بولسا ادامدى شولدەتەدى. وسى جاعدايلارعا بايلانىستى تاڭەرتەڭ بوتقا جەگەن وتە ءتيىمدى. بوتقانىڭ قورىتىلۋى وڭاي، ورگانيزمگە پايدالى، جەڭىل تاعام. سونىمەن قاتار، بوتقا جەگەن ادام بەلگىلى ءبىر دارەجەدە كۇنى بويى توق بولادى.

4. قىرىققابات، ءسابىز، كارتوپ، كادى سياقتى كوكونىستەردى مەيلىنشە كوبىرەك جەڭىز.

5. اۋىز بەكىتكەندە الما، ءجۇزىم، اپەلسين، المۇرت سياقتى جەمىستەردى جەمەگەن دۇرىس. ويتكەنى، ولاردىڭ قۇرامىندا قىشقىل كوپ بولعاندىقتان، كۇندىز ادامدى ءشول قىسۋى مۇمكىن، دەپ جازادى «ەگەمەن قازاقستان» گازەتى.