ب. ساعىنتايەۆ جەر رەفورماسى جونىندەگى كوميسسيانىڭ العاشقى كوشپەلى وتىرىسىن قورىتىندىلادى
«بىردە-ءبىر ساۋال قاراۋسىز، شەتكەرى قالمايدى. ولاردىڭ ءبارىن ءبىر جۇيەگە كەلتىرىپ، باعىتتارى بويىنشا قارايتىن بولامىز»، - دەدى ب. ساعىنتايەۆ كوميسسيانىڭ وڭىرلەرگە العاشقى كوشپەلى وتىرىسىنىڭ قورىتىندىسى بويىنشا.
ول وتىرىسقا قاتىسقان اقمولا وبلىسىنىڭ وكىلدەرى ءوز پىكىرلەرىن ايتىپ، وزدەرىن قىزىقتىراتىن ساۋالداردى قويعانىن ايتىپ ءوتتى، دەپ جازادى primeminister.kz.
ولاردىڭ ىشىندە - جەردى ساتۋعا، شەتەل ازاماتتارىنا جالعا بەرۋگە قاتىستى جانە ت. ب. ساۋالدار بار.
«اشىق اڭگىمە بولدى (...) وتىرىس ءتورت ساعاتقا سوزىلدى، قىرىقتان استام ادام ءسوز سويلەدى. سەلەكتورلىق رەجىمدە وبلىستىڭ بارلىق اۋداندارىن قوستىق. اۋدانداردا دا نيەت بىلدىرگەندەر ءوز پىكىرلەرىن ايتتى. بۇگىنگى وتىرىس جۇمىسىنا بارلىعى 250 دەن استام ادام قاتىستى. ارينە، وڭىرلەردەگى ادامداردىڭ ساۋالدارىن، ۇسىنىستارىن تىڭداعاندا ولاردا بارشا حالىقتى مازالايتىن سۇراقتاردان بولەك وزگە دە كوپتەگەن سۇراقتار بار ەكەنىن بايقادىق.
نەگىزىنەن بۇل الەۋمەتتىك سالاعا، اۋىل ينفراقۇرىلىمىنا قاتىستى جەكە سۇراقتار. ولار قالا تۇرعىندارى ءۇشىن تۇسىنىكسىز بولۋى مۇمكىن، ءبىراق اۋىل تۇرعىندارى ءۇشىن بۇل ءبىرىنشى كەزەكتە تۇرعان ماسەلەلەر»، - دەپ اتاپ ءوتتى ءبىرىنشى ۆيتسە-پرەمەر.
ەستەرىڭىزگە سالساق، كوميسسيانىڭ الدىڭعى وتىرىسى بارىسىندا، 28- مامىردا، ونىڭ مۇشەلەرى حالىققا جەر رەفورماسى بويىنشا ءتۇسىندىرۋ جانە اقپاراتتاندىرۋ ءۇشىن ەلدىڭ وڭىرلەرىنە باراتىندىعى جاريالانعان بولاتىن.
«ءبىزدىڭ مىندەتىمىز - بارلىق ۇسىنىستار مەن پىكىرلەردى حالىققا جەتكىزۋ. كوميسسيانىڭ كەلەسى وتىرىسىن ايماقتارداعى كەزدەسۋدەن باستاۋدى ۇسىنامىن. تاعى قوسالقى توپ قۇرىپ ايماقتارعا بارۋ كەرەك. (...) وسى ايدا بىرنەشە ساپاردى جوسپارلاپ، ال تامىز ايىندا ءتۇيىندى شەشىممەن ورالۋىمىز كەرەك. مەنىڭ ويىمشا، حالىقپەن كەزدەسۋدى اقمولا وبلىسىنان باستاعان دۇرىس. جۇمىستى جاقىن وبلىستاردان باستاۋ كەرەك»، - دەدى ءبىرىنشى ۆيتسە-پرەمەر.
سول كەزدە ول وڭىرلەردەگى كەزدەسۋلەرگە بارلىق مۇددەلى تۇلعالار، اگرارلىق سەكتور جانە بيزنەس وكىلدەرى شاقىرىلاتىنىن ايتىپ ءوتتى. وسىعان بايلانىستى ول ق ر اۋىل شارۋاشىلىعى ءمينيسترى اسقار مىرزاحمەتوۆكە وڭىرلەرگە بارۋعا نيەت بىلدىرگەن توپتاردىڭ ءتىزىمىن ۇسىنۋدى تاپسىرعان بولاتىن.